Yọrọ Usu “Ufi Nọ A Thahe Akuasa” Evaọ Orọo Ra
“Ufi nọ a thahe akuasa o rẹ kake sawo ho.”—ỌTAUSI. 4:12.
1. Ono o ku imava ọsosuọ na gbe evaọ orọo?
NỌ JIHOVA ỌGHẸNẸ ọ ma ekakọ gbe erao no, ọ tẹ ma ọzae ọsosuọ na, Adamu. Uwhremu na Ọghẹnẹ o te ru re Adamu o kie ruọ owezẹ odidi, ọ tẹ rehọ ubiofẹ riẹ jọ ma ofiobọhọ ọgbagba kẹe. Nọ Adamu ọ ruẹ aye na, ọ tẹ ta nọ: “Enẹna, ọnana họ onwa enwa mẹ, gbe uwou uwou-oma mẹ.” (Emu. 1:27; 2:18, 21-23) Jihova o dhesẹ inọ aye nọ ọ ma na o were riẹ ẹkwoma imava na nọ o kugbe evaọ orọo jẹ ghale ae.—Emu. 1:28; 2:24.
2. Ẹvẹ Setan o ro fi ẹbẹbẹ họ udevie Adamu avọ Ivi?
2 U yoma gaga, u kri hi ẹbẹbẹ ọ tẹ ruọ ọruẹrẹfihotọ orọo na. Evaọ oghẹrẹ vẹ? Omama ẹzi omuomu jọ, ọnọ a te riẹ uwhremu na wọhọ Setan, ọ tẹ viẹ Ivi họ riọ ubi-ure ọvuọvo nọ a ta kẹ ae nnọ a re he. Adamu o te ti kuomagbe aye riẹ re ubi-ure na, a tẹ rrọ ere wọso esuo owoma Ọghẹnẹ gbe udu nọ o re ro su. (Emu. 3:1-7) Okenọ Jihova ọ nọ ọzae avọ aye na kpahe oware nọ a ru na, o tẹ jọ vevẹ inọ ẹbẹbẹ ọ ruọ orọo rai no. Adamu ọ fo aye riẹ, ta nọ: “Aye nọ whọ rọ kẹ omẹ re mẹ avọ iẹ ma gbẹ jọ, ọye ọ kẹ omẹ ubi-ure na mẹ tẹ re iẹe.”—Emu. 3:11-13.
3. Eriwo ethọthọ vẹ ahwo Ju jọ a wo?
3 No anwọ oke yena kpobi ze na, Setan ọ rehọ idhere ẹghẹ sa-sa wha ozighi fihọ erọo no. Wọhọ oriruo, ọ rehọ isu egagọ wuhrẹ eware ethọthọ kpahe orọo no. Isu egagọ jọ erọ ahwo Ju a ru itee Ọghẹnẹ kuẹku, kuvẹ inọ ezae e rẹ sae se eyae rai fiki emeware evere wọhọ uwhei nọ a fi da emu fia. Rekọ Jesu ọ ta nọ: “Kohwo kohwo nọ o siobọno aye riẹ o gbẹrọ fiki ẹnwae-obro ho, ọ jẹ rehọ ọfa, o bruẹnwae.”—Mat. 19:9.
4. Oghẹrẹ iruemu vẹ i bi ru ọruẹrẹfihotọ orọo fihọ kuẹku nẹnẹ?
4 Setan ọ gbẹ be daoma nẹnẹ re ọ raha erọo. Ezae nọ e be rehọ ezae, ezae avọ eyae nọ e rọo ho nọ e be rria kugbe, gbe erọo nọ e be fa odode i dhesẹ inọ Setan ọ be kparobọ gaga evaọ abọ nana. (Se Ahwo Hibru 13:4.) Eme mai Ileleikristi ma rẹ sai ru re ma whaha iroro ethọthọ nọ ahwo a wo kpahe orọo na? Joma ta ẹme kpahe eware jọ nọ a rẹ ruẹ evaọ orọo evawere, ọrọ obokparọ.
