Iwhori Ileleikristi—I re Wo Ọghọ, E rẹ Rro Ho, E vẹ jẹ Wha Orro se Ọghẹnẹ
AHWO na kpobi a rrọ uweri. Ahwo nọ a ku iwu ibiebi họ a be viẹ r’oma f’otọ. Otujọ a bi fi uzou kẹ ile nọ i bi kporo. Ghele na, amọfa a be riakpọ kuoma, be hwẹ je ru edo. Umutho ahwo jọ a rrọ otọ ghelie fikinọ a da bẹ no. Eme ahwo nana kpobi a rrọ etenẹ ru? Evaọ abọjọ akpọ na, nọ eware nọ whọ rẹ ruẹ evaọ oria nọ ahwo buobu a jo kokohọ bi kie ohwo nọ o whu.
Isẹri Jihova buobu a be rria ewho nọ imoni gbe erivẹ rai a rẹ jọ dhozọ enọ i whu no. Ima ahwo buobu a rọwo inọ okenọ ohwo o te whu no, o ve zihe ruọ ẹzi esemọ nọ ọ rẹ sai fi obọ họ kẹ enọ e rrọ uzuazọ hayo nwae oma. Orọwọ nana o rrọ emu eware buobu nọ ahwo a be jọ uwhori ru. Orọnikọ o thọ họ re a viẹ ohwo nọ o whu. Jesu avọ ilele riẹ a viẹ okenọ ahwo nọ a you a whu. (Jọn 11:33-35, 38; Iruẹru 8:2; 9:39) Ghele na, uweri rai o jọ wọhọ oghẹrẹ nọ ahwo oke rai a je weri hi. (Luk 23:27, 28; 1 Tẹs. 4:13) Fikieme? Oware jọ nọ o soriẹ ze họ a wo otoriẹ oware nọ uwhu o ginẹ rrọ.
Ebaibol e ta vevẹ nọ: “Enọ e rọ uzuazọ a riẹ nọ a reti whuẹ, rekọ iwhuowhu e riẹ oware ovo ho . . . Uyoyou gbe egrẹ gbe ihrieriọ kpobi i whu no . . . Iruo hayo iroro hayo eriariẹ hayo areghẹ e rọ eva ẹri hi [uki na], obonọ who bi kpohọ na.” (Ọtausi. 9:5, 6, 10) Eme ọ Ebaibol nana i dhesẹ vevẹ inọ okenọ ohwo o te whu no, ọ gbẹ riẹ onahona ha. Ọ rẹ sai roro ho, ta ẹme he, wo otoriẹ oware ovo ho, yọ oware o rẹ dae he. Ẹvẹ ewo otoriẹ uzẹme Ebaibol nana nọ u wuzou gaga na u re kpomahọ oghẹrẹ nọ Oleleikristi o re ru uwhori?
‘Wha rọ Obọ te Oware Ugbegbe Ovo Ho’
Makọ oria nọ Isẹri Jihova a no ze kpobi kẹhẹ, a rẹ whaha uruemu kpobi nọ u re dhesẹ inọ enọ i whu no a gbẹ rrọ uzuazọ evaọ oria jọ gbe nnọ a rẹ sai fi obọ họ kẹ enọ e rrọ uzuazọ hayo nwae oma. Iruemu wọhọ otọ-rria, ehaa-igbe, ẹkareghẹhọ enọ i whu no, idhe nọ a re dhe kẹ enọ i whu no, gbe eware nọ aye o re ru okenọ ọzae riẹ o te whu, enana kpobi e rrọ gbegbe yọ e rẹ dha Ọghẹnẹ eva keme e wọso Ikereakere na je w’obọ kugbe iwuhrẹ idhivẹri inọ ẹwẹ hayo ẹzi na o re whu hu. (Izik. 18:4) Uvi Ileleikristi a rẹ “jọ emẹjẹ Ọnowo na avọ emẹjẹ izi igbegbe re emu hu,” fikiere a re duomahọ iruemu itieye na ha. (1 Kọr. 10:21) A rẹ kezọ kẹ ujaje na: “Hẹriẹ oma no ai no, . . . wha rọ obọ te oware [ugbegbe] ovo ho.” (2 Kọr. 6:17) Rekọ o lọhọ tere he re ohwo o ru ere.
