Gwọlọ Ọkpọvio Ọghẹnẹ Evaọ Eware Kpobi
“Ọghẹnẹ na ọna, Ọghẹnẹ mai bẹdẹ bẹdẹ. Ọ rẹ te jọ osu mai bẹdẹ.”—Ol. 48:14.
1, 2. Fikieme ma je lele ọkpọvio Jihova viukpenọ ma rẹ rẹroso areghẹ obọmai, kọ enọ vẹ e roma via?
MA TE bi roro kpahe eware nọ i fioka ha hayo enọ e vọ avọ enwoma, o rẹ lọhọ gaga re ma viẹ oma mai họ. (Itẹ 12:11) Ma tẹ ginẹ gwọlọ ru oware jọ nọ u fo kẹ Oleleikristi hi, udu mai o sae viẹ omai họ inọ oware na o nwani yoma tere he. (Jeri. 17:5, 9) Fikiere, ọso-ilezi na o dhesẹ areghẹ nọ ọ lẹ se Jihova nọ: “Vi elo gbe uzẹme ra ze re i su omẹ.” (Ol. 43:3) Jihova họ ọnọ o fievahọ, orọnikọ areghẹ obọriẹ hẹ, yọ Jihova họ ehri ọkpọvio nọ ọ mai woma. Wọhọ ọso-ilezi na, u re woma re ma rẹroso Ọghẹnẹ kẹ ọkpọvio.
2 Kọ fikieme ma je fievahọ ọkpọvio Jihova vi orọ omọfa jọ kpobi? Okevẹ ma rẹ rọ gwọlọ iẹe? Oghẹrẹ uruemu vẹ ma re wo re ma sae wo erere no ọkpọvio Jihova ze, kọ ẹvẹ Jihova ọ be rọ kpọ omai nẹnẹ? Enọ nana nọ i wuzou na ma be te jọ uzoẹme nana ta kpahe.
Fikieme Ma re ro Fievahọ Ọkpọvio Jihova?
3-5. Fikieme ma sai ro fi eva mai kpobi họ ọkpọvio Jihova?
3 Jihova họ Ọsẹ obọ odhiwu mai. (1 Kọr. 8:6) Ọ riẹ omai omomọvo lafi yọ ọ sae jẹ riẹ oware nọ o rọ omai eva. (1 Sam. 16:7; Itẹ 21:2) Devidi Ovie na ọ jọ olẹ ta kẹ Ọghẹnẹ nọ: “Whọ riẹ oke ẹkeria mẹ gbe oke etovrẹ mẹ; whọ riẹ ẹjiroro eva mẹ no anwọ abae ze. Makinọ re eme ọ tẹ te ze ẹrọo-unu mẹ, ri, ỌNOWO, yo whọ riẹ rai kpobi vẹrino.” (Ol. 139:2, 4) Nọ orọnọ Jihova ọ riẹ omai ziezi na, ma rẹ vro ho inọ ọ riẹ oware nọ u woma kẹ omai. U te no ere no, Jihova họ ọnọ o wo areghẹ kpobi. Ọ rẹ ruẹ eware kpobi, ruẹ kodo vi ohwo-akpọ jọ kpobi, yọ ọ rẹ jẹ riẹ ekuhọ eware kpobi no emuhọ rai ze. (Aiz. 46:9-11; Rom 11:33) Ọye họ “Ọghẹnẹ nọ o wo areghẹ.”—Rom 16:27.
4 Fibae, Jihova o you omai yọ ọ be gwọlọ ewoma mai ẹsikpobi. (Jọn 3:16; 1 Jọn 4:8) Wọhọ Ọghẹnẹ oyoyou, o bi ru eware iwoma kẹ omai. Jemis olele na o kere nọ: “Kokẹ uwoma kokẹ uwoma avọ okẹ nọ o gba kiete kpobi obọ ehru u re notha, i no obọ Ọsẹ ilo tha.” (Jem. 1:17) Ọghẹnẹ o bi ru eware iwoma kẹ ahwo nọ a gwọlọ inọ ọ kpọ ae.
