Enọ Nọ Ebaibol Ọ Kẹ Iyo Rai

Fikieme ma rẹ rọ lẹ?

Jihova Ọghẹnẹ ọ gwọlọ nọ ma hae ta eva mai kẹe ẹsikpobi. (Luk 18:1-7) Fikinọ ọ gwọlọ nọ eware i woma kẹ omai, ọ rẹ gaviezọ kẹ omai. Nọ orọnọ Ọsẹ obọ odhiwu mai ọ gwọlọ nọ ma lẹ sei ẹsikpobi na, u fo re ma ru ere.—Se Ahwo Filipai 4:6.

Orọnikọ ma rẹ rọ olẹ yare obufihọ mi Ọghẹnẹ ọvo ho, rekọ u re fiobọhọ kẹ omai si kẹle iẹe. (Olezi 8:3, 4) Nọ ma tẹ be hae ta eva mai kpobi kẹ Ọghẹnẹ kẹse kẹse, o rẹ lẹliẹ usu mai kugbei kpekpe viere.—Se Jemis 4:8.

Oghẹrẹ vẹ ma rẹ rọ lẹ?

Ọghẹnẹ ọ gwọlọ elẹ nọ a re se fihọ uzou hu, hayo elẹ nọ a re ro dhesẹ oma. Yọ u wo oghẹrẹ jọ nọ ma rẹ keria hayo dikihẹ nọ ma tẹ be lẹ hẹ. Jihova ọ gwọlọ nọ ma lẹ sei no udu mai ze. (Matiu 6:7) Wọhọ oriruo, evaọ oke emọ Izrẹl, Hana ọ lẹ se Jihova kpahe ẹbẹbẹ jọ nọ o wo. Uwhremu na nọ Ọghẹnẹ o yo olẹ riẹ no, ọ tẹ wariẹ lẹ yere Ọghẹnẹ.—Se 1 Samuẹle 1:10, 12, 13, 26, 27; 2:1.

Olẹ yọ uvẹ-ọghọ ulogbo! Ma rẹ sae ta eva mai kpobi kẹ Ọghẹnẹ. Ma rẹ sai jiri iei je yere iei rọkẹ eware nọ o bi ru kẹ omai. O gwọlọ nọ ma gbabọ kẹ uvẹ-ọghọ nana vievie he.—Se Olezi 145:14-16.