‘Joma Le Eware nọ E rẹ Wha Udhedhẹ Tha’

EDHERE nọ a ru obọ o rẹ jọ gaga evaọ ẹro ahwo, o rẹ jọ wọhọ ẹsenọ oware ovo o sae raha iẹe he. Rekọ nọ oke o be nya na, o ve ti muhọ ẹva, a vẹ te jariẹ mu egọdọ họ ẹruẹ. A rẹ ruẹrẹ edhere na ogbẹrọ ere he ahwo a vẹ te jariẹ wo asidẹnte, edhere na o vẹ te jẹ raha muotọ.

Epọvo na re, o rẹ sai wo ẹsejọ nọ ma re wo ẹbẹbẹ kugbe amọfa. Pọl ukọ na o muẹrohọ inọ Ileleikristi nọ e jọ obọ Rom a wo ọvuọ iroro riẹ. Ọ hrẹ ibe eg’Ọghẹnẹ nọ: ‘Joma le eware nọ e rẹ wha udhedhẹ tha’ gbe eware nọ e rẹ bọ ohwohwo ga. (Rom 14:13, 19) Fikieme u je fo re ma ‘le eware nọ e rẹ wha udhedhẹ tha’? Kọ ẹvẹ ma sae rọ daoma gwọlọ udhedhẹ?

Fikieme Ma je Le Udhedhẹ?

A gbẹ ruẹrẹ oria nọ ọ jọ edhere va ha o rẹ sai zihe ruọ ọgọdọ ologbo. A gbẹ kaki ku ẹwhọ họ họ o rẹ sai su kpohọ ẹbẹbẹ ologbo. Jọn ukọ na o kere nọ: “Re ohwo jọ ọtẹta nọ, ‘Me you Ọghẹnẹ’, o te mukpahe omoni riẹ, ọyena họ ọterue, keme ọnọ o you omoni riẹ hẹ, ọnọ ọ rẹ ruẹ, ọsai you Ọghẹnẹ hẹ, ọnọ ọ rẹ ruẹ hẹ.” (1 Jọn 4:20) Ileleikristi ivẹ a gbe ku ẹwhọ nọ ọ rrọ udevie rai họ họ o rẹ sae lẹliẹ ọjọ mukpahe omoni riẹ.

Jesu Kristi ọ ta inọ Jihova ọ rẹ jẹ egagọ mai rehọ họ otẹrọnọ ma gbẹ ruẹrẹhọ kugbe amọfa ha. Jesu ọ hrẹ ilele riẹ nọ: “Fikiere whọ tẹ be kẹ okẹ ra evaọ aruẹri, etẹe who je roro nọ whẹ avọ omoni ra wha wo ẹme, siọ okẹ ra ba obọ aruẹri na tao, nyavrẹ, kake ruẹrẹ omoni ra họ, kẹsena whọ tẹ nyatha te kẹ okẹ ra.” (Mat. 5:23, 24) Ẹhẹ, ugogo oware nọ o rẹ lẹliẹ omai le udhedhẹ họ ma gwọlọ ru Jihova Ọghẹnẹ eva were.a

Ẹbẹbẹ jọ nọ o jọ ukoko obọ Filipai u dhesẹ ẹjiroro ọfa nọ ma re ro le udhedhẹ. Ẹbẹbẹ jọ nọ a fodẹ hẹ onọ o jọ udevie inievo-emetẹ ivẹ, Yodia avọ Sintiki, o jẹ te wha ozighi fihọ ukoko na soso. (Fil. 4:2, 3) Otẹrọnọ imava a gbe ku ẹwhọ nọ o rrọ udevie rai họ họ, amọfa a rẹ te riẹ kpahe iẹe. Ma tẹ gwọlọ yọrọ udhedhẹ gbe okugbe nọ o rrọ ukoko na, kiyọ ma rẹ rria dhedhẹ kugbe ibe eg’Ọghẹnẹ.

Jesu ọ ta nọ: “Ahwo nọ a rẹ ruẹrẹ ahwo họ eva e were ae.” (Mat. 5:9) Eva e rẹ were omai nọ ma tẹ be rria dhedhẹ kugbe amọfa. Ofariẹ, udhedhẹ o rẹ lẹliẹ ohwo wo omokpokpọ, keme “udu udhedhẹ o rẹ kẹ iwo uzuazọ.” (Itẹ 14:30) Evaọ abọdekọ riẹ, ẹgo nọ a re fihọ eva o rẹ wha ẹyao se ohwo.

Dede nọ Ileleikristi buobu a rẹ rọwo inọ u fo re a le udhedhẹ, o sae jọnọ o be jọ bẹbẹ k’owhẹ re who ku ẹwhọ họ. Joma t’ẹme kpahe ehri-izi Ebaibol nọ e rẹ sae kpọ omai.