Jọ Jihova Ọ Jọ Orọo Ra
5. Eme “ufi nọ a thahe akuasa” evaọ orọo u dhesẹ?
5 Re a reawere orọo, Jihova ọ rẹ jọ usu orọo na. Ebaibol e ta nọ: “Ufi nọ a thahe akuasa o rẹ kake sawo ho.” (Ọtausi. 4:12) “Ufi nọ a thahe akuasa” yọ ẹme ozee. A tẹ rehọ oriruo nana ta ẹme kpahe orọo, egẹ ivẹ ọsosuọ na i dikihẹ kẹ ọzae avọ aye na, enọ a thahe wariẹ ugogo ogẹ na, Jihova Ọghẹnẹ. Nọ ọzae avọ aye a te ku Ọghẹnẹ gbe usu rai, o rẹ kẹ ae ẹgba nọ a re ro thihakọ ebẹbẹ, yọ oye o rẹ lẹliẹ aimava na wo evawere ziezi evaọ orọo.
6, 7. (a) Eme Ileleikristi a rẹ sai ru re a ruẹ nnọ Ọghẹnẹ ọ rrọ orọo rai? (b) Eme oniọvo-ọmọtẹ jọ o rri ghaghae evaọ oma ọzae riẹ?
6 Rekọ eme ọzae avọ aye a re ru re a ruẹ nnọ orọo rai o wọhọ ufi nọ a thahe akuasa? Devidi ọso-ilezi na ọ so nọ: “Mẹ gwọlọ ru orọeva ra, O Ọghẹnẹ mẹ; uzi ra o rọ udu mẹ.” (Ol. 40:8) Epọvo na re, uyoyou nọ ma wo kẹ Ọghẹnẹ o rẹ wọ omai rehọ eva mai kpobi gọe. Fikiere u re woma re ọzae avọ aye a wo emamọ usu kugbe Jihova re a je wo evawere evaọ eruo oreva riẹ. Imava orọo a rẹ jẹ daoma fi obọ họ kẹ ohwohwo re uyoyou nọ a wo kẹ Ọghẹnẹ o jọ gaga.—Itẹ 27:17.
7 Uzi Ọghẹnẹ o tẹ ginẹ rrọ udu mai, ekwakwa-aghae wọhọ ẹrọwọ, ẹruore, gbe uyoyou i ti dhesẹ oma via jẹ lẹliẹ usu orọo na jọ gaga. (1 Kọr. 13:13) Sandra, Oleleikristi nọ ọ rọo te ikpe 50 (udhuvẹ gbe ikpe) no ọ ta nọ: “Uruemu nọ ọzae mẹ o wo nọ o mae were omẹ họ ohrẹ nọ ọ be hae kẹ omẹ no Ebaibol ze gbe uyoyou riẹ kẹ Jihova, onọ o ga vi uyoyou nọ o wo kẹ omẹ.” Ezae uwou-orọo, kọ eyae rai a rẹ sae ta eme itieye na kpahe owhai?
8. Eme o gwọlọ re a sai “wo emamọ osaohwa” evaọ orọo?
8 Kọ whẹ avọ ọrivẹ-orọo ra wha be rehọ eware abọ-ẹzi gbe iruo Uvie na karo evaọ uzuazọ? Ofariẹ, kọ whọ ginẹ rehọ ọrivẹ-orọo ra na wọhọ ibe ọg’Ọghẹnẹ ra? (Emu. 2:24) Solomọn ovie owareghẹ na o kere nọ: “Imava i woma vi omọvo, keme a wo emamọ osaohwa rọkẹ iruo rai.” (Ọtausi. 4:9) Evaọ uzẹme, ọzae avọ aye a rẹ daoma gaga re a ruẹsi “wo emamọ osaohwa” evaọ orọo rai, koyehọ orọo nọ o rẹ tọ nọ o vọ avọ uyoyou gbe eghale Ọghẹnẹ.
9. (a) Ewha-iruo vẹ ezae uwou-orọo a wo? (b) Wọhọ epanọ Ahwo Kọlọsi 3:19 o ta, ẹvẹ ọzae o re yeri kugbe aye riẹ?