Evaọ Africa gbe eria efa jọ, ahwo buobu a rọwo inọ a gbe ru eware jọ họ, eva e te dha ẹzi esemọ na. A rọwo inọ a gbe ru eware itieye na ha, oware uyoma o rẹ sae via evaọ ẹwho na. Fikinọ a se inọ a re wo obọ evaọ iruemu uwhori nọ e wọso Ikereakere na, ahwo a wọviẹ ahwo Jihova buobu no, ewho jọ a mu rai imuẹwho no, yọ imoni rai a le rai n’oma no. A rẹ ta nnọ a re lele ahwo ru onọ a bi ru hu gbe nnọ a bi rri ọnọ o whu no na vo. Evaọ ẹsejọ, enọ e rrọ ukoko ho a rẹ rehọ ọgbahọ nyaze inọ ae ọvo a re ru uwhori Oleleikristi nọ o whu na. Fikiere otẹrọnọ ahwo jọ a bi sikẹ gaga inọ a rẹ jọ uwhori na ru eware nọ e rẹ dha Ọghẹnẹ eva, eme ma re ru nọ ma gbe lele ai whọ họ? Mai tube wuzou, eme ma rẹ sai ru re ma kẹnoma kẹ eware etọtọ nọ a rẹ jọ uwhori ru nọ e rẹ sae raha usu mai kugbe Jihova?
Ru Edikihẹ Ra Vevẹ
Evaọ abọjọ akpọ na, imoni hayo ekpako ẹwho na họ enọ e rẹ ta oghẹrẹ nọ a re ro kie ohwo nọ o whu. Fikiere Oleleikristi nọ ọ kpako evaọ iroro o re ru ei vevẹ inọ Isẹri Jihova họ enọ i ti kie ohwo na nya lele epanọ Ebaibol e ta. (2 Kọr. 6:14-16) U fo ho re eware nọ ma bi ru evaọ uwhori Oleleikristi u kpokpo iroro ibe Ileleikristi hayo zoruẹ amọfa enọ e riẹ eware nọ ma rọwo je bi wuhrẹ kpahe iwhuowhu.
A tẹ ta kẹ ohwo jọ evaọ ukoko na re ọ te kẹ ovuẹ uwhori, ekpako ukoko na a rẹ sae k’ohrẹ nọ o re fi obọ họ re ọruẹrẹfihotọ na kpobi e rọwo kugbe ehri-izi Ikereakere. Otẹrọnọ otujọ nọ e rrọ ukoko ho a gwọlọ rehọ iruemu etọtọ jọ ziọ uwhori na, ma re dikihẹ gaga jẹ rehọ aruọwha avọ oma adhẹẹ dhesẹ edikihẹ mai. (1 Pita 3:15) Rekọ ẹvẹ otẹrọnọ imoni ohwo nọ o whu na, enọ e rrọ ukoko ho, a bi gbe sikẹ inọ onọ o re rai eva na a re ru? Enọ e rrọ ukoko na a rẹ dhugbẹ jiroro inọ a re sioma no uwhori na. (1 Kọr. 10:20) O tẹ via ere, a rẹ sae kẹ ovuẹ uwhori eva Ọgwa Uvie nọ ọ rrọ okogho rai hayo evaọ oria ofa nọ u kiehọ re a sae rọ ‘omosasọ no Ikereakere na ze’ kẹ enọ i bi weri ọnọ o whu na. (Rom 15:4) O tẹ make rọnọ ori na ọ rrọ etẹe he, a rẹ kẹ ovuẹ na avọ ọghọ yọ onana u kiehọ. (Izie. 34:5, 6, 8) Uruemu nọ ahwo nọ a rrọ ukoko ho a bi dhesẹ o rẹ sai fiba uweri na, rekọ eva e rẹ sae were omai nọ ma tẹ riẹ inọ Ọghẹnẹ, ọnọ ọ rẹ kẹ “ogaga ulogbo nọ othesiwa” na, o bi muẹrohọ oma nọ ma be dawo re ma ruẹsi ru oware nọ u kiehọ.—2 Kọr. 4:7.
Kere Ẹgwọlọ Ra Fihotọ
Nọ ohwo o te kere fihotọ epanọ ọ gwọlọ nnọ a re ro kiei, ẹsiẹ o rẹ mae lọhọ re who lele ahwo uviuwou riẹ nọ e rrọ ukoko ho jiroro, keme a te gwọlọ ru lele epanọ ohwo nọ o whu no na o kere na. Oghẹrẹ nọ a re ro ru uwhori na, oria nọ a re jo ru ei, gbe ohwo nọ ọ rẹ jiroro epanọ a re ru eware yọ usu eware jọ nọ u fo nọ a re kere fihotọ. (Emu. 50:5) Eme nọ who kere fihọ obe nọ t’owhẹ te amọfa a whobọhọ oye a te mae rehọ. Ahwo nọ a re roro kpobaro a re du hẹrẹ re a kpako hayo re okpẹyao o kru rai tao re a tẹ j’owọ nana ha.—Itẹ 22:3; Ọtausi. 9:12.