Udu nọ A re ro Kpotọ t’Ẹme O rẹ Wha Udhedhẹ Ze

O lọhọ gaga re a ruẹrẹ oria nọ o va evaọ edhere. Kọ ma rẹ sae rọ vrẹ inievo mai jẹ kpairoro vrẹ eware esese nọ a ru omai thọ? Owojẹ nana o rẹ sai fi obọ họ kẹ omai ku ebẹbẹ buobu họ, keme Pita ukọ na o kere inọ “uyoyou u re rurẹ eware iyoma ibuobu.”—1 Pita 4:8.

Rekọ, ẹsejọ ẹbẹbẹ o rẹ rro gaga te epanọ ma sae rọ kpairoro vrẹ riẹ hẹ. Roro kpahe oware nọ o via evaọ udevie emọ Izrẹl nọ a nwane ruọ Ẹkwotọ Eyaa na no. Taure “orua Rubẹn gbe Gad gbe abọvo Manase” a tẹ te fa Ethẹ Jọdan vrẹ, a bọ “agbada idhidhe nọ ọ jẹ ruaro gaga.” Erua Izrẹl edekọ a roro inọ a bọ agbada-idhe na rọkẹ ẹdhọgọ, fikiere o jọ oware nọ a rẹ kpairoro vrẹ hẹ. A tẹ wowọ ẹmo.—Jos. 22:9-12.

Ẹsejọhọ emọ Izrẹl jọ a roro inọ ẹme na o ri vevẹ, inọ fiki ẹdhọgọ a rọ bọ agbada-idhe na, fikiere a tẹ vẹruọ ai ahwo nọ a te jọ ofẹ rai whu a ti bu hu. Rekọ ukpenọ a rẹ rehọ ugidi ru ẹme na, erua Izrẹl nana a te vi ahwo re a kiotọ ẹme na mi inievo rai. Onọ nọ a nọ họ: “Didi udu wha wo kẹ Ọghẹnẹ Izrẹl, . . . nọ wha je kiukeku ỌNOWO na?” Uzẹme riẹ họ orọnikọ erua nọ e bọ agbada-idhe na a kiukeku Ọghẹnẹ hẹ. Rekọ didi ẹme a kpahe fihọ ota nana nọ a bọwo e rai na? Kọ a te kpahe ẹme ọgaga kẹ erua edekọ na hayo gbẹsọ gbuye họ ae oma? Erua na a rehọ unu kpotọ kpahe ẹme, ta vevẹ inọ fikinọ a gwọlọ gọ Jihova a rọ bọ agbada-idhe na. Uyo nọ a kpahe o lẹliẹ usu rai kugbe Ọghẹnẹ jọ ziezi u te je siwi uzuazọ ibuobu. A ku ẹbẹbẹ na họ, udhedhẹ o tẹ jẹ jọ udevie erua na fikinọ a keria r’udu kpotọ t’ẹme na.—Jos. 22:13-34.

Ukpenọ a wowọ ẹmo, avọ areghẹ emọ Izrẹl edekọ a se erua Rubẹn gbe Gad gbe abọvo orua Manasẹ ẹgwae, a te fi ẹme na h’otọ. Ebaibol e ta nọ: “Whọ kaki mu ofu hu, keme ofu ọ rẹ ruọ igbama ohwo ogheghẹ.” (Ọtausi. 7:9) Nọ ẹbẹbẹ ọ tẹ rrọ udevie imava, oghẹrẹ nọ Ebaibol e ta nnọ a re ro ku ei họ họ a rẹ keria r’udu kpotọ t’ẹme na. Kọ ma rẹ sai gine rẹro eghale Jihova otẹrọnọ ma wo ẹgo fihọ eva yọ ma nyabru ọnọ ma roro nọ o ru omai thọ họ?

Evaọ abọdekọ riẹ, eme ma re ru otẹrọnọ ibe Oleleikristi jọ ọ wha ẹbẹbẹ jọ bru omai ze, be tubẹ bọwo omai ota dede? Ebaibol e ta nọ: “Uyo olọlọhọ o rẹ whaha ofu.” (Itẹ 15:1) Erua Izrẹl nọ e bọ agbada-idhe na a r’unu kpotọ gu ẹme na fihọ otọ, a tẹ rrọ enẹ hrẹ ofu inievo rai. Otẹrọnọ mai ma nya bru oniọvo mai re ma ku ẹbẹbẹ jọ họ hayo ọye ọ nya bru omai ze, ma rẹ sae nọ oma mai nọ, ‘Oghẹrẹ vẹ mẹ te t’ẹme na nọ ma sai ro kugbe?’

