Rehọ “Evaọvo gbe Iroro Evo” Gọ Ọghẹnẹ
AHWO Ju gbe enọ i kurẹriẹ ruọ egagọ Ju a su wariẹ ilele Jesu Kristi họ. O jọ etoke Ehaa Pẹntikọst, yọ ahwo nana a no ugbobọ Rom gbe Pathia ziọ Jerusalẹm. Ahwo a jẹ ta evẹrẹ sa-sa evaọ udevie ogbotu na. Ghele na, ilele Jesu nọ i je lele ai t’ẹme na yọ ahwo Galili. Avọ igbunu ahwo na jọ a tẹ nọ inọ: “Kẹvẹ mai kohwo kohwo a jẹ rọ unu rai yo ọvuọ ẹvẹrẹ obọ riẹ?”—Iruẹru 2:8.
Pita ukọ na ọ tẹ kpama o te dhesẹ oware nọ a be sae rọ jẹ evẹrẹ sa-sa na kẹ ai vevẹ. Ogbotu na a tẹ nwane jẹ ovuẹ rai rehọ. Ahwo idu buobu e họ-ame ẹdẹ ọyena! (Iruẹru 2:41) Dede nọ ukoko na u je dhe ẹruẹro, okugbe ọ jariẹ. Luk o kere nọ: “Otu obuobu rai nọ ọ rọwo kpobi a jọ evaọvo gbe iroro evo.”—Iruẹru 4:32.
Idu ahwo buobu nọ e họ-ame evaọ ẹdẹ Pẹntikọst ọrọ ukpe 33 C.E. na a gwọlọ daji Jerusalẹm re a gbe wuhrẹ kpahe egagọ ọkpokpọ rai na. Rekọ a roro nnọ a te rria kri hi. Fikiere, ahwo a te muọ igho họ ẹzọhọ. Inievo na jọ a tẹ rọ udu obọ rai zẹ ekwakwa rai a tẹ rehọ igho na se ikọ na re a rehọ ai ro fi obọ họ kẹ enọ e gwọlọ obufihọ. (Iruẹru 2:42-47) Uyoyou gbe ọghọ-oruo nọ inievo nana a dhesẹ a rẹ ruẹ obọ riẹ hẹ!
N’otọ avọ otọ ze uvi Ileleikristi a ro wo ẹzi uyoyou gbe ọghọ-oruo otiọye na. Nẹnẹ, ukoko Ileleikristi na o gbẹ be rehọ “evaọvo gbe iroro evo” gọ Jihova. Oleleikristi kpobi ọ be rọ unevaze siobọno oke riẹ, ẹgba, gbe igho ro whowho emamọ usi na jẹ wha isiuru Uvie Ọghẹnẹ haro.—Rri ẹkpẹti na “Idhere nọ Otujọ A Bi ro Ru Azọhọ Unevaze.”
[Ẹkpẹti nọ e rrọ ẹwẹ-obe avọ 6, 7]
“IDHERE NỌ OTUJỌ A BI RO RU AZỌHỌ UNEVAZE”
AZỌHỌ UNEVAZE KẸ IRUO AKPỌ-SOSO
Ahwo buobu a wo omaa unuigho jọ nọ a re ro ru azọhọ unevaze fihọ ẹkpẹti nọ a kpoka họ nnọ “Iruo Akpọ-Soso.”
Kamara kamara ikoko i re vi igho nọ a jọ ekpẹti nana ruẹ se uwou ogha Isẹri Jihova nọ ọ rrọ orẹwho rai. Ohwo ọ rẹ sai je vi azọhọ unevaze ovavo ro se uwou ogha Isẹri Jihova nọ ọ rrọ orẹwho rai. Ohwo nọ o bi vi echẹke o re kere fihọ iẹe inọ a hwa ugho na kẹ “Watch Tower.” A rẹ sae jẹ zọhọ ifiare hayo oghẹrẹ eware eghaghae itieye na efa. Ohwo nọ ọ zọhọ eware itieye na o re kere obe-ovuẹ okpẹkpẹe lele eware itieye na onọ u re dhesẹ inọ onana yọ ẹkẹ unevaze riẹ.
IDHERE SA-SA NỌ A SAI RO RU AZỌHỌ UNEVAZE
U te no ugho nọ a re ro ru azọhọ unevaze no, idhere efa e riẹ nọ a re ro ru azọhọ unevaze nọ a rẹ rọ wha iruo Uvie na haro evaọ akpọ-soso. Usu rai họ:
Insurance [Azọhọ kẹ Okpẹtu Idudhe]: Ahwo jọ a rẹ hwa igho fihọ ekọmpene Ishọranse n’oke t’oke re a te whu ekọmpene na e vẹ hwa unuigho nọ a ta mu kẹ ohwo nọ a kere nọ a hwa igho na kẹ. Ahwo jọ a rẹ sai kere inọ a hwa igho na kẹ Watch Tower. Amọfa a rẹ sai je kere inọ a hwa igho arutẹriọ rai kẹ Watch Tower.
Igho nọ A Fihọ Ebanke: Ahwo jọ a re kere inọ a te whu a hwa igho jọ nọ a wo fihọ ebanke hayo erere nọ o bi no igho rai jọ ze kẹ Watch Tower.
Shares, Debentures Stocks, and Bonds: Ahwo jọ a rẹ jẹ igho fihọ ebanke, ekọmpene, hayo iruẹru egọmeti jọ nọ ebanke hayo ekọmpene itieye a re kugbe rọ thueki rai, a ve kere inọ a hwa erere nọ o ti te ai kẹ Watch Tower.
Etọ Hayo Iwou: A rẹ sae zọhọ etọ hayo iwou nọ a rẹ sae zẹ; kpahe otọ nọ a bọ iwou fihọ no, ohwo ọ rẹ sae rehọ iwou na ru azọhọ kẹ ukoko na ọ vẹ nya siọ ofẹ nọ ọ gwọlọ rria ba bẹsenọ o re whu, o je whu no a vẹ rehọ uwou nọ ọ jẹ rria na kugbe. Re whọ tẹ te whobọhọ obe jọ inọ whọ gwọlọ rehọ uwou hayo otọ ra jọ ru azọhọ kẹ iruo akpọ-soso na, whọ rẹ jọ uwou ogha riẹ tao.
Obe Uku-Oghale gbe Oware nọ A rọ Kẹ Ohwo Kru: Ohwo ọ rẹ sai kere inọ o te whu no a rehọ igho hayo ekwakwa riẹ jọ kẹ Watch Tower.
Ẹme na “idhere sa-sa nọ a sai ro ru azọhọ unevaze” u dhesẹ inọ oghẹrẹ azọhọ unevaze itienana o gwọlọ nnọ ohwo o re roro ei te.
Rọkẹ evuẹ efa, whọ rẹ sae rehọ adrẹse nọ ọ rrọ obotọ na kere se Uwou Ogha Isẹri Jihova nọ ọ rrọ Nigeria hayo whọ rẹ sae rehọ ifonu lele ai t’ẹme hayo whọ rẹ sai kere se uwou ogha nọ o rrọ orẹwho ra.
Jehovah’s Witnesses
P.M.B. 1090,
Benin City 300001,
Edo State, Nigeria.
Telephone: (052) 202020