O rẹ jọ ahwo jọ ẹkpẹlobọ re a kere eme itieye na fihotọ. Rekọ ere oruo u re dhesẹ inọ ohwo ọ kpako evaọ iroro gbe nnọ o wo ọdawẹ kẹ amọfa. (Fil. 2:4) O rẹ mai woma re ohwo ọ rehọ obọriẹ kere eme nana ukpenọ ọ rẹ nyase iroro-ejẹ itieye na ba kẹ ahwo uviuwou riẹ nọ e te jọ uweri, enọ a sae bẹbẹ họ re a ru eware nọ e jẹ hae dha ohwo nọ o whu no na eva.
Jọ Uwhori na O Rro Ho
Evaọ eria buobu erọ Africa, a wo iroro inọ a gbe ru uwhori na ruaro ho eva e te dha izi esemọ na. Amọfa jọ a rẹ rehọ iwhori dhesẹ epanọ a wo ugho te gbe epanọ a riẹ rai te. (1 Jọn 2:16) Ahwo a rẹ raha oke gbe igho buobu re a ruẹsi kie ohwo na evaọ edhere nọ a roro nọ u “wo ọghọ.” Re ahwo buobu a ruẹse riẹ kpahe uwhori na, a re fi ifoto ohwo nọ o whu na họ ebe a vẹ ta ebe na mu eria sa-sa. A re fi ifoto ohwo na họ iwu a vẹ ghale iwu na kẹ ahwo nọ a re fihọ evaọ ẹdẹ yena. A rẹ dẹ etehe-ori ọghaghae re a ro dhesẹ oma kẹ ahwo. Evaọ orẹwho Africa jọ, a re tube ku etehe-ori nọ o re tho omoto, arupre, okọ, gbe eware efa re a ro dhesẹ epanọ a fe te. A rẹ sae wọ ori na no etehe-ori na no fihọ ehru ehwa nọ a nabe ruẹrẹhọ ziezi. Aye o te whu, a re ku ewu ọfuafo nọ a re ro ru ehaa orọo họ iẹe, a ve ku ifiare họ iẹe, si ei isiaro. Kinọ eware nọ ahwo Ọghẹnẹ a re ru?
Ileleikristi nọ e kpako evaọ iroro a rẹ ruẹ inọ o rrọ oware areghẹ re a whaha iruemu nana nọ ahwo nọ a riẹ hayo enọ e be daezọ izi Ọghẹnẹ hẹ a re ru. Ma riẹ inọ iruemu ethọthọ itienana ‘i no obọ Ọghẹnẹ ze he rekọ obọ akpọ nọ o be vrẹ na u no ze.’ (1 Jọn 2:15-17) Ma rẹ yọroma gaga re ma whaha ekpehre ẹzi oma-uhrowo, onọ ma rẹ rọ gwọlọ ru vi amọfa. (Gal. 5:26) Eware nọ e be via i dhesẹ inọ ozodhẹ ọnọ o whu no o tẹ rrọ odode evaọ ẹwho, o rẹ lẹliẹ iwhori jọ ruaro o vẹ jẹ jọ bẹbẹ re a muẹrohọ eware nọ e be jọ uwhori na via, fikiere a je ti rri hi yọ eware e nya thọ no. Ọghọ nọ a re mu kẹ enọ i whu no o rẹ sae lẹliẹ oma mu ahwo nọ e rrọ ukoko ho te epanọ a re ro ru eware nọ i fo ho. Eva iwhori itieye na, ahwo a re kuenu oviẹ, kie gbalọ ori na, t’ẹme kẹe wọhọ ẹsenọ ọ gbẹ rrọ uzuazọ, a vẹ jẹ be hwae igho jẹ kẹe eware efa. Eware itienana e tẹ via evaọ uwhori Oleleikristi, o rẹ wha afuẹwẹ se odẹ Jihova je se ahwo riẹ.—1 Pita 1:14-16.
Nọ ma riẹ nnọ enọ i whu no na a riẹ onahona ha na, o rẹ k’omai udu whaha iruemu akpọ na evaọ uwhori. (Ẹf. 4:17-19) Dede nọ Jesu họ ọzae nọ ọ mae rro jẹ mae roja nọ ọ rria no, a ru eware ilogbo ho evaọ ukio riẹ. (Jọn 19:40-42) Ahwo nọ a wo “iroro Kristi” a re rri ukio utioye na wọhọ oware omovuọ họ. (1 Kọr. 2:16) Evaọ uzẹme, nọ ma gbe bi ru iwhori Ileleikristi rro ho yọ obọdẹ edhere nọ ma rẹ rọ whaha iruemu ethọthọ jẹ ruẹ inọ eware e nya kpatiẹ avọ ọghọ, i ve je fo kẹ enọ i you Ọghẹnẹ.
