Si Kẹle Ọghẹnẹ
“Ọ Riẹ Iroro Emọ Ahwo”
ONO evaọ usu mai ebẹbẹ gbe use-abọ evaọ uzuazọ e re bẹ te unu ẹdọvo ho? Evaọ ẹsejọ, o rẹ wọhọ nọ uvumọ ohwo ọ rrọ họ nọ ọ rẹ sai gine wo otoriẹ use-abọ nọ ma rẹriẹ ovao dhe hayo edada nọ e be yawo omai oma. Rekọ ohwo jọ ọ riẹ nọ o gine wo otoriẹ ọdawẹ mai—Jihova Ọghẹnẹ. Ma rẹ sai wo omosasọ no eme Solomọn nọ e rrọ obe 2 Iruẹru-Ivie 6:29, 30 na ze.
Solomọn ọ lẹ evaọ okenọ a jẹ rehọ etẹmpol nọ a bọ fihọ Jerusalẹm mudhe evaọ 1026 B.C.E. Evaọ olẹ riẹ na, ẹsejọhọ nọ o rehọ iminiti ikpe, Solomọn o jiri Jihova wọhọ Ọghẹnẹ ọtẹruo, Ọnọ o re ru eyaa riẹ gba, gbe Ọnọ o re yo elẹ.—1 Ivie 8:23-53; 2 Iruẹru-Ivie 6:14-42.
Solomọn ọ lẹ Ọghẹnẹ inọ ọ gaviezọ kẹ elẹ idibo riẹ. (Owọ avọ 29) Dede nọ Solomọn o dhunu te ebẹbẹ buobu (Owọ avọ 28), ọ ta inọ omomọvo ọ riẹ “uye riẹ” gbe “uweri riẹ.” Ohwo jọ ọ sai wo ẹbẹbẹ jọ nọ o be kẹe uye, omọfa ọ sai wo oware jọ sa nọ o be kẹe idhọvẹ.
Oghẹrẹ kpobi nọ o rrọ, enọ i wo ozodhẹ Ọghẹnẹ a kare obufihọ họ nọ a te wo ebẹbẹ. Evaọ olẹ riẹ na, Solomọn o wo idibo Jihova họ iroro, enọ omomọvo rai ọ rẹ sae “riẹ abọ” bru Jihova evaọ olẹ.a Ẹsejọhọ Solomọn ọ kareghẹhọ inọ okenọ ọsẹ riẹ Devidi ọ jọ otọ ọyawọ, ọ ta nọ: “Gbolo owha ra kẹ ỌNOWO na.”—Olezi 55:4, 22.
Eme Jihova o re ru kpahe ayare obufihọ nọ u no udu ze? Solomọn ọ lẹ Jihova nọ: “Who [ve] yo no obọ odhiwu ze evaọ oria ẹria ra, whọ rọ vrẹ ae, who je fiobọhọ kẹ omomọvo nọ whọ riẹ iroro riẹ, wọhọ epanọ idhere riẹ e rọ.” (Owọ avọ 30) Solomọn ọ riẹ nọ “ọnọ o re yo elẹ” na ọ be daezọ idibo riẹ, orọnikọ wọhọ utu ọvo ho rekọ te omomọvo. (Olezi 65:2) Jihova ọ rẹ kẹ obufihọ nọ idibo riẹ a gwọlọ, jẹ rọ vrẹ ọrahauzi nọ ọ rọ eva efuafo zihe bru ei ze.—2 Iruẹru-Ivie 6:36-39.
Fikieme u ro mu Solomọn ẹro inọ Jihova ọ rẹ kpahe fihọ ayare odibo riẹ nọ ọ thọ uzi rekinọ ọ wariẹ zihe bru ei ze? Evaọ olẹ ovona Solomọn ọ ta nọ: “Epanọ whọ riẹ eva omomọvo, epanọ uruemu riẹ o rọ (keme whẹ, whẹ ọvo, ọ riẹ eva emọ ahwo kpobi).” Jihova ọ riẹ edada hayo uye nọ omomọvo idibo riẹ nọ i wo ẹrọwọ a rẹriẹ ovao dhe, yọ o wo ọdawẹ kẹ ae.—Olezi 37:4.
Ma rẹ sai wo omosasọ no olẹ Solomọn na ze. Ẹsejọ, amọfa a rẹ sai gine wo otoriẹ oware nọ o be kẹ omai idhọvẹ hẹ—“uye” gbe “uweri” mai. (Itẹ 14:10) Rekọ Jihova ọ riẹ eva mai, yọ ọ be daezọ mai. Ma te horie eva mai kẹe evaọ olẹ, o rẹ sai ru nọ ebẹbẹ mai i re ro vori omai oma. Ebaibol na e ta nọ: “Fi iroro ejẹ ra kpobi kpahe iẹ keme ọye ọ be sẹro ra.”—1 Pita 5:7.
[Oruvẹ-obotọ]
a Evaọ oke nọ a ro kere ikuigbe Ebaibol na, re ohwo ọ “riẹ abọ” rri ehru u dhesẹ olẹ.—2 Iruẹru-Ivie 6:13.