KPAHE UZOẸME UKE NA: OWARE NỌ MA RẸ SAI WUHRẸ MI MOSIS
Oghẹrẹ Ohwo Vẹ Mosis Ọ Jọ?
Eme o rẹ ziọ owhẹ iroro nọ who te yo odẹ Mosis? Kọ iroro ra i re kpohọ . . .
ọmọ nọ oni riẹ ọ wọ fihọ ekete evaọ Ethẹ Naele?
ọmọ nọ ọmọtẹ Fẹro ọ yọrọ evaọ uwou Fẹro ovie Ijipti, rekiyọ ọ kareghẹhọ nọ ọye yọ ohwo Izrẹl?
ọzae nọ o su igodẹ ikpe udhuvẹ evaọ ẹkwotọ Midian?
ọzae nọ o lele Jihovaa ta ẹme evaọ ẹwọ nọ ọ jẹ to na?
ọzae nọ ọ gbaudu nyabru ovie Ijipti, jẹ ta kẹe nọ o siobọno emọ Izrẹl no igbo?
ọzae nọ ọ vuẹ ovie Ijipti inọ Iye Ikpe i ti te ai fikinọ ovie na o veghe uzou kẹ Ọghẹnẹ uzẹme na?
ọzae nọ o su emọ Izrẹl no igbo Ijipti?
ọzae nọ Ọghẹnẹ ọ kẹ ẹgba re ọ hẹriẹ Abade Ọwawae na?
ọzae nọ Ọghẹnẹ ọ kẹ Izi Ikpe na re ọ rehọ ae kẹ emọ Izrẹl?
EWARE nọ ma jọ obehru fodẹ na kpobi e jọ oma Mosis rugba. Agbẹta nọ Ileleikristi, egagọ Ju, gbe egagọ Muslim a ro rri Mosis ghaghae na.
Avro ọ riẹ hẹ, Mosis yọ ọruẹaro nọ o ru “iruo igbunu” buobu. (Iziewariẹ 34:10-12) U no rie eva ze re o ru oware kpobi nọ Ọghẹnẹ ọ gwọlọ nọ o ru. Ghele na, Mosis yọ ohwo-akpọ gheghe. Mosis yọ “ohwo wọhọ epanọ marọ na,” nwane wọhọ epanọ Elaeja ọruẹaro na ọ jọ, ọnọ avọ Mosis a gbẹ romavia evaọ eruẹaruẹ, nọ Jesu ọ rẹriẹ. (Jemis 5:17; Matiu 17:1-9) Mosis ọ rẹriẹ ovao dhe ọkpọ ebẹbẹ nọ ma be rẹriẹ ovao dhe nẹnẹ na, ghele na o thihakọ rai kpobi.
Kọ whọ gwọlọ riẹ oware nọ u fi obọ họ kẹe ru ere? Roro kpahe iruemu esa jọ nọ Mosis o dhesẹ, gbe oware nọ ma rẹ sai wuhrẹ no oriruo riẹ ze.
a Ebaibol na o dhesẹ nọ Jihova họ odẹ Ọghẹnẹ.