Si Kẹle Ọghẹnẹ
Ọ Kẹ Omai Uvẹ-Ọghọ orọ Ufuoma Iroro-Ejẹ
U FO nọ esẹgbini a re fi emamọ oriruo h’otọ kẹ emọ rai. Emamọ oriruo ọsẹgboni o rẹ sai fi obọ họ kẹ ọmọ wo iruemu aghae jẹ j’owọ areghẹ evaọ uzuazọ. Rekọ u yoma gaga inọ esẹgbini buobu a bi fi ekpehre oriruo h’otọ kẹ emọ rai. Kọ onana u dhesẹ nọ emọ itieye na a gbẹ sae j’owọ nọ u fo vievie he? Ma rẹ ruẹ uyo na evaọ ugogo uzẹme jọ nọ o rẹ kẹ omosasọ gaga—Jihova Ọghẹnẹ ọ kẹ omai omomọvo okẹ orọ ufuoma iroro-ejẹ. Roro kpahe ikuigbe Hẹzikaya, wọhọ epanọ ma rẹ ruẹ evaọ obe 2 Ivie 18:1-7.
Hẹzikaya yọ “ọmọzae Ehaz, ovie Juda.” (Owọ 1) Ehaz ọ liẹliẹ ahwo nọ e jọ otọ esuo riẹ no egagọ efuafo Jihova. Ovie ọgeva nana ọ jẹ gọ Ebale, avọ iruẹru riẹ nọ a rẹ rọ rehọ ahwo dheidhe. O tube kpe ọmọ obọriẹ jọ hayo ẹsejọhọ vrẹ ọvo dede, enọ e jọ inievo-emezae Hẹzikaya. Ehaz ọ kare ethẹ etẹmpol Jihova kufiẹ jẹ “rehọ egbada-idhe [obọriẹ] vi oka Jerusalem kpobi.” O “ru ỌNOWO na . . . eva dha.” (2 Iruẹru-Ivie 28:3, 24, 25) O rrọ vevẹ, ọsẹ Hẹzikaya ọ jọ yoyoma. Kọ ekpehre oriruo ọsẹ riẹ u dhesẹ nọ Hẹzikaya ọ rẹ gbẹ sai yeri emamọ uzuazọ vievie he?
Nọ Hẹzikaya ọ rehọ ẹta ọsẹ riẹ no wọhọ ovie, o raha oke he, ọ tẹ rọ uruemu riẹ dhesẹ via inọ ọ be te jọ ekpehre ohwo ho fikinọ ọsẹ riẹ ọ nwane jọ ekpehre ohwo. Hẹzikaya ọ ruabọhọ eru “oware nọ ukiete evaọ aro ỌNOWO na.” (Owọ avọ 3) Hẹzikaya o fi eva họ Jihova, yọ “ovie ọvo nọ ọ wọhọ riẹ evaọ otọ Juda ọ jọ họ.” (Owọ avọ 5) Evaọ ukpe ọsosuọ isuẹsu riẹ, Hẹzikaya, ovie nọ ọ gbẹ jọ ọmaha na o te mu aruẹrẹ egagọ efuafo họ, nọ a rọ raha eria ikpehru nọ a jẹ jọ gọ emedhọ na. O ru nọ a rọ wariẹ rovie etẹmpol na, je zihe egagọ uzẹme ze. (Owọ avọ 4; 2 Iruẹru-Ivie 29:1-3, 27-31) Hẹzikaya “ọ dhẹgbalọ ỌNOWO na . . . , ỌNOWO na avọ iẹe a gbẹ jọ.”—Owọ avọ 6 gbe 7.
Eme o fi obọ họ kẹ Hẹzikaya nọ o gbe ro lele ekpehre oriruo ọsẹ riẹ hẹ? Kọ o sae jọnọ oni riẹ nọ a je se Abija—ọnọ Ebaibol e ta ẹme kpahe tere he na—ọye o fi obọ họ kẹ Hẹzikaya jẹ emamọ owọ? Kọ o sae jọnọ emamọ oriruo Aizaya, ọnọ o mu iruo aruọruẹ riẹ họ taure a te ti yẹ Hẹzikaya oye ọ raro kele?a Ebaibol e ta ha. Rekọ oghẹrẹ kpobi nọ o rrọ, oware jọ u muẹro: Hẹzikaya ọ salọ nọ o re lele edhere nọ u wo ohẹriẹ ulogbo no orọ ọsẹ riẹ.
Oriruo Hẹzikaya o rrọ oware omosasọ kẹ ohwo kpobi nọ o sae jọnọ ọsẹgboni riẹ a fi emamọ oriruo h’otọ kẹ no emaha ze he. Ma sai nwene eware nọ e vrẹ no ho. Dede na, oyena u dhesẹ hẹ inọ ma gbẹ sai ru ewoma ha. Ma rẹ sae jọ enẹna jiroro nọ i re su kpohọ evawere evaọ obaro. Wọhọ Hẹzikaya, ma rẹ sae salọ inọ ma gwọlọ you jẹ gọ Ọghẹnẹ uzẹme na, Jihova. Edhere uzuazọ utioye na o rẹ wha uzuazọ evevọwẹ se omai enẹna, je su omai kpohọ uzuazọ ebẹdẹ bẹdẹ evaọ akpọ ọkpokpọ Ọghẹnẹ. (2 Pita 3:13; Eviavia 21:3, 4) Ma re yere Ọghẹnẹ oyoyou mai na gaga fiki okẹ oghaghae nana nọ ọ kẹ omai na—ufuoma iroro-ejẹ.
[Oruvẹ-obotọ]
a Aizaya o mu iruo aruọruẹ riẹ họ evaọ oware wọhọ ukpe 778 B.C.E. rite 732 B.C.E. jẹ vrẹ ere omojọ. Hẹzikaya o muhọ esu evaọ ukpe 745 B.C.E., okenọ ọ jọ ikpe 25.