5 Orọ urere, Jihova họ erumeru. Ọso-ilezi na ọ ta kpahe onana nọ: “Ọnọ ọ be ria oria Oride na, ọ rẹ te jọ otọ uwoho Erumeru na, ọ rẹ te ta kẹ ỌNOWO nọ, ‘Whẹ họ oria adhẹzọ gbe uwou ogaga mẹ; Ọghẹnẹ mẹ, ọnọ me re fievahọ.’” (Ol. 91:1, 2) Nọ ma te bi lele ọkpọvio Jihova, yọ ma be gwọlọ re Ọghẹnẹ ọ jọ adhẹzọ mai keme ọ rẹ sai ru oma vo omai hi. Ma tẹ make nyaku ebẹbẹ dede, Jihova ọ rẹ thọ omai. Ọ rẹ siọ omai ba ha. (Ol. 71:4, 5; Se Itẹ 3:19-26.) Ẹhẹ, Jihova ọ riẹ oware nọ o mai woma kẹ omai, ọ gwọlọ oware nọ o mai woma kẹ omai, o te je wo ẹgba nọ ọ rẹ rọ kẹ omai oware nọ o mai woma. Oware ugheghẹ o rẹ jọ re ma siọ ọkpọvio riẹ! Rekọ, okevẹ ma rọ gwọlọ ọkpọvio nana?
Okevẹ Ma Rọ Gwọlọ Ọkpọvio?
6, 7. Okevẹ ma rọ gwọlọ ọkpọvio Jihova?
6 Uzẹme riẹ họ, ma gwọlọ ọkpọvio Ọghẹnẹ evaọ edẹ uzuazọ mai kpobi, no oke emaha rite oke owho. Ọso-ilezi na ọ ta inọ: “Ọghẹnẹ na ọna, Ọghẹnẹ mai bẹdẹ bẹdẹ. Ọ rẹ te jọ osu mai bẹdẹ.” (Ol. 48:14) Wọhọ ọso-ilezi na, Ileleikristi nọ i wo areghẹ a rẹ rẹroso Ọghẹnẹ kẹ ọkpọvio ẹsikpobi.
7 Okejọ o rẹ jariẹ nọ ma rẹ mae rọ gwọlọ obufihọ kpata kpata. Ẹsejọ ma rẹ jọ “evie okuba,” o sae jọnọ fiki ukpokpoma, ẹyao ọgaga, hayo a si omai no iruo idudhe. (Ol. 69:16, 17) Eva oke utioye na, o rrọ oware omosasọ inọ ma rẹ sae lẹ se Jihova, avọ imuẹro inọ ọ te kẹ omai ẹgba nọ ma re ro thihakọ fi obọ họ kẹ omai jẹ emamọ iroro. (Se Olezi 102:17.) Rekọ, ma rẹ jẹ gwọlọ obufihọ riẹ evaọ oke ofa. Wọhọ oriruo, okenọ ma tẹ be ta usiuwoma kẹ ahwo, ma gwọlọ obufihọ Jihova re usiuwoma nọ ma be ta na u te ai udu. Yọ oke kpobi nọ ma tẹ be jiroro oware jọ—makọ u kie kpahe aruọzaha, ẹgọ gbe osẹ, usu, iruo, isukulu, hayo oware ofa jọ kpobi—ma rẹ sae jiroro areghẹ nọ ma te lele ọkpọvio Jihova. Uzẹme riẹ họ, ma gwọlọ ọkpọvio evaọ kabọ kabọ uzuazọ mai.