9 Oware nọ u re dhesẹ sọ Ọghẹnẹ ọ rrọ orọo họ oma nọ ọzae avọ aye na a be dawo re a ruẹse rria te itee Riẹ. Ezae họ enọ e mai wo owha-iruo ẹruorote ẹgwọlọ abọ-iwo gbe ọrọ abọ-ẹzi uviuwou na. (1 Tim. 5:8) A tẹ jẹ tuduhọ ae awọ re a roro kẹ eyae rai. Ma jọ Ahwo Kọlọsi 3:19 se nọ: “Ezae na wha you eyae rai, re wha se ae ba ekpokpo.” Ọgba-eriariẹ Ebaibol jọ ọ ta nọ ẹme na “ekpokpo” u kugbe “eme edada nọ a rẹ ta kẹ ae, ukpe ugbobọ, gbe ababọ ẹruorote.” O rrọ vevẹ inọ u fo ho re a jọ uviuwou Oleleikristi ruẹ uruemu utionana. Ọzae ọ tẹ be rẹrote uviuwou riẹ ziezi onana o re ru ei lọhọ kẹ aye riẹ re ọ rehọ oma kpotọ.
10. Didi oghẹrẹ uruemu u fo nnọ eyae nọ e rrọ Ileleikristi a re wo?
10 Eyae nọ e rrọ Ileleikristi nọ e gwọlọ nọ Jihova ọ jọ orọo rai a rẹ jẹ daoma nyate itee Ọghẹnẹ. Pọl ukọ na o kere nọ: “Whai eyae, wha rọ oma kpotọ kẹ ezae rai, epanọ a rẹ rọ kẹ Ọnowo na. Keme ọzae họ ọnọ o wo uzou aye wọhọ epanọ Kristi o wo uzou” ukoko na. (Ẹf. 5:22, 23) Setan ọ viẹ Ivi họ roro nnọ o ti wo evawere nọ e rẹ tọ otẹrọnọ ọ ghẹmeeyo kẹ Ọghẹnẹ. O rrọ vevẹ, ẹzi ọ ohwo ọ rẹ ta onọ me re ru kẹ omẹ hẹ o rrọ erọo buobu nẹnẹ. Rekọ eyae nọ e be dhozọ Ọghẹnẹ a riẹ inọ re a roma kpotọ kẹ ezae rai o rrọ ziezi. A be kareghẹhọ inọ Jihova ọ ma Ivi re ọ jọ “ofiobọhọ” kẹ ọzae riẹ, ọkwa nọ Ọghẹnẹ o rri ghaghae. (Emu. 2:18) Aye nọ ọ rrọ Oleleikristi nọ ọ be roma kpotọ kẹ ọruẹrẹfihotọ yena ọ ginẹ rrọ “etu-uvie” kẹ ọzae riẹ.—Itẹ 12:4.
11. Eme oniọvo jọ ọ ta nnọ o fi obọ họ kẹ orọo riẹ?
11 Oware ọfa nọ o re ru nọ Ọghẹnẹ ọ rẹ rọ jọ orọo họ ọzae avọ aye na a re wuhrẹ Ẹme Ọghẹnẹ kugbe. Gerald, ọnọ ọ reawere orọo te ikpe 55 (udhuvẹ gbe ikpegbisoi) no ọ ta nọ: “Oware nọ o rẹ mae lẹliẹ evawere jọ orọo họ Ebaibol nọ a re se je wuhrẹ kugbe.” O fibae nọ, “Ọzae avọ aye a te bi ru eware kugbe, maero kọ eware abọ-ẹzi, u re si ai imava na kẹle ohwohwo jẹ kẹle Jihova.” Ebaibol nọ a re wuhrẹ kugbe u re fi obọ họ kẹ uviuwou kareghẹhọ itee Jihova ẹsikpobi, lẹliẹ usu rai kugbe Jihova ga, jẹ lẹliẹ ai wo ẹnyaharo.
12, 13. (a) Fikieme olẹ nọ ezae avọ eyae a rẹ lẹ kugbe u je wuzou gaga? (b) Eware efa vẹ i re ru orọo ga?
