Wuhrẹ No Ẹme Ọghẹnẹ ze

Ono Họ Ọghẹnẹ?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Onọ họ Ọghẹnẹ?

Ọghẹnẹ uzẹme na họ Ọnọ ọ ma eware kpobi. Ebaibol na o se rie “Ovie ebẹdẹ bẹdẹ,” onọ u dhesẹ nọ o wo emuhọ họ, yọ o ti wo ekuhọ gbe he. (Eviavia 15:3) Nọ orọnọ Ọghẹnẹ họ Ọnọ ọ kẹ omai uzuazọ na, ọye ọvo u fo nọ ma rẹ gọ.—Se Eviavia 4:11.

2. Oghẹrẹ vẹ Ọghẹnẹ ọ rrọ?

Ohwo ọvo ọ re ruẹ Ọghẹnẹ hẹ, keme Ọghẹnẹ yọ Ẹzi, onọ u dhesẹ nọ o wo ohẹriẹ ulogbo no emama kpobi nọ a rẹ rọ ẹro ruẹ nọ e be rria otọakpọ na. (Jọn 1:18; 4:24) Ma rẹ rọ ẹkwoma eware nọ Ọghẹnẹ ọ ma riẹ oghẹrẹ ohwo nọ ọ rrọ. Wọhọ oriruo, nọ ma te roro kpahe oghẹrẹ ibi-ire gbe idodo sa-sa gbe erru rai, ma rẹ ruẹ uyoyou gbe areghẹ Ọghẹnẹ. Epanọ ehrugbakpọ na ọ ragha te u dhesẹ kẹ omai nọ Ọghẹnẹ o wo ogaga ulogbo.—Se Ahwo Rom 1:20.

Ma rẹ sae jọ Ebaibol na wuhrẹ eware efa buobu kpahe oghẹrẹ ohwo nọ Ọghẹnẹ ọ rrọ. Wọhọ oriruo, Ebaibol ọ vuẹ omai oware nọ o rẹ were Ọghẹnẹ gbe onọ o rẹ were iẹe he, oghẹrẹ nọ o re yeri kugbe ahwo, gbe oghẹrẹ oware nọ o re ru evaọ uyero sa-sa.—Se Olezi 103:7-10.

3. Kọ Ọghẹnẹ o wo odẹ?

Jesu ọ ta nọ: “Ọsẹ mai nọ ọ rọ obọ odhiwu, odẹ ra ojọ ọrẹri.” (Matiu 6:9) Dede nọ Ọghẹnẹ o wo edẹ-ova buobu, o wo odẹ-oma ovo. U wo oghẹrẹ sa-sa nọ a re ro se odẹ na evaọ evẹrẹ sa-sa. Lele epanọ a fa riẹ no Oyibo ze, evaọ ẹvẹrẹ Isoko, a be hai sei “Jihova.”—Se Olezi 83:18, NW.

A si odẹ Ọghẹnẹ no Ebaibol buobu, a te fi Ọnowo hayo Ọghẹnẹ họ ẹta riẹ. Rekọ evaọ oke ọsosuọ nọ a kere Ebaibol na, odẹ-oma Ọghẹnẹ o romavia oware wọhọ unuẹse idu ihrẹ (7,000). Jesu o whowho odẹ Ọghẹnẹ via kẹ ahwo ẹkwoma odẹ na nọ ọ jẹ hae fodẹ okenọ o je ru ẹme Ọghẹnẹ vẹ kẹ ahwo. O fi obọ họ kẹ ahwo riẹ Ọghẹnẹ.—Se Jọn 17:26.

4. Kọ Jihova ọ be daezọ mai?

Jihova o bi dhesẹ isiuru kpahe omai ẹkwoma elẹ mai nọ ọyomariẹ ọvo ọ be hae gaviezọ kẹ. (Olezi 65:2) Kọ uye-oruẹ nọ o da akpọ fia na u dhesẹ nọ Ọghẹnẹ ọ be daezọ mai hi? Ahwo jọ a rẹ ta nọ Ọghẹnẹ o bi ru omai ruẹ uye rọ dawo omai, rekọ onana yọ uzẹme he. Ebaibol ọ ta nọ: “O rẹ bẹbẹ kẹ Ọghẹnẹ re o ru umuomu.”—Job 34:10; se Jemis 1:13.

Ọghẹnẹ ọ rehọ ufuoma iroro-ejẹ bru ọghọ họ omai oma. Kọ o gbẹ rrọ oware evawere kẹ omai inọ ma wo ufuoma iroro-ejẹ nọ ma sae rọ salọ inọ ma rẹ gọ Ọghẹnẹ? (Joshua 24:15) Uye-oruẹ o da akpọ fia fikinọ ahwo buobu a salọ inọ a re ru amọfa eware iyoma. O rẹ da Jihova nọ ọ tẹ be ruẹ okienyẹ otiọye.—Se Emuhọ 6:5, 6.

Kẹlena, Jihova ọ te rọ ẹkwoma Jesu si uye-oruẹ gbe ahwo nọ a be whae ze no otọakpọ na. Rri bọo oke yena, Jihova o wo emamọ ẹjiroro nọ ọ rọ kẹ uye-oruẹ uvẹ evaọ ubroke. Uzoẹme utiona ofa nọ o te tha o te vuẹ omai oware nọ Ọghẹnẹ ọ rọ kuvẹ kẹ uye-oruẹ.—Se Aizaya 11:4.

5. Eme Ọghẹnẹ ọ gwọlọ nọ ma ru?

Jihova ọ ma omai avọ isiuru nọ ma rẹ rọ riẹe je wo uyoyou kẹe. Ọ gwọlọ nọ ma riẹ uzẹme na kpahe iẹe. (1 Timoti 2:4) Ma te bi wuhrẹ Ebaibol na, ma rẹ sae riẹ Ọghẹnẹ je si kẹle iẹe wọhọ Ogbẹnyusu.—Se Itẹ 2:4, 5.

Nọ orọnọ Ọghẹnẹ ọ kẹ omai uzuazọ na, o gwọlọ nọ ma re you rie vi omọfa jọ kpobi. Ma rẹ sai dhesẹ kẹ Ọghẹnẹ nọ ma you rie ẹkwoma olẹ nọ ma rẹ lẹ sei, je ru oware nọ ọ gwọlọ mi omai. (Itẹ 15:8) Jihova ọ gwọlọ nọ ma rọ uyoyou lele amọfa yeri.—Se Mak 12:29, 30; 1 Jọn 5:3.

Rọkẹ evuẹ efa, rri uzou 1 orọ obe nana, Eme Ebaibol na O Gine Wuhrẹ? onọ Isẹri Jihova a kere.

[Uwoho nọ o rrọ ẹwẹ-obe avọ 17]

Kọ o sai wo emamọ ẹjiroro nọ a rẹ rọ kuvẹ kẹ uye-oruẹ evaọ ubroke?