Enwoma nọ I re te Enọ E be Siọ Ọkpọvio Ọghẹnẹ
8. Eme ubi-ure nọ Ivi ọ re na u dhesẹ?
8 Kareghẹhọ inọ u re no omai eva ze re ma lele ọkpọvio Jihova. Ọghẹnẹ ọ te gba omai họ re ma lele ọkpọvio riẹ hẹ u gbe no omai eva ze he. Ivi họ ohwo-akpọ ọsosuọ nọ ọ salọ inọ o re lele ọkpọvio Jihova ha, yọ oriruo riẹ u dhesẹ enwoma nọ i re no iroro iyoma itieye ze. Roro kpahe oware nọ u no iroro-ejẹ riẹ ze. Ivi ọ re ubi-ure nọ Ọghẹnẹ ọ ta nọ a re he keme ọ gwọlọ “jọ wọhọ Ọghẹnẹ, nọ ọ rẹ riẹ uwoma gbe uyoma.” (Emu. 3:5) Ọ tẹ rọ ere fi oma riẹ họ ẹta Ọghẹnẹ, jiroro oware uwoma gbe uyoma kẹ oma riẹ ikpenọ o re lele ọkpọvio Jihova. Fikiere, ọ tẹ siọ esuo-okpehru Jihova. Ọ gwọlọ su omobọriẹ. Uruemu ọkparesuọ ọvo na ọzae riẹ, Adamu, o dhesẹ.—Rom 5:12.
9. Ma tẹ be siọ ọkpọvio Jihova yọ eme ma bi ru na, kọ fikieme oyena o gbẹ rrọ oware areghẹ hẹ?
9 Nẹnẹ, otẹrọnọ ma gbe bi lele ọkpọvio Jihova ha, yọ ma be siọ esuo-okpehru riẹ wọhọ Ivi. Wọhọ oriruo, dai roro kpahe ohwo nọ o re rri ifoto ẹbẹba. Otẹrọnọ ọ rrọ ukoko na, ọ riẹ ọkpọvio Jihova kpahe onana. U fo ho re a tubẹ rehọ eware igbegbe ro gbiku, kabikọ re a rri rai avọ urusio dede. (Ẹf. 5:3) Fikinọ ohwo otiọye na o bi lele ọkpọvio Jihova ha, ọ be siọ esuo-okpehru Jihova gbe uzou-uwo Riẹ. (1 Kọr. 11:3) Uruemu nana o kare areghẹ gaga, keme wọhọ epanọ Jerimaya ọ ta, “ohwo o wo ogaga nọ o ro su oma obọ riẹ hẹ.”—Jeri. 10:23.
10. Fikieme ma gbẹ rọ rehọ uvẹ nọ ma rẹ rọ salọ onọ u je omai na ru iruo thọthọ họ?
10 Ahwo jọ a rẹ sae siọ ẹme Jerimaya na, bi roro inọ, nọ orọnọ Jihova ọ kẹ omai uvẹ nọ ma rẹ rọ salọ onọ u je omai na, ọ rẹ fo omai hi nọ ma tẹ be rehọ uvẹ yena ru iruo. Ghele na, jọ o thọrọ owhẹ ẹro ho inọ dede nọ uvẹ ẹsalọ nana yọ okẹ, a rẹ rehọ iẹe ru iruo thọthọ họ. Ma ti guọvunu kẹ Jihova kpahe eme nọ ma ta gbe eware nọ ma ru. (Rom 14:10) Jesu ọ ta nọ: “Eme ibuobu nọ erọ eva na unu a rẹ rọ tae via.” Ọ tẹ jẹ ta nọ: “Eva iroro iyoma i re no tha, ijihẹ, ẹnwae-obro, uji, isẹierue, igberedha, ugbeguo.” (Mat. 12:34; 15:19) Fikiere, ẹme gbe uruemu mai i re dhesẹ oware nọ o rrọ omai eva. I re dhesẹ oghẹrẹ ohwo nọ ma ginẹ rrọ. Oyejabọ nọ Oleleikristi nọ o wo areghẹ ọ jẹ gwọlọ ọkpọvio Jihova evaọ eware kpobi na. O te bi ru ere, Jihova ọ vẹ te ruẹ inọ ‘eva riẹ e fo’ o ve “ru ewoma” kẹe.—Ol. 125:4.
