Si Kẹle Ọghẹnẹ
Jihova O Rri Omaurokpotọ Ghaghae
OMOYA, ihri-eriọ, okpiroro. Iruemu nana e dafia evaọ oma ahwo nọ a wo uvẹ-ọghọ hayo eware jọ tobọ evaọ akpọ na. Kọ who roro nọ iruemu itieye na e rẹ sae lẹliẹ omai wo emamọ usu kugbe Jihova Ọghẹnẹ? Dazigbe, Jihova o rri omaurokpotọ ghaghae evaọ oma idibo riẹ. Ma rẹ ruẹ onana vuhumu evaọ ikuigbe nọ e rrọ obe Ikelakele uzou avọ 12. Onana o via evaọ udhude Saena, nọ a nwani siwi emọ Izrẹl no Ijipti no.
Miriam avọ Erọn, inievo ekpako Mosis a jẹ “ta ẹme” oyoma kpahe Mosis oniọvo ọmaha rai. (Owọ 1) Ukpenọ a ta ẹme na kẹ Mosis omariẹ, a tẹ jẹ ta ẹme kpahe iẹe, ẹsejọhọ je gu ei nya evuẹ na wariẹ. Ẹsejọhọ, Miriam, nọ a kake fodẹ odẹ riẹ na họ ọnọ ọ kobaro evaọ iguẹgu na. Oware ọsosuọ nọ a jobọ kru nọ a jẹ rọ go họ, aye obọ Kush nọ Mosis ọ rehọ. Kọ o sae jọnọ Miriam ọ jẹ re-ihri, inọ ẹsejọhọ aye Mosis nọ ọ tubẹ rrọ ohwo Izrẹl he na o bi ti mi ei ẹta ọghọ nọ a jẹ rọ kẹe?
Eware efa e jarae eva re nọ e wha ẹgo na ze. Miriam avọ Erọn a jẹ ta nọ: “Kọ Mosis ọvo ỌNOWO na ọ rẹ ta eme kẹ? Kọ ọ gbẹ be ta ẹme kẹ omai re?” (Owọ avọ 2) Kọ o sae jọnọ isiuru ọkwa gbe okpodẹ họ eware nọ e wha ẹgo na ze?
Evaọ ikuigbe na, Mosis ọ kpahe ẹme fihọ ẹgo rai na ha. Ukpoye, o thihakọ emiẹsọ na. Unu nọ Mosis ọ kpọ họ na o kẹ imuẹro inọ oghẹrẹ nọ Ebaibol i dhesẹ i rie nọ o wo omaurokpotọ na ginọ uzẹme, ọ jọ “wowou, vi ahwo kpobi” nọ e jọ otọakpọ na.a (Owọ avọ 3) U du gwọlọ nọ Mosis ọ rẹ ta ẹkẹ-unu riẹ kẹ ae he. Jihova ọ jẹ gaviezọ, o dhomahọ ẹme na jẹ thothọ Mosis.
Jihova ọ rehọ e riẹ inọ ọyomariẹ a jẹ go kpahe na. Ginọ ere, keme ọye ọ rehọ Mosis mu. Nọ Ọghẹnẹ ọ jẹ whọku iguiguẹgu na, ọ kareghẹhọ ae inọ o wo usu oghẹrẹsa kugbe Mosis, ọ ta nọ: “Ọye me re lele ta ẹme.” Jihova ọ tẹ nọ Miriam avọ Erọn inọ: “Kọ fiki eme ozọ ẹme ọ ta kpahe Mosis . . . u gbe mu owhai hi?” (Owọ avọ 8) Ẹme nọ a ta kpahe Mosis na u dhesẹ nọ Ọghẹnẹ omariẹ a jẹ fo na. Ọghẹnẹ ọ te kẹ ae uye fiki orivo yena.
Ọghẹnẹ ọ rọ oti tehe Miriam, ọnọ o wọhọ nọ o mu ẹgo na họ. Erọn ọ tẹ lẹ Mosis inọ ọ lẹ Jihova kẹ Miriam. Whaọ, dai roro iei—Mosis nọ a ruthọ na ọye ọ rẹ lẹ Ọghẹnẹ re oti na ọ sai no Miriam oma. Avọ omaurokpotọ, Mosis o ru epanọ a yare riẹ na. Orọ ọsosuọ nọ Mosis ọ rọ ta ẹme evaọ oware nana họ okenọ ọ rọ lẹ Jihova re o siwi oniọvo riẹ. Oti na o no Miriam oma, rekọ ọ ruẹ uye omovuọ orọ edẹ ihrẹ nọ a ro si ei no evuẹ na.
Ikuigbe nana i fi obọ họ kẹ omai vuhu iruemu nọ Jihova o rri ghaghae gbe enọ e rẹ dhae eva. Ma tẹ gwọlọ sikẹle Ọghẹnẹ, o gwọlọ nọ ma rẹ whaha ẹzi omoya, ihri-eriọ, gbe isiuru-okpodẹ kpobi nọ e rrọ omai oma. Ahwo omaurokpotọ ọvo Jihova o re you. Ọ ya eyaa nọ: “Enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.”—Olezi 37:11; Jemis 4:6.
[Oruvẹ-obotọ]
a Ẹme Hibru nọ a fa “wowou” evaọ etenẹ na u wobọ kugbe omaurokpotọ, yọ okwakwa nana u re fi obọ họ kẹ ohwo thihakọ okienyẹ, nọ ọ gbẹ kioja kẹ omariẹ hẹ.