12 Ezae avọ eyae nọ e be wereva evaọ orọo rai a rẹ jẹ lẹ kugbe. Nọ ọzae o te bi ‘rovie eva riẹ’ evaọ olẹ be yare ugogo eware nọ i kiekpahe uyero rai, onana o rẹ lẹliẹ orọo rai jọ gaga. (Ol. 62:8) Wọhọ oriruo, dai roro epanọ o rẹ lọhọ te re ọzae avọ aye a ku ẹwhọ rai họ nọ a tẹ lẹ se Erumeru na no kẹ obufihọ! (Mat. 6:14, 15) Nọ a tẹ lẹ kugbe no, u re fo re ọzae avọ aye na a gbaemu inọ a re fi obọ họ kẹ ohwohwo a ve je ‘thihakọ kẹ ohwohwo jẹ rọ vrẹ ohwohwo.’ (Kọl. 3:13) Kareghẹhọ inọ olẹ u re dhesẹ eva nọ ohwo o fihọ Ọghẹnẹ. Devidi Ovie na ọ ta nọ: ‘Whẹ ahwo kpobi a rẹriẹ ovao ku.’ (Ol. 145:15) Nọ ma tẹ jọ olẹ rẹriẹ ovao ku Ọghẹnẹ, koyehọ ma te fievahọ nnọ o ti ru ẹgwọlọ mai kẹ omai, ma gbẹ te ruawa hrọ họ, keme ma riẹ inọ ‘ọ be sẹro mai.’—1 Pita 5:7.
13 Ugogo edhere ọfa nọ Jihova ọ rẹ rọ jọ orọo mai họ ma re kpohọ iwuhrẹ ukoko kugbe jẹ jọ usu evaọ usiuwoma ota. Ezae avọ eyae a rẹ jọ evaọ iwuhrẹ mai wuhrẹ epanọ a re ro mugba kẹ “ereghẹ” Setan nọ ọ be rọ gwọlọ hẹriẹ iviuwou. (Ẹf. 6:11) Yọ ọzae avọ aye a tẹ be jọ usu ẹsikpobi evaọ usiuwoma ota u re fi obọ họ kẹ ae “dikihẹ whawha.”—1 Kọr. 15:58.
Okenọ Ebẹbẹ E tẹ Roma Via
14. Eware vẹ e rẹ sae wha ẹbẹbẹ fihọ orọo?
14 O ginẹ rrọ uzẹme inọ eme nọ ma jọ obehru ta na e rrọ eme ekpokpọ họ, rekọ u gbe fo re wha rehọ ai jiroro kugbe? Dai rri sọ whọ rẹ sai ru inwene jọ nọ who re ro fi iroro-ejẹ jọ nọ ma fodẹ na họ iruo vọvọ. Rekọ Ebaibol na e ta inọ makọ enọ Ọghẹnẹ ọ rrọ orọo rai a ti “wo ukpokpoma.” (1 Kọr. 7:28) Fiki ọ sebaẹgba, ekpehre ẹzi nọ ọ rrọ akpọ omuomu nana, gbe egbefẹ Ẹdhọ, makọ uvi idibo Ọghẹnẹ a bi wo ebẹbẹ evaọ erọo rai. (2 Kọr. 2:11) Rekọ Jihova ọ be kẹ omai ẹgba nọ ma re ro thihakọ ebẹbẹ yena. Ẹhẹ, ma rẹ sai thihakọ rai. Emọ nọ Job o yẹ gbe idibo riẹ i whu, a te je tho ithuru erao riẹ kpobi. Ghele na Ebaibol e ta nnọ: “Evaọ eware enana kpobi Job ọ thọ uzi hi hayo ọ fuọ Ọghẹnẹ nọ o ru thọ họ.”—Job 1:13-22.