11. Eme ma wuhrẹ no ikuigbe emọ Izrẹl ze?
11 Kareghẹhọ ikuigbe emọ Izrẹl. Okenọ a salọ inọ izi Jihova a re koko, Jihova ọ thọ rai. (Jos. 24:15, 21, 31) Rekọ ẹsibuobu a rehọ uvẹ nọ a rẹ rọ salọ na ru iruo thọthọ. Evaọ edẹ Jerimaya, Jihova ọ ta kpahe ae nọ: “A yo [ẹme] hayo gaviezọ gbehe, rekọ a te lele ẹjiroro eva rai gbe udu ogaga eva umuemu rai, a te kpemu, [ukpenọ] a kparo.” (Jeri. 7:24-26) U yoma kẹhẹ! A joma rọ fiki udu ogaga hayo isiuru omobọ mai siọ ọkpọvio Jihova ha, re ma nya lele ẹjiroro eva mai jẹ rọ ere ‘kpemu, ukpenọ ma kparo’!
Eme O Gwọlọ re Ma Nya Lele Ọkpọvio Ọghẹnẹ?
12, 13. (a) Eme o rẹ wọ omai nya lele ọkpọvio Jihova? (b) Fikieme ẹrọwọ u je wuzou?
12 Uyoyou nọ ma wo kẹ Jihova oye o rẹ wọ mai nya lele ọkpọvio riẹ. (1 Jọn 5:3) Rekọ, Pọl ọ ta ẹme te oware ofa jọ nọ ma gwọlọ nọ ọ ta inọ: “Orọwọ ma be rọ nya, orọnikọ udeoruẹ hẹ.” (2 Kọr. 5:6, 7) Fikieme ẹrọwọ u je wuzou? U wuzou keme Jihova o bi su omai evaọ “ada ẹrẹreokie,” rekọ ada nana u re su kpohọ efe hayo okpodẹ evaọ akpọ nana ha. (Ol. 23:3) Fiki ẹjiroro nana, o gwọlọ nọ ma rẹ tẹro vi eghale nọ i re no ẹgọ Jihova ze. (Se 2 Ahwo Kọrint 4:17, 18.) Ẹrọwọ u ve je fi obọ họ kẹ omai nọ utho eware nọ ma wo e jẹ da omai ẹro.—1 Tim. 6:8.
13 Jesu o dhesẹ inọ egagọ uzẹme e gwọlọ omolahiẹ, yọ onana o gwọlọ ẹrọwọ re. (Luk 9:23, 24) Idibo Jihova jọ a dhesẹ ẹzi oma olahiẹ gaga no, a thihakọ uvuhu no, okienyẹ, omagbẹre, makọ ukpokpoma ogaga dede. (2 Kọr. 11:23-27; Evia. 3:8-10) Ẹrọwọ ọgaga ọvo a sai ro ru ere avọ oghọghọ. (Jem. 1:2, 3) Ẹrọwọ ọgaga o rẹ lẹliẹ omai wo uvi imuẹro inọ ọkpọvio Jihova nọ ma re lele o rẹ mai woma ẹsikpobi. O rẹ kẹ omai erere ẹsikpobi. U mu omai ẹro ziezi inọ eghale nọ i ti te ahwo nọ a thihakọ e rro gaga vi uye ubroke nọ a be ruẹ enẹna.—Hib. 11:6.
14. Fikieme o jẹ gba Hega họ re o dhesẹ omaurokpotọ?
14 Je roro kpahe epanọ omaurokpotọ u re ro fi obọ họ kẹ omai nya lele ọkpọvio Jihova. Oriruo Hega, odibo-ọmọtẹ Sera, u dhesẹ onana. Nọ Sera ọ ruẹ inọ o bi yẹ ọmọ họ, ọ tẹ rehọ Hega kẹ Abraham, Hega o te dihọ kẹ Abraham. Hega o te je fu uke kẹ oni-uwou riẹ nọ ọ rrọ ọga na. Fikiere, Sera o te je “ru ei gaga,” Hega ọ tẹ dhẹ no uwou. Ẹnjẹle Jihova jọ ọ tẹ ruẹ Hega ọ tẹ ta kẹe inọ: “Zihe bru oni-uwou ra, re whọ rehọ oma kpotọ kẹ e.” (Emu. 16:2, 6, 8, 9) Ẹsejọhọ o hae were Hega re a kẹe oghẹrẹ ọkpọvio ọfa. Re ọ sai ru oware nọ ukọ-odhiwu na ọ ta kẹe na, kọ ọ rẹ siọ uke ba e fuo. Hega ọ rehọ oma kpotọ ru epanọ ukọ-odhiwu na ọ ta na, o te yẹ ọmọ riẹ, Ishmẹl evaọ evuẹ Abraham.
