Kọ Ọghẹnẹ Ọ be Daezọ Uye-Oruẹ Mai?

FIKIEME Ọ JẸ KUVẸ KẸ OWARE UTIONA?

Mercy: Ma be ghale omobe-ovẹvẹ nana kẹ ahwo evaọ okegbe nana. Uzoẹme riẹ họ, Kọ Whọ Gwọlọ Riẹ Uzẹme Na? Mi ora.

Sarah: Eme o be ta kpahe?

Mercy: O be ta kpahe uzẹme na. Dai rri enọ ezeza nọ e rrọ uke riẹ na. O vẹ o mae—

Sarah: Iviena hẹrẹ tao. Oke ra whọ be te raha kufiẹ na otẹrọnọ usiuwoma whọ gwọlọ ta kẹ omẹ na.

Mercy: Fikieme whọ rọ ta ere?

Sarah: Uzẹme na họ, u mu omẹ ẹro ho sọ Ọghẹnẹ ọ ginẹ rrọ.

Mercy: Whọ daoma gaga nọ whọ sae rọ ta eva ra kẹ omẹ. Kọ ere whọ be hai roro anwẹdẹ?

Sarah: Ijo, ichọche ma nya no emaha ze. Rekọ u kri no nọ mẹ rọ seba.

Mercy: Ere? U woma. Orọnikọ mẹ be gwọlọ gba owhẹ họ rọwo oware nọ mẹ rọwo ho. Rekọ mẹ gwọlọ nọ owhẹ onọ jọ. Kọ u wo oware jọ nọ o lẹliẹ owhẹ roro nọ Ọghẹnẹ ọ rrọ họ?

Sarah: Ee. Anwọ ikpe ikpegbihrẹ na nọ oni mẹ o ro wo asidẹnte.

Mercy: Asidẹnte? Kọ ọ nwoma gaga?

Sarah: Ẹhẹ, ọ ko fihotọ anwọ oke yena ze.

Mercy: Igbamẹ. Mẹ riẹ nọ onana o be kẹ owhẹ uye gaga.

Sarah: Ọrue ọ riẹ hẹ. Oyejabọ nọ u gbe bi ro mu omẹ ẹro ho na sọ Ọghẹnẹ ọ ginẹ rrọ; ọ tẹ ginẹ rrọ, fikieme ọ jẹ kuvẹ kẹ oware utiona? Fikieme ọ jẹ kuvẹ re ma reoja enẹ?

KỌ O THỌ RE A NỌ ENỌ ITIEYE NA?

Mercy: Ohwo nọ eware itieye na e via kẹ ọ rẹ siọ enọ itienana ba ẹnọ họ. Makọ ahwo jọ nọ a fodẹ evaọ Ebaibol na a nọ ọkpọ enọ yena.

Sarah: Uzẹme?

Mercy: Ẹhẹ. Jome dhesẹ oriruo ohwo otioye jọ kẹ owhẹ evaọ Ebaibol na.

Sarah: Dhesẹ iẹe kẹ omẹ.

Mercy: Obe Habakuk 1:2, 3. Habakuk ọruẹaro na ọ jọ etẹe nọ Ọghẹnẹ nọ: “Ẹvẹ me re bo ubo obọufihọ se owhẹ krite, nọ owhẹ ore yo ho? Hayo bo se owhẹ nọ ‘Oja yo,’ no who re siwẹ hẹ? Fikieme who je bi ru omẹ ruẹ eware ethọthọ jẹ ruẹ ukpokpoma?” Kọ ogbẹrọnọ ọkpọ enọ nana whọ be nọ na?

Sarah: Nwanọ ere.

Mercy: Ọghẹnẹ ọ whọku Habakuk fiki enọ yena ha, hayo ta nọ o wo ẹrọwọ họ.

Sarah: Ẹhẹẹ.

O RẸ KẸ JIHOVA UYE NỌ AHWO A TẸ BE RUẸ UYE

Mercy: Ebaibol na ọ ta nọ Jihova ọ rẹ tehe ezọ di kẹ uye nọ ma be ruẹ hẹ, rekọ o ta nọ ọ be daezọ mai.

Sarah: Eme whọ be gwọlọ ta na?

Mercy: Jome dhesẹ oriruo oware nọ mẹ ta na kẹ owhẹ evaọ obe Ọnyano 3:7. Iviena sei ze.

Sarah: U woma. O ta nọ: “ỌNOWO na ọ tẹ ta nọ, ‘Mẹ ruerẹ uye ahwo mẹ nọ a rọ evaọ Ijipti, me te je yo oviẹ rai fiki ahwo nọ a bi su ai; mẹ riẹ uye rai.’”