15. Eme ofu o rẹ sae lẹliẹ ohwo ru, kọ eme erivẹ-orọo a rẹ sai ru evaọ otọ uyero otiọye?
15 Evaọ abọdekọ riẹ, aye Job ọ ta kẹe nnọ: “Kọ who gbe kru orọwọ ra whawha enẹna? La Ọghẹnẹ eka re who whu.” (Job 2:9) Evaọ uzẹme, nọ eware egaga i te ru ohwo, awaọruọ nọ u re no ai ze e rẹ lẹliẹ ohwo roro thọ. Ọzae owareghẹ na ọ ta nọ: “Okienyẹ o re ru ohwo nọ owareghẹ ghẹhọ.” (Ọtausi. 7:7) Otẹrọnọ ọrivẹ-orọo ra ọ be rehọ eme fa owhẹ ovao fiki ọbẹwẹ hayo “okienyẹ,” daoma r’udu kpotọ. Whọ tẹ rọ evedha kpahe ẹme kẹe, ọjọ evaọ usu rai hayo whai imava na wha te ta ẹme jọ nọ o ti ru ẹbẹbẹ na yoma viere. (Se Olezi 37:8.) Fikiere kpairoro vrẹ “eme aruọwha avọ ugheghẹ” nọ ohwo ọdekọ na ọ ta fiki ofu hayo idhọvẹ.—Job 6:3.
16. (a) Ẹvẹ eme ọ Jesu nọ e rrọ Matiu 7:1-5 i ro kiekpahe orọo? (b) Fikieme owowa nọ ma rẹ jọ u ro wuzou gaga evaọ orọo?
16 U fo re enọ e rọo no a riẹ inọ eware e rẹ sae thọ orivẹ-orọo rai obọ. Ọjọ ọ rẹ sae jọ oma ọdekọ ruẹ oghẹrẹ uruemu jọ o ve roro nọ, ‘Me ti nwene ei.’ Avọ uyoyou gbe odiri, whọ rẹ sai fi obọ họ kẹ ọrivẹ-orọo ra nwene ẹmẹrera. Rekọ jọ o thọrọ owhẹ ẹro ho inọ Jesu ọ rehọ ohwo nọ ọ rẹ tẹrovi omoyẹlẹ omọfa dhesẹ ohwo nọ ọ be jọ ubiẹro omoni riẹ ruẹ “orara” rekọ o bi muẹrohọ ‘ubro-ure’ nọ ọ rrọ ubiẹro ọye omariẹ hẹ. Jesu ọ ta kẹ omai nọ: “Wha gu ahwo ho, re a se owhai ba eguo.” (Se Matiu 7:1-5.) Orọnikọ onana u dhesẹ nnọ a re gbolo aro kẹ iruthọ ilogbo ho. Robert, ọnọ ọ rọo te enwenọ ikpe 40 (udhuvẹ) no ọ ta nọ: “Enọ e rọo no a te bi rovie eva kẹ ohwohwo jẹ rọwo oware nọ ọrivẹ-orọo rai o muẹrohọ evaọ oma rai, o rẹ whai ze nọ a re ro ru inwene evaọ uzuazọ rai.” Fikiere jọ owowa. Ukpenọ who muofu fikinọ whọ be jọ oma ọrivẹ-orọo ra ruẹ uruemu nọ whọ gwọlọ họ, daoma re emamọ uruemu nọ o wo enẹna o d’owhẹ ẹro.—Ọtausi. 9:9.
17, 18. Nọ ebẹbẹ e tẹ rrọ buobu, diẹse ma sae jọ ruẹ obufihọ?
17 Ebẹbẹ e rẹ sae roma via nọ eware i te nwene. Ọzae avọ aye a rẹ sae rẹriẹ ovao ku ebẹbẹ nọ a te yẹ emọ. Okpẹyao ọ rẹ sai kie ọrivẹ-orọo hayo ọmọ. Esẹgbini nọ e kpako no a rẹ sae gwọlọ uvi ẹruorote. Emọ nọ i te ahwo no a rẹ sae kwa thethabọ no uwou. Re a rẹrote ewha-iruo evaọ ukoko na o rẹ sae wha inwene efa ze. Inwene nana kpobi e rẹ sae wha idhọvẹ gbe awaọruọ fihọ usu ọzae avọ aye.
