Enọ Nọ Ebaibol Ọ Kẹ Iyo Rai
Ono o bi gine su akpọ na?
Otẹrọnọ Ọghẹnẹ họ ọnọ o bi gine su akpọ na, fikieme uye-oruẹ u ro bu akpọ na te enẹ?
Ahwo buobu a roro nọ Ọghẹnẹ họ ọnọ o bi su akpọ na. Rekọ otẹrọnọ Ọghẹnẹ họ ọnọ o bi gine su akpọ na, fikieme uye-oruẹ u ro bu akpọ na te enẹ? (Iziewariẹ 32:4, 5) Ebaibol na ọ ta nọ ohwo oyoma jọ ọ be kpọ iruẹru akpọ na.—Se 1 Jọn 5:19.
Eme ọ soriẹ nọ ohwo oyoma jọ o bi ro su akpọ na? Nọ Ọghẹnẹ ọ nwane ma Adamu avọ Ivi no, u kri hi, ukọ-odhiwu jọ ọ tẹ wọso Ọghẹnẹ je ru aimava wọso Ọghẹnẹ re. (Emuhọ 3:1-6) Ukọ-odhiwu nana họ Setan, yọ fikinọ Adamu avọ Ivi a yoẹme kẹe, o te zihe ruọ osu rai. O gwọlọ nọ ma re yoẹme kẹ Ọghẹnẹ no eva ze fiki uyoyou nọ ma wo kẹe, keme ọye ọvo họ ọnọ o te nọ o re su akpọ na. (Iziewariẹ 6:6; 30:16, 19) Rekọ ahwo buobu evaọ akpọ na nẹnẹ a be rọ aro kele Adamu avọ Ivi.—Se Eviavia 12:9.
Ono o ti ku ebẹbẹ ahwo-akpọ họ?
Kọ Ọghẹnẹ ọ te kẹ Setan uvẹ re o su akpọ na bẹdẹ bẹdẹ? Vievie! Ọghẹnẹ ọ te rehọ Jesu raha Setan gbe eware iyoma kpobi nọ ọ wha ze no.—Se 1 Jọn 3:8.
Jihova ọ te kẹ Jesu ogaga nọ o ti ro ru onana. (Ahwo Rom 16:20) Kẹsena Ọghẹnẹ o ve ti su ahwo-akpọ, a vẹ te rria akpọ nọ ọ vọ avọ evawere gbe udhedhẹ wọhọ epanọ a jọ vẹre no emuhọ ze.—Se Eviavia 21:3-5.