Rehọ Ẹrọo na Ru Iruo Ziezi

Jihova ọ riẹ inọ ma rẹ gwọlọ ta oware nọ o be k’omai idhọvẹ via. Rekọ ma gbe ku ẹbẹbẹ nọ ma wo kugbe ohwo jọ họ họ, oma o te kpakpa omai re ma gu ẹme na kẹ omọfa. O lọhọ gaga re ma ta ẹme oyoma kpahe ohwo nọ ma wo ẹgo kpahe. Kpahe ẹrọo nọ a re ro ru iruo thọthọ, Itẹ 11:11 o ta nọ: “Ohwo omuomu ọ rẹ rehọ unu riẹ gele ẹwho kie.” Epọvo na re, ma rẹ sae raha udhedhẹ ukoko na otẹrọnọ ma be rehọ unu mai raha ibe Oleleikristi.

Orọnikọ re ma le udhedhẹ o nwani dhesẹ inọ ma rẹ gbẹ t’ẹme ọvo kpahe inievo mai hi hi. Pọl ukọ na ọ hrẹ ibe eg’Ọghẹnẹ nọ: “Wha jọ eme ogbẹta u no enu rai ze he.” Ukpoye, ọ tẹ ta nọ: “[Wha ta ẹme nọ] uwoma nọ o rẹ wha ohwo udu wọhọ epanọ u kiehọ . . . Wha rọ eva elọlọhọ lele ohwo ohwo yeri, ohwo ọ rọ vrẹ ohwo.” (Ẹf. 4:29-32) Otẹrọnọ oniọvo jọ nọ ọ be hae ta ẹme ezi ra anwẹdẹ vẹre ọ nyabru owhẹ ze fikinọ ẹme jọ nọ whọ ta hayo oware jọ nọ who ru o dha riẹ eva, kọ ogbẹrọnọ ẹsiẹ o rẹ lọhọ k’owhẹ re who wounu re wha gbẹ rria dhedhẹ? Fikiere, otẹrọnọ ma rẹ ta ẹme ezi kpahe ibe Ileleikristi mai ẹsikpobi, u re ru ei lọhọ re ma ku ẹbẹbẹ nọ o rrọ udevie mai họ.—Luk 6:31.

Joma “Rọ Evevo Gọ” Ọghẹnẹ

Mai ahwo-akpọ ma rẹ gwọlọ bru usu no ohwo nọ o ru omai thọ. Rekọ uruemu utioye na u woma ha. (Itẹ 18:1) Mai yọ inievo nọ i bi se odẹ Jihova, fikiere ma rẹ gbaemu inọ ma rẹ “rọ evevo gọ e.”—Zef. 3:9.

Ajọ uruemu hayo ẹmeunu uyoma orọ amọfa o lẹliẹ omai whrehe he evaọ egagọ uzẹme. Umutho edẹ jọ taure Jesu ọ tẹ te rehọ uzuazọ riẹ dheidhe gbe nọ ọ r’obọ k’otọ brukpe ikere-ebe na no, o te muẹrohọ aye-uku oyogbere jọ nọ ọ zọhọ “eyero riẹ kpobi” fihọ etehe okẹ na. Kọ Jesu ọ da riẹ obọ ji? Ukpoye, ọ ta ẹme ezi kpahe epanọ aye na ọ rọ tha ukoko Jihova nọ o jọ evaọ oke yena uke. (Luk 21:1-4) Dede nọ otu Farisi na a je ru ugberuo, o gba aye nana họ ghele inọ ọ rẹ thọ egagọ Jihova uke.

Ma tẹ maki roro nọ oniọvo jọ o ru oware jọ thọ hayo tube kienyẹ omai dede, eme ma re ru? Kọ ma te kẹ onana uvẹ re o whaha omai eva mai kpobi nọ ma rẹ rọ gọ Jihova? Hayo kọ ma te daoma ku ẹbẹbẹ nọ ọ rrọ udevie mai họ re ma ruẹse yọrọ udhedhẹ nọ o rrọ ukoko Ọghẹnẹ nẹnẹ?

Ikereakere na e hrẹ omai nọ: “Otẹ make bẹ, epa umutho nọ orọ owhai oma na, wha rehọ iẹe lele ahwo kpobi ria dhedhẹ.” (Rom 12:18) Joma gbaemu inọ ere ma re ru re ma ruẹse daji edhere nọ u bi su kpohọ uzuazọ na.

[Oruvẹ-obotọ]

[Uwoho nọ e rrọ ẹwẹ-obe avọ 17]

O gwọlọ mi Yodia avọ Sintiki re a le udhedhẹ

[Uwoho nọ e rrọ ẹwẹ-obe avọ 18]

Oghẹrẹ vẹ mẹ te t’ẹme na nọ ma sai ro kugbe?