18 Otẹrọnọ ẹbẹbẹ nọ ọ rrọ orọo rai u te owhai uvou no, eme wha rẹ sai ru? (Itẹ 24:10) Obọ o rrọ owhẹ hẹ! Oware nọ o rẹ mae were Setan kpobi họ re odibo Ọghẹnẹ jọ o kiukeku egagọ uzẹme. O rẹ tubẹ were iẹe viere otẹrọnọ ọzae avọ aye a kiukeku egagọ uzẹme. Fikiere, dawo ẹgba ra kpobi re whọ ruẹ nnọ orọo rai ọ gbẹ rrọ ufi nọ a thahe akuasa. Ebaibol na o gbiku ahwo buobu nọ i kru ẹrọwọ rai ghelọ ebẹbẹ ilogbo. Wọhọ oriruo, okejọ o jariẹ nọ Devidi o bo se Jihova, ta nọ: “E Ọghẹnẹ, re ohrọ mẹ, keme ahwo a bi thihi omẹ yawo otọ.” (Ol. 56:1) Kọ o be hae jọ owhẹ oma ẹsejọ wọhọ ẹsenọ “ahwo” a bi thihi owhẹ yawo otọ? O tẹ make rọnọ ẹbẹbẹ nọ o bi t’owhẹ na o bi no ohwo ugbothabọ jọ ze hayo ohwo jọ nọ ọ kẹle owhẹ oma, kareghẹhọ inọ Devidi ọ sai thihakọ, yọ whọ rẹ sai thihakọ re. Devidi ọ ta nọ: “Mẹ gwọlọ ỌNOWO, ọ tẹ kẹ omẹ uyo, o te si omẹ no ozọodhẹ mẹ kpobi.”—Ol. 34:4.
Eghale Efa
19. Ẹvẹ ma rẹ sae rọ kpọ idabolo Setan no oma?
19 Evaọ oke urere nana, u fo re ezae avọ eyae “ohwo ọ hẹ wha ohwo udu, ohwo ọ kpare ohwo.” (1 Tẹs. 5:11) Jọ o thọrọ owhẹ ẹro ho inọ Setan ọ ta nnọ fiki eware nọ Jihova o bi ru kẹ omai ma bi ro yoẹme kẹe. Ọ te dawo edhere kpobi rọ raha ẹgbakiete mai, te ozighi nọ ọ rẹ wha fihọ orọo. Re ma sae kpọ idabolo Setan no oma, u fo nnọ ma re fi eva kpobi họ Jihova. (Itẹ 3:5, 6) Pọl o kere nọ: “Mẹ rẹ sai ru eware kpobi eva ọnọ ọbe kẹ omẹ eri.”—Fil. 4:13.
20. Eghale vẹ i re te omai nọ Ọghẹnẹ ọ tẹ rrọ orọo mai?
20 Eghale nọ i re te omai nọ Ọghẹnẹ ọ tẹ rrọ orọo mai i re buobu. A rẹ sae ruẹ uzẹme ẹme nana evaọ oma Joel avọ aye riẹ nọ a rọo te ikpe 51 (udhuvẹ gbe ikpegbọvo) no. Ọ ta nọ: “Me re yere Jihova ẹsikpobi kẹ aye mẹ gbe orọo evawere mai. Uvi aye ọ rrọ.” Eme o bi fi obọ họ kẹ ai? Ọzae na ọ ta nọ: “Ma be hae daoma ẹsikpobi dhesẹ ẹwo, odiri, gbe uyoyou kẹ ohwohwo.” Uvumọ ohwo nọ ọ rẹ sai ru ere gbagba evaọ uyerakpọ nana ọ rrọ họ. Ghele na, joma daoma fi ehri-izi Ebaibol họ iruo je ru re Jihova ọ jọ orọo mai. Ma te ru ere, orọo mai o vẹ te jọ wọhọ “ufi nọ a thahe akuasa [nọ] o rẹ kake sawo ho.”—Ọtausi. 4:12.
Kọ Whọ Kareghẹhọ?
• Eme u dhesẹ re Jihova ọ jọ orọo?
• Eme ọzae avọ aye a re ru nọ ebẹbẹ e tẹ roma via?
• Ẹvẹ ma rẹ rọ riẹ sọ Ọghẹnẹ ọ rrọ evaọ orọo?
[Iwoho nọ e rrọ ẹwẹ-obe avọ 18]
Ọzae avọ aye a tẹ be lẹ kugbe u re fi obọ họ kẹ ai ku ebẹbẹ họ