KỌ WHỌ KAREGHẸHỌ?

Kọ whọ romatotọ se uvitha Uwou-Eroro nọ i kpozi kẹle na? Dai rri sọ whọ sae kẹ iyo enọ nọ e rrọ obotọ na:

Eme ma rẹ sai ru kukpe kukpe rọ ruẹrẹ oma kpahe kẹ ekareghẹhọ uwhu Jesu?

Oware jọ nọ ma rẹ sai ru họ, omaa isase Ebaibol Ekareghẹhọ nọ a rẹ ruẹrẹfihọ ukeledẹ gbe omobe Ẹkiẹriwo Ikereakere na Kẹdẹ Kẹdẹ na nọ ma rẹ hai se. Ma sai je ru usiuwoma ota mai kẹre evaọ etoke nana. U te no ere no, ma sae lẹ je roro didi kpahe ẹruore nọ Ọghẹnẹ ọ kẹ omai na.—1/15, ẹwẹ-obe avọ 14-16.

Obọdẹ okẹ vẹ u te inievo obọ Japan obọ?

Obe Usiuwoma Matiu orọ Ebaibol New World Translation u te rai obọ. Inievo na a bi fi obe nana họ ada evaọ usiuwoma ota, yọ ahwo buobu nọ a riẹ Ebaibol na tere he a be rehọ obe na.—2/15, ẹwẹ-obe avọ 3.

Eware jọ vẹ evaọ ikpe-udhusoi ọsosuọ i fiobọhọ kẹ Ileleikristi oke yena wha usiuwoma na haro?

Udhedhẹ Rom nọ a se Pax Romana, nọ o jariẹ evaọ oke yena u ru nọ ozighi ọ gbẹ rọ jotọ tere he. Ilele na a jẹ sai kpohọ eria sa-sa fiki emamọ idhere nọ e jọ Rom oke yena. Ẹvẹrẹ Griki nọ a jẹ mae ta oke yena u ru rie lọhọ nọ a jẹ sae rọ ta usiuwoma na ziezi, makọ rọkẹ ahwo Ju nọ a vahabọ ruọ ekwotọ sa-sa uvie-ulogbo Rom. Yọ ilele na a jẹ sae rọ Uzi Rom thọ usiuwoma na.—2/15, ẹwẹ-obe avọ 20-23.

Anwọ oke jọ ze na, fikieme a gbẹ be nwane jọ ebe mai fodẹ oware jọ no, a vẹ fodẹ oware ofa nọ u dikihẹ kẹ hẹ?

U wo eria ikere jọ nọ e ta nọ ahwo jọ nọ a fodẹ evaọ Ebaibol na a dikihẹ kẹ oware ofa nọ o mai wuzou evaọ obaro. Ma rẹ ruẹ oriruo otiọna jọ evaọ obe Ahwo Galesha 4:21-31. Rekọ nọ Ebaibol na ọ gbẹ kẹ imuẹro itieye he, o rẹ mai woma re ma seba ẹta inọ, ohwo hayo oware nọ a fodẹ evaọ oria ikere jọ u dikihẹ kẹ oware ofa. Dede na, ma rẹ sae tẹrovi eware nọ ma re wuhrẹ mi ahwo hayo eware nọ e via nọ a gbiku rai fihọ Ebaibol na. (Rom 15:4)—3/15, ẹwẹ-obe avọ 17-18.

Fikieme ọraha-uzi nọ o kurẹriẹ hẹ nọ a re sino ukoko o rọ rrọ ọruẹrẹfihotọ oyoyou?

Ebaibol na ọ ta kpahe ọruẹrẹfihotọ ohwo-osino ukoko, onọ o rẹ wha irere ze. (1 Kọr. 5:11-13) O rẹ wha orro se odẹ Ọghẹnẹ, thọ ukoko ofuafo riẹ, yọ o sai ru ọraha-uzi na bruoma kpiroro.—4/15, ẹwẹ-obe avọ 29-30.