Kọ A Rẹ Jariẹ Ru Ehaa?
A te kie ohwo na no, o sae jọ uruemu ẹwho na re imoni, erivẹ, gbe amọfa a kokohọ buobu re a ru ehaa je gbile. A rẹ jọ ehaa itieye na da idi vrẹta je gb’ọfariẹ. Ahwo jọ a re roro inọ ehaa itieye na i re fi obọ họ si uweri uwhu na no ahwo oma. Amọfa a rẹ ta inọ ere a rẹ jọ ẹwho rai ru nọ a te bi kie ohwo. Rekọ ahwo buobu a rọwo inọ a rẹ rọ ehaa itieye na kẹ ọnọ o whu no na ọghọ je jiri ei, u ve je fi obọ họ kẹe ghọghọ kpo re ọ sai kuomagbe esẹ riẹ nọ i whu no.
Uvi Ileleikristi a ruẹ areghẹ nọ o rrọ uduotahawọ Ikereakere nana: “Uweri u woma vi ohwẹ, keme ovao-umuhọ uweri o rẹ kẹ udu evawere.” (Ọtausi. 7:3) Ofariẹ, a riẹ erere nọ o riẹ re ohwo o roro kpahe epanọ uzuazọ o kpẹre te gbe ẹruore ẹkparomatha. Evaọ uzẹme, rọkẹ enọ i wo emamọ usu kugbe Jihova, “ẹdẹ uwhu, o vi ẹdẹ eyẹ.” (Ọtausi. 7:1) Fikiere, nọ ma riẹ nnọ ehaa uwhori nọ a re ru u wo obọ kugbe iwuhrẹ idhivẹri gbe ọfariẹ-ogbe na, o thọ re uvi Ileleikristi a se ehaa itieye na hayo re a tube kuomagbe enọ i bi ru ai. Ma te kuomagbe enọ i bi ru eware itieye na u re dhesẹ nọ ma bi ri Ọghẹnẹ vo gbe nnọ ma be daezọ obroziẹ-iroro ibe eg’Ọghẹnẹ mai hi.
Ru re Amọfa A Ruẹ Ohẹriẹ Na
Eva e be were omai inọ ma be dhozọ enọ i whu no ho onọ o rrọ odode evaọ udevie enọ e rrọ ebi abọ-ẹzi! (Jọn 8:32) Wọhọ “emọ elo,” ma re weri wọhọ ahwo nọ Ọghẹnẹ o wuhrẹ no, uweri mai o rẹ ga hrọ họ fiki ẹruore ẹkparomatha na. (Ẹf. 5:8; Jọn 5:28, 29) Ẹruore otiọye na o re fi obọ họ k’omai nọ ma gbẹ nwane vọ avọ uweri hi, wọhọ “enọ i wo ẹruore he.” (1 Tẹs. 4:13) O rẹ k’omai udu nọ ma re ro ru oware nọ o rẹ were Ọghẹnẹ, ma gbe fi oma h’otọ họ fiki ozodhẹ ahwo.—1 Pita 3:13, 14.
Okenọ ma te bi ru oware nọ Ikereakere na e ta o rẹ lẹliẹ ahwo ruẹ ohẹriẹ nọ o rrọ udevie ‘enọ e be gọ Ọghẹnẹ gbe enọ e be gọ e he.’ (Mal. 3:18) Oke o be tha nọ uwhu o gbẹ te jọ họ. (Evia. 21:4) Nọ ma be hẹrẹ orugba eyaa yena na, ajọ Jihova ọ ruẹ omai inọ ma kare epe, kare afuẹwẹ, je si oma no akpọ omuomu nana riẹriẹriẹ avọ iruemu riẹ nọ e rẹ dha Ọghẹnẹ eva.—2 Pita 3:14.
[Uwoho nọ o rrọ ẹwẹ-obe avọ 30]
O rrọ oware areghẹ re ma kere oghẹrẹ nọ ma gwọlọ nọ a re ru uwhori mai fihotọ
[Uwoho nọ o rrọ ẹwẹ-obe avọ 31]
Iwhori Ileleikristi i re wo ọghọ yọ e rẹ rro ho