Mercy: Whẹ kobiruo. Wọhọ epanọ oria nana o ta na, kọ who roro nọ Ọghẹnẹ ọ be ruẹ uye nọ o be bẹ ahwo?

Sarah: Ee, o wọhọ ere.

Mercy: Orọnikọ ọ be ruẹ uye nọ o be bẹ omai ọvo ho. Wariẹ rri abọ urere oria ikere yena. Ọghẹnẹ ọ ta nọ: “Mẹ riẹ uye rai.” Kọ eme yena i dhesẹ nọ Ọghẹnẹ ọ tehe ezọ di kẹ uye-oruẹ mai?

Sarah: O nwane rrọ ere he.

Mercy: Uzẹme riẹ họ, orọnikọ Ọghẹnẹ ọ riẹ kpahe ebẹbẹ mai ọvo ho, rekọ o rẹ dae gaga nọ ma tẹ be ruẹ uye.

Sarah: Ginọ ere.

Mercy: Joma wariẹ se oria ofa evaọ Ebaibol na nọ u dhesẹ epanọ o rẹ da Ọghẹnẹ te nọ ahwo a tẹ be ruẹ uye. O rrọ obe Zekaraya 2:8. Abọ urere riẹ o ta nọ: “Ọnọ rehọ obọ te owhẹ ọ rehọ obọ te ọmọ-ẹro mẹ.” Kọ onana u gbe dhesẹ nọ oware nọ o be kẹ ahwo uye, o be kẹ Ọghẹnẹ uye re?

Sarah: O wọhọ ere.

Mercy: Uzẹme riẹ họ, Ọghẹnẹ ọ be daezọ mai, yọ o rẹ dae gaga nọ ma tẹ be ruẹ uye. Oware jọ o tẹ be da omai, o rẹ dae re.

KỌ FIKIEME Ọ RỌ KUVẸ KRI TENẸ?

Mercy: Re mẹ tẹ nyavrẹ, mẹ gwọlọ ta oware jọ kẹ owhẹ.

Sarah: Didi oware?

Mercy: Roro kpahe epanọ Ebaibol na ọ ta nọ Ọghẹnẹ o wo ogaga te, evaọ obe Jerimaya 10:12. Iviena sei ze.

Sarah: U woma. O ta nọ: “Ọghẹnẹ ọ rehọ ogaga riẹ ma akpọ na, areghẹ riẹ o ro fi otọhotọ akpọ na họ, eriariẹ riẹ ọ rọ riẹ idhiwu na fihọ.”

Mercy: Whẹ kobiruo. Joma rehọ omoke jọ roro kpahe oria Ebaibol nana. Who te rri ehrugbakpọ na gbe eware nọ e riẹe eva, kọ o gbẹ rọnọ ogaga ulogbo Ọghẹnẹ ọ rọ mae?

Sarah: Me roro ere.

Mercy: Otẹrọnọ Ọghẹnẹ o wo ogaga ulogbo nọ ọ rọ ma eware kpobi, kọ u gbe mu owhẹ ẹro nọ o wo ogaga nọ ọ sai ro si uye-oruẹ no?

Sarah: Ẹhẹ.

Mercy: Wariẹ roro kpahe oni ra. Fikieme uye nọ ọ be ruẹ na o be rọ kẹ owhẹ idhọvẹ?

Sarah: Fikinọ me you rie gaga.

Mercy: O hae jọnọ who wo ogaga nọ whọ sai ro siwi ei, kọ whọ gbẹ hai ti ru ere?

Sarah: Keme jabọ?

Mercy: Whọ ruẹ oware nọ mẹ be ta na. Ebaibol na ọ ta nọ Ọghẹnẹ ọ be ruẹ uye nọ o be bẹ omai, yọ o be dae gaga, o te je wo ogaga ulogbo. Kọ onana u gbe dhesẹ nọ Ọghẹnẹ ọ sai ku ebẹbẹ mai họ, rekọ o bi thihakọ rai ọvo?

Sarah: Whaọ, me ri roro kpohọ ofẹ yena vẹre he.

Mercy: Kọ who gbe roro nọ oware jọ o soriẹ ze nọ ọ rọ kuvẹ kẹ uye-oruẹ kri tenẹ?a

Sarah: Humm, ẹsejọhọ ere o rrọ.

Mercy: Me ti zihe ze oke ofa te kẹ uyo onọ yena. Kọ mẹ sai di owhẹ họ uwou oke utiona evaọ oka notha?

Sarah: Ee, mẹ te jọ uwou.

Mercy: U woma. Odẹ mẹ Mercy. Kọ didi odẹ ra?

Sarah: Odẹ mẹ Sarah.

Mercy: U woma. Ma te ruẹro oka notha.b