Hae Rọvrẹ no Eva Ze

EHRI-UZI EBAIBOL: “Wha hae . . . rọvrẹ ohwohwo no eva ze nọ ohwo ọ tẹ maki wo oware jọ nọ u re ru ei go kpahe omọfa. Wọhọ epanọ Jihova ọ rọvrẹ owhai riẹriẹriẹ na, wha re ru epọvo na re.”—Ahwo Kọlọsi 3:13.

Eme u dhesẹ re a rọvrẹ no eva ze? Evaọ Ebaibol na, a rehọ uzioraha dhesẹ osa nọ ohwo ọ re, erọvrẹ kọ epanọ a rẹ kpairoro vrẹ osa na. (Luk 11:4) Obe jọ o ta nọ, evaọ Ikereakere na, ẹme Griki nọ a fa “rọvrẹ” na, u dhesẹ “epanọ a rẹ kpairoro vrẹ osa nọ a re ohwo, nọ a gbe yei hi.” Fikiere, ma tẹ rọvrẹ ohwo nọ o ru omai thọ no, ma gbe rẹro oware ovo mi ei hi. Ghele na, erọvrẹ u dhesẹ vievie he inọ ma rẹ jẹ uruemu othọthọ na rehọ hayo ru wọhọ ẹsenọ oware ovo o via ha. Ukpoye, ma re si egrẹ no eva, o tẹ make