15. Dhesẹ oghẹrẹ iyero jọ nọ o gwọlọ nọ ma rẹ jọ roma kpotọ re ma sae nya lele ọkpọvio Jihova.
15 Re ma sai lele ọkpọvio Jihova, o gwọlọ inọ ma rẹ roma kpotọ re. O sae gwọlọ re ahwo jọ a rọwo inọ oghẹrẹ erozaha hayo omakugbe nọ o rẹ were ai o rẹ dha Jihova eva. O sae jọnọ Oleleikristi jọ o ru ohwo jọ eva dha yọ o gwọlọ nọ o wounu. Hayo o sae jọnọ oware jọ o thọ riẹ obọ yọ o gwọlọ nọ ọ rẹ rọwo iruthọ riẹ. Kọ otẹrọnọ ohwo jọ ọ thọ uzi ulogbo jọ? U fo nọ ọ rẹ roma kpotọ ọ vẹ fa izieraha riẹ kẹ ekpako na. O sae jọnọ a si ohwo jọ no ukoko na. Re a sae rehọ iẹe zihe ze, o re kurẹriẹ no eva ze. Evaọ iyero itienana gbe efa, eme nọ e rrọ Itẹ 29:23 e rẹ kẹ omosasọ: “Omovia u re ru ohwo kpotọ, rekọ adhẹẹ u re te ohwo nọ o wo ẹzi omurokpotọ.”
Ẹvẹ Jihova Ọ Be rọ Kpọ Omai?
16, 17. Ẹvẹ ma sai ro wo erere vọvọ no Ebaibol ze wọhọ ehri ọkpọvio Ọghẹnẹ?
16 Oria ọsosuọ nọ a rẹ jọ ruẹ ọkpọvio Ọghẹnẹ họ Ebaibol na, Ẹme Ọghẹnẹ. (Se 2 Timoti 3:16, 17.) Re ma sai wo erere ologbo no Ẹme Ọghẹnẹ ze, orọnikọ ma rẹ hẹrẹ re ẹbẹbẹ ọ ze tao re ma tẹ te gwọlọ eme nọ i re fi obọ họ kẹ omai evaọ Ikereakere na ha. Ukpoye, ma re se Ebaibol na kẹdẹ kẹdẹ. (Ol. 1:1-3) Enẹ ma rẹ rọ riẹ oware nọ o rọ evaọ Ebaibol na. Ma ve ti roro wọhọ epanọ Ọghẹnẹ o re roro, ma vẹ jẹ thomavẹre kẹ ebẹbẹ nọ ma rẹro rai hi.
17 Fibae, u wuzou re ma roro didi kpahe oware nọ ma se evaọ Ikereakere na jẹ lẹ kpahe iẹe. Ma te bi roro kpahe awọ Ebaibol jọ, yọ ma bi roro kpahe epanọ ma re ro fi ai họ iruo evaọ iyero jọ. (1 Tim. 4:15) Ma tẹ rẹriẹ ovao ku ebẹbẹ ilogbo, ma rẹ lẹ se Jihova re o fi obọ họ kẹ omai riẹ oware nọ o gwọlọ inọ ma re ru. Ẹzi Jihova o ti fi obọ họ kẹ omai kareghẹhọ izi Ikereakere nọ ma se evaọ Ebaibol na hayo evaọ ebe nọ a kere no Ebaibol ze.—Se Olezi 25:4, 5.
