Enọ Ahwo nọ A s’Ebe

Ikereakere na e fodẹ “obe Jasha” gbe “obe ẹmo ỌNOWO na.” (Jos. 10:13; Ik. 21:14) Ebe ivẹ yena e rrọ Ebaibol na ha. Kọ enana yọ ebe nọ a rọ ẹzi Ọghẹnẹ kere nọ i vru no?

Ẹjiroro ọvuọvo ọ riẹ hẹ nọ ma rẹ rọ ta nnọ ẹzi Ọghẹnẹ a ro kere ebe ivẹ nana rekọ uwhremu na i te vru. Ebe efa e riẹ nọ ahwo nọ a kere Ebaibol na a fodẹ. O sae jọnọ usu ebe yena jọ e rrọ evaọ Ebaibol na rekọ ma rẹ sai vuhu ai nẹnẹ hẹ fiki edẹ nọ a ro se ai. Wọhọ oriruo, 1 Iruẹru-Ivie 29:29 o fodẹ ‘obe Samuẹle ọruẹ-ude na,’ ‘obe Netan ọruẹaro na,’ gbe ‘obe Gad ọruẹ-ude na.’ O sae jọnọ ebe nọ a wo h’iroro na họ obe Samuẹle ọsosuọ gbe ọrọ avivẹ, hayo obe Ibruoziẹ na.

Evaọ abọdekọ riẹ, o sae jọnọ edẹ nọ a ro se ebe na i tho ebe Ebaibol jọ, rekọ e nwane rrọ usu ebe nọ e rrọ Ebaibol na ha. Oriruo ebe itienana họ ebe ene anwae jọ nọ a fodẹ evaọ Ebaibol na: ‘obe Iruẹru Ivie Juda,’ “obe Ivie Juda gbe Izrẹl,” “obe Ivie Izrẹl,” gbe “obe Ivie Izrẹl gbe Juda.” Dede nọ o sae wọhọ ẹsenọ odẹ ebe yena e dina tho ebe Ebaibol nọ ma riẹ nẹnẹ wọhọ Ivie ọsosuọ gbe ọrọ avivẹ na, orọnikọ ẹgba ẹzi Ọghẹnẹ a ro kere ai hi, yọ ebe yena e rrọ evaọ Ebaibol ho. (1 Iv. 14:29; 2 Irv. 16:11; 20:34; 27:7) O wọhọ nọ enana yọ ebe ikuigbe nọ e jariẹ evaọ okenọ Jerimaya ọruẹaro na avọ Ẹzra a ro kere ebe rai nọ e rrọ Ebaibol nẹnẹ na.

Ẹhẹ, ahwo jọ nọ i kere Ebaibol na a dhunu te hayo se ebe itieye na enọ e jariẹ dede nọ Ọghẹnẹ o gie ẹwolo ku ai hi. Obe Ẹsta 10:2 o t’ẹme kpahe “obe iruẹru ivie Midia avọ Pasia.” Epọvo na re, okenọ Luk o je kere obe Usiuwoma riẹ “o lele eware na kpobi nọ emuhọ ze ẹrẹrẹe.” Ẹsejọhọ otọ ẹme riẹ na họ o se ebe nọ e jariẹ evaọ oke yena nọ o je kere kpahe uyẹ Jesu nọ ma rẹ sae jọ obe Usiuwoma riẹ se na. (Luk 1:3; 3:23-38) O tẹ make rọnọ ogaga ẹzi Ọghẹnẹ a ro kere ebe nọ Luk o se na ha, ogaga ẹzi Ọghẹnẹ o ro kere obe Usiuwoma riẹ na. Yọ obe Usiuwoma yena o rẹ sae k’omai erere nẹnẹ.

Kpahe ebe ivẹ nọ ma fodẹ evaọ onọ na—“obe Jasha” gbe “obe ẹmo ỌNOWO na”—o sae jọnọ yọ ebe nọ e jariẹ evaọ oke yena yọ orọnikọ ogaga ẹzi Ọghẹnẹ a ro kere ai hi. Fikiere Jihova o ru re a sẹro rai rite inẹnẹ hẹ. Ebe ivẹ nana nọ Ebaibol e fodẹ na o lẹliẹ egba-eriariẹ Ebaibol na jọ ta nnọ ebe ivẹ nana yọ eme eketa hayo ile nọ a kere kpahe emo nọ Izrẹl o lele ewegrẹ riẹ fi. (2 Sam. 1:17-27) Ofeme-ulogbo Ebaibol jọ o ta inọ o wọhọ nọ ebe nana yọ ile gbe eme-eketa nọ “egbile evaọ oke Izrẹl a rawo.” Makọ ahwo jọ nọ Ọghẹnẹ o ro ru iruo okejọ wọhọ eruẹaro a kere ebe efa u te no enọ Jihova ọ kẹ rai ẹgba kere no hayo enọ ọ kuvẹ hẹ re e jọ usu Ebaibol na, onọ o rrọ “erere rọ kẹ ewuhrẹ gbe ozọ-usio, avọ ọkpọvio gbe odhesẹkẹ eva ẹrẹreokie.”—2 Tim. 3:16; 2 Irv. 9:29; 12:15; 13:22.

Fikinọ a nwane fodẹ ebe jọ evaọ Ebaibol na gbe nnọ a rehọ eme jọ no ai ze okenọ a je kere Ebaibol na o nwani dhesẹ hẹ inọ ogaga ẹzi ọfuafo a ro kere ai. Dede na, Jihova Ọghẹnẹ ọ rawo ebe kpobi nọ e rrọ “ẹme Ọghẹnẹ mai,” yọ ebe nana e “rẹ jọ bẹdẹ bẹdẹ.” (Aiz. 40:8) Ẹhẹ, eware nọ Jihova ọ kẹ ahwo ẹgba kere fihọ ebe 66 erọ Ebaibol na họ eware nọ ma gwọlọ kpobi re ma sae “gba kiete, . . . jẹ thomavẹre kẹ iruo iwoma i ruo kpobi.”—2 Tim. 3:16, 17.