Ọghẹnẹ Ọ Riẹ Oghẹrẹ Ohwo Nọ Whọ Rrọ
“O ỌNOWO, whẹ ọnọ ọ gwọlọ omẹ whọ tẹ riẹ omẹ!”—OLEZI 139:1.
“Ibiaro ra e ruẹ ekuakua mẹ nọ a te ma omẹ hẹ.”—OLEZI 139:16
OWARE NỌ U GBE BI RO MU AHWO JỌ ẸRO HO: Ahwo jọ a re roro nọ Ọghẹnẹ ọ rẹ ruẹ oware uwoma ovo evaọ oma ahwo-akpọ họ. Aye jọ nọ a re se Kendra, ọ jẹ hae jọ ọkora gaga keme o roro nọ o fioka evaọ aro Ọghẹnẹ hẹ. Ọ ta nọ: “Mẹ gbẹ jẹ lẹ hẹ.”
OWARE NỌ EBAIBOL NA O WUHRẸ: Fikinọ Jihova ọ riẹ oghẹrẹ ohwo nọ ma ginẹ rrọ, ọ rẹ tẹrovi ethobọ mai hi. Ebaibol na ọ ta nọ, “ọ riẹ epanọ a rọ ma omai; ọ be kareghẹhọ nọ mai ẹkpẹ gheghe.” Onana u te dhesẹ nọ, “o re ru omai epanọ eyoma mai ọ rọ họ,” rekọ ọ rẹ re-ohrọ mai jẹ rọ vrẹ omai nọ ma te kurẹriẹ no eva ze.—Olezi 103:10, 14.
Roro kpahe Devidi ovie Izrẹl nọ ma fodẹ evaọ uzoẹme jọ nọ o vrẹ na. Nọ ọ jẹ lẹ se Ọghẹnẹ, Devidi ọ ta nọ: “Ibiaro ra e ruẹ ekuakua mẹ nọ a te ma omẹ hẹ; eva obe ra a kere i rai kpobi ọvuọvo họ . . . Gwọlọ omẹ, O Ọghẹnẹ, re whọ riẹ iroro udu mẹ!” (Olezi 139:16, 23) Dede nọ Devidi ọ thọ uzi ulogbo jọ evaọ oke jọ nọ u kpemu, u mu rie ẹro nọ Jihova ọ riẹ nọ ọyomariẹ o kurẹriẹ no eva ze.
Jihova ọvo họ ọnọ ọ riẹ oghẹrẹ ohwo nọ whọ ginẹ rrọ evaọ obeva. Ebaibol na ọ ta nọ: “Eru oma ọye ohwo o re riwẹ, rekọ ỌNOWO na kọ obọ eva.” (1 Samuẹle 16:7) Makọ oghẹrẹ oware kpobi nọ who ru kẹhẹ, Ọghẹnẹ ọ riẹ oware nọ o be lẹliẹ owhẹ ru ere; keme ọ riẹ nọ oria nọ whọ jọ whẹro gbe oria nọ whọ be rria, i re kpomahọ oghẹrẹ uruemu nọ who wo. Ọ be ruẹ oghẹrẹ nọ whọ be daoma te, dede nọ eware e rẹ thọ owhẹ obọ ẹsejọ.
Nọ orọnọ Ọghẹnẹ ọ riẹ oghẹrẹ ohwo nọ whọ ginẹ rrọ na, ẹvẹ ọ sae rọ bọ owhẹ ga?