18. Idhere vẹ Jihova ọ be rọ rehọ okugbe-inievo Ileleikristi na kpọ omai?
18 Okugbe-inievo Ileleikristi mai yọ oria ofa nọ ma rẹ jọ gwọlọ ọkpọvio Jihova. Abọ ologbo ọrọ okugbe-inievo na họ ‘ọrigbo nọ o wo ẹrọwọ avọ areghẹ na’ avọ Ugboma Esuo riẹ, nọ ọ be rehọ ẹkwoma ebe nọ a kere gbe ọruẹrẹfihotọ iwuhrẹ ukoko gbe ikokohọ rọ kẹ omai emu abọ-ẹzi kẹse kẹse. (Mat. 24:45-47; wawo Iruẹru Ikọ Na 15:6, 22-31.) U te no ere no, ma rẹ jọ udevie okugbe-inievo Ileleikristi na ruẹ ahwo nọ e kpako evaọ abọ-ẹzi, maero kọ ekpako ukoko, enọ i te nọ e rẹ sai fi obọ họ jẹ rehọ uthubro kẹ omomọvo. (Aiz. 32:1) Emaha nọ e rrọ iviuwou Ileleikristi a wo uvi ehri ọkpọvio ọfa. Otẹrọnọ esẹgbini rai a rrọ ukoko na, Ọghẹnẹ ọ kẹ rai udu nọ a re ro wuhrẹ emọ na izi riẹ, yọ a tuduhọ emọ na awọ re a gaviezọ kẹ uwuhrẹ esẹgbini rai.—Ẹf. 6:1-3.
19. Eghale vẹ ma bi wo fikinọ ma be nya lele ọkpọvio Jihova kẹse kẹse?
19 Ẹhẹ, Jihova ọ be kẹ omai ọkpọvio evaọ idhere buobu, yọ u re woma re ma fi ọkpọvio na họ iruo. Nọ ọ jẹ ta kpahe okenọ emọ Izrẹl a je ro koko izi Ọghẹnẹ, Devidi Ovie na ọ ta nọ: “Esẹ mai i fievahọ owhẹ; nọ a fievahọ, who te siwi ai. A bo se owhẹ, who siwi rai; a fievahọ owhẹ, whọ rọwo nọ oma o vuọ ae he.” (Ol. 22:3-5) Ma tẹ rehọ eva mai kpobi lele ọkpọvio Jihova, ọ te “rọwo nọ oma o vuọ” omai gbehe. Ẹruore mai u ti kiekpe omai hi. Ma tẹ ‘rọ oma mai kpobi kẹ ỌNOWO na,’ ukpenọ ma rẹ rọ ẹroso areghẹ obọmai, ma ti wo eghale makọ enẹna. (Ol. 37:5) Yọ ma tẹ roma kpotọ thihakọ yoẹme kẹ Jihova, eghale yena e rẹ te jọ bẹdẹ. Devidi Ovie na o kere nọ: “ỌNOWO o you oziẹokiẹrẹe; ọ rẹ se erezi riẹ hẹ. Ọ rẹ sẹro okiẹrẹe na bẹdẹ . . . Ikiẹrẹe e rẹ te rehọ otọ na reuku, a vẹ jẹ ria ae bẹdẹ.”—Ol. 37:28, 29.
Kọ Whọ Sae k’Iyo Enọ Nana Vevẹ?
• Fikieme ma jẹ rẹroso ọkpọvio Jihova?
• Eme u re dhesẹ nọ ma tẹ siọ ọkpọvio Jihova?
• Otọ iyero jọ vẹ o jọ gwọlọ nọ Oleleikristi o re jo dhesẹ omaurokpotọ?
• Ẹvẹ Jihova ọ be rọ kpọ omai nẹnẹ?
[Iwoho nọ e rrọ ẹwẹ-obe avọ 8]
Kọ whọ be rẹroso Jihova evaọ kabọ kabọ uzuazọ ra?
[Uwoho nọ e rrọ ẹwẹ-obe avọ 9]
Ivi ọ siọ esuo-okpehru Jihova
[Uwoho nọ e rrọ ẹwẹ-obe avọ 10]
Uruemu vẹ Hega o re wo re ọ sai lele ọkpọvio ukọ-odhiwu na?