Kọ Who Dikihẹ Ga Evaọ Otọhotọ Na?
KỌ WHỌ ruẹ ure ulogbo nọ ofou ọgaga o bi fou no ẹdẹjọ? Ure na u re vieghe kpenẹ avọ enẹ, rekọ yọ o dikihẹ. Fikieme? Keme ọ dhẹ awọ kokodo kpohọ obotọ. Ma rẹ sae jọ wọhọ ure yena. Nọ ebẹbẹ i te zere omai evaọ uzuazọ, ma rẹ sai thihakọ otẹrọnọ ma dikihẹ ga evaọ otọhotọ na. (Ẹf. 3:14-17) Eme họ otọhotọ yena?
Ebaibol e ta nọ “Kristi Jesu omariẹ họ utho” nọ ọ rrọ otọhotọ ukoko Ileleikristi na. (Ẹf. 2:20; 1 Kọr. 3:11) A tuduhọ omai Ileleikristi awọ inọ ma ‘yeri uzuazọ mai wọhọ iẹ, re ma tawọ mu ei je dikihẹ eva riẹ re ẹrọwọ mai o ga.’ Ma te ru ere, ma ti kru ẹrọwọ mai nọ edawọ i te te omai, ahwo a tẹ be make gwọlọ rọ “eme ẹghẹ” viẹ omai họ.—Kọl. 2:4-8.
“Okẹkẹe, gbe Uthethei, [gbe] Ekpehru gbe Ekodo”
Rekọ ẹvẹ ma rẹ sae rọ ‘tawọ mu otọ’ re ma je ‘dikihẹ eva ẹrọwọ na’? Ẹme Ọghẹnẹ nọ ma re wuhrẹ ẹsikpobi yọ emamọ edhere jọ nọ ma re ro ru re awọ mai e tamu otọ ziezi. Jihova ọ gwọlọ nọ ma “lele erezi na riẹ epa okẹkẹe, gbe uthethei, [gbe] ekpehru gbe ekodo” uzẹme na. (Ẹf. 3:18) Fikiere u re te kẹ Oleleikristi hi re ọ riẹ ‘iwuhrẹ nọ e karo’ na ọvo, enọ e rrọ Ebaibol na. (Hib. 5:12; 6:1) Wo ohẹriẹ, o rẹ jọ omai kpobi oja re ma riẹ Ebaibol na kokodo.—Itẹ 2:1-5.
Orọnikọ re ma wo eriariẹ vọ uzou ọvo ma rẹ sai ro dikihẹ ga evaọ uzẹme na ha. Setan omariẹ ọ riẹ eme nọ e rrọ Ebaibol na. Oware ofa jọ o roja. U fo inọ ma riẹ “uyoyou Kristi, o nọ u vi eriariẹ kpobi.” (Ẹf. 3:19) Rekọ ma te bi wuhrẹ fikinọ ma you Jihova gbe uzẹme na, otoriẹ mai ọrọ Ebaibol na o ve ti kodo ziezi, ẹrọwọ mai o vẹ jọ gaga.—Kọl. 2:2.
Dawo Otoriẹ Ra
Kọ whọ gbẹ dawo otoriẹ ra ọrọ iwuhrẹ Ebaibol jọ? U ti ru owhẹ muẹrohọ otọ ziezi nọ who te bi ru ewuhrẹ Ebaibol omobọ ra. Wọhọ oriruo, se eme emuhọ ọrọ ileta nọ Pọl ukọ na o kere se ahwo Ẹfẹsọs. (Rri ẹkpẹti na “Ro Se Ahwo Ẹfẹsọs.”) Who te se oria Ebaibol yena no, nọ oma ra nọ, ‘Kọ me wo otoriẹ eme nọ a kere jẹlẹ nọ e rrọ ẹkpẹti na?’ Joma t’ẹme kpahe ae ọvuọvo.
A Rehọ Omai Mu ‘Taure A te ti Fi Otọhotọ Akpọ na Họ’
Pọl o kere se ibe eg’Ọghẹnẹ riẹ nọ: “[Ọghẹnẹ] ọ rehọ omai mu eva uyoyou re o ru omai emọ riẹ fiki Jesu Kristi.” Evaọ uzẹme, Jihova ọ jiroro inọ ọ rẹ dẹ ahwo-akpọ jọ re a zihe ruọ abọ uviuwou riẹ evaọ obọ odhiwu. A ve ti zihe ruọ ivie gbe izerẹ kugbe Kristi. (Rom 8:19-23; Evia. 5:9, 10) Okenọ ọ wọso esuo Jihova, Setan ọ ta inọ Ọghẹnẹ ọ ma ahwo-akpọ gba ha. Fikiere o nwani fo inọ Jihova ọ salọ ahwo-akpọ re a wo obọ kugbe eyoma kpobi nọ a re sino ehrugbakpọ na, a ve je si ehri emuemu na no, Setan Ẹdhọ na. Rekọ Jihova ọ salọ enọ e be te jọ emọ riẹ na kpahotọ họ. Ukpoye, Ọghẹnẹ ọ jiroro nọ ẹko ahwo jọ a ti lele Kristi su evaọ obọ odhiwu.—Evia. 14:3, 4.
“Akpọ” vẹ Pọl o wo họ iroro nọ o kere inọ a salọ ibe Ileleikristi riẹ ‘taure a te ti fi otọhotọ akpọ na họ’? Orọnikọ okenọ Ọghẹnẹ ọ re ma otọakpọ gbe ahwo-akpọ họ oye Pọl ọ be ta kpahe he. Otẹrọ ere kiyọ u dhesẹ uvi-ẹdhoguo ho. Ọghẹnẹ ọ hai brukpe Adamu avọ Ivi hi o hae jọnọ o jọ ẹjiroro riẹ inọ a ti ruthọ taure ọ tẹ te mae. Fikiere, oke vẹ Ọghẹnẹ ọ rọ jiroro epanọ o ti ro si uye nọ Adamu avọ Ivi a wha ze no okenọ a kuomagbe Setan wọso esuo Ọghẹnẹ? Jihova o ru ere okenọ ọsẹgboni ọsosuọ mai a ruthọ no, rekọ taure a te ti mu emọ họ eyẹ.
“Wọhọ Epanọ Ubu Aruoriwo Riẹ O Rọ”
Fikieme Pọl ọ rọ ta nnọ “ubu aruoriwo [Ọghẹnẹ]” oye u ru nọ Ọghẹnẹ ọ rọ jiroro nnọ o re ru eware nọ ọ fodẹ evaọ emuhọ obe Ahwo Ẹfẹsọs na? O rrọ ọgbahọ kẹ Jihova ha re ọ ta ahwo-akpọ no igbo.
Fiki uzioraha nọ ma reuku riẹ, ma te kẹ ẹtanigbo na ha. Rekọ fikinọ Jihova o wo uyoyou ulogbo kẹ ahwo-akpọ o te ru ọruẹrẹfihotọ ẹtanigbo na. Fiki sebaẹgba mai, ẹtanigbo na ginọ aruoriwo wọhọ epanọ Pọl ọ ta na.
Oware Udidi orọ Ẹjiroro Ọghẹnẹ
Ọghẹnẹ ọ kaki dhesẹ oghẹrẹ nọ o ti ro si uye nọ Setan ọ wha ze no ho. O jọ ‘oware udidi.’ (Ẹf. 3:4, 5) Uwhremu na nọ a rọ ukoko Ileleikristi na mu no, Jihova o te dhesẹ oghẹrẹ nọ o ti ro ru ẹjiroro nọ o wo kpahe otọakpọ na gbe ahwo-akpọ gba. Pọl o ru rie vẹ inọ: ‘Nọ oke u te no,’ Ọghẹnẹ o te mu “iroro riẹ nọ ọ ma fihọ” na họ erugba re ahwo-akpọ gbe ikọ-odhiwu a wo okugbe.
Jihova o mu onana họ eruo evaọ Pẹntikọst 33 C.E. okenọ o ro mu enọ i ti su kugbe Kristi họ ekokohọ. (Iruẹru 1:13-15; 2:1-4) Kẹsena u te te okenọ o re ro zizie enọ e te rria otọakpọ aparadase evaọ otọ esuo Uvie Mesaya na. (Evia. 7:14-17; 21:1-5) Ẹme na “iroro riẹ nọ ọ ma fihọ” orọnikọ u dhesẹ Uvie Mesaya na ha, keme Ọghẹnẹ ọ ma iroro yena fihọ no oke krẹkri taure a tẹ te rehọ Uvie na mu evaọ 1914. Ukpoye, ẹme na o dhesẹ oghẹrẹ nọ Ọghẹnẹ o bi ro ru oreva riẹ gba re okugbe o jọ odhiwu gbe akpọ.
“Wha Wo Iroro Wọhọ Ọkpako”
Ababọ avro, emamọ omaa ọrọ uwuhrẹ omobọ-ohwo o ti fi obọ họ kẹ owhẹ wo otoriẹ “okẹkẹe, gbe uthethei, [gbe] ekpehru gbe ekodo” ọrọ uzẹme na. Rekọ, uzuazọ ugigidi nọ ma bi yeri nẹnẹ u re ru ei lọhọ kẹ Setan re o ru omai siọ uwuhrẹ omobọ mai ba. Whọ kẹe uvẹ hẹ. Rehọ “otọoriẹ” nọ Ọghẹnẹ ọ kẹ owhẹ na “wo iroro wọhọ ọkpako.” (1 Jọn 5:20; 1 Kọr. 14:20) Ruẹ nọ who wo otoriẹ oware nọ o lẹliẹ owhẹ rọwo iwuhrẹ jọ gbe nnọ evaọ ẹsikpobi whọ rẹ sai “gbe-iku ẹruore nọ ọrọ eva ra.”—1 Pita 3:15.
Dae rehọ iẹe nnọ whọ jọ Ẹfẹsọs evaọ okenọ a kaki se ileta Pọl. Kọ eme riẹ e gbẹ hae wọ owhẹ re whọ rro ziezi evaọ “ẹriẹ ọmọ Ọghẹnẹ”? (Ẹf. 4:13, 14) Ee! Fikiere jọ eme Pọl i duobọte owhẹ epọvo na nẹnẹ. Who te wo uyoyou udidi kẹ Jihova gbe eriariẹ egbagba ọrọ Ẹme riẹ i ti fi obọ họ kẹ owhẹ dikihẹ ga evaọ otọhotọ na, Kristi. Ere oruo whọ te sai ro thihakọ idabolo kpobi nọ Setan ọ te wha se owhẹ bẹsenọ akpọ omuomu nana o ti kuhọ.—Ol. 1:1-3; Jeri. 17:7, 8.
[Ẹkpẹti/Uwoho nọ e rrọ ẹwẹ-obe avọ 27]
“Ro Se Ahwo Ẹfẹsọs”
‘Ajiri o te Ọghẹnẹ, Ọsẹ Ọnowo mai Jesu Kristi, ọnọ ọ jọ eva Kristi rehọ okẹ Ẹzi ghale omai eva eria odhiwu kpobi; nwanọ epanọ ọ salọ omai taure a te ti fi otọhotọ akpọ na họ, re ma ruẹse jọ fuafo kare epe evaọ aro riẹ. Keme ọ rehọ omai mu eva uyoyou re o ru omai emọ riẹ fiki Jesu Kristi, wọhọ epanọ evawere iwoma riẹ ọ rọ, rọ kẹ ajiri oruaro aruoriwo riẹ, onọ ọ rọ kẹ omai ọvọvẹ eva uyoyou riẹ. Ọnọ ma rehọ fiki azẹ riẹ wo ẹta mai, gbe ẹrọvrẹ eware iyoma mai, wọhọ epanọ ubu aruoriwo riẹ o rọ. Onọ ọ raha fihọ omai keme ọ jọ eva areghẹ kpobi dhesẹ oware udidi riẹ kẹ omai, epaọ iroro riẹ nọ ọ ma fihọ vẹre eva Kristi. Wọhọ ẹjiroro rọ kẹ oke nọ u te no, re eware kpobi nọ e rọ ehru gbe enọ e rọ akpọ, a wo okugbe ọvo eva riẹ.’—Ẹf. 1:3-10.