Kọ Ure nọ A Ko Fihotọ no O sae Wariẹ Dhẹze?

URE olivi nọ o rẹ thahe ku jẹ vọ avọ ezo na u siuru tere he nọ a tẹ rehọ iẹe wawo ure sida obọ Lebanọn nọ u wo erru gaga na. Rekọ ure olivi o rẹ sae zọ makọ evaọ otọ ẹgaga gbe ezi sa-sa. A ta nọ ejọ e rria kri te ikpe odu ọvo (1,000) no dede. Fikinọ ure olivi o rẹ ta awọ vọ otọ kokodo, o rẹ sae wariẹ dhẹze nọ a tẹ maki koi no dede. O rẹ seba ẹdhẹze he nọ awọ na ọ gbẹ rrọ otọ na.

Job ọsẹ anwae na o wo imuẹro nọ ọ tẹ maki whu dede, ọ te wariẹ ziọ uzuazọ. (Job 14:13-15) Ọ rehọ ure kẹ oriruo imuẹro nọ o wo inọ Ọghẹnẹ ọ te kpare iẹe ziọ uzuazọ, yọ o wọhọ nọ ure olivi ọ rọ kẹ oriruo nana. Ọ ta nọ: “Ẹruore ọ gbẹrọ kẹ ure, otẹrọnọ a kie rie fihọ otọ o rẹ wariẹ dhẹze.” Nọ ehri ure olivi o tẹ make ya fia evaọ etoke ivo egaga, ure na o rẹ wariẹ ta no awọ riẹ ze nọ oso ọ tẹ rrọ ku otọ na, o vẹ jẹ wariẹ ta “egha wọhọ ure oboba.”—Job 14:7-9.

Wọhọ epanọ ohwo nọ a ko ure olivi riẹ fihotọ o re rẹro okenọ o te rọ wariẹ dhẹze na, ere Jihova ọ be rọ evawere rẹro okenọ ọ te rọ kpare idibo riẹ gbe amọfa nọ a whu no zihe ziọ uzuazọ. (Mat. 22:31, 32; Jọn 5:28, 29; Iruẹru 24:15) O te jọ etoke evawere gaga nọ ma ti dede ahwo nọ a kpare ze no zihe ziọ uzuazọ nọ o ginẹ rrọ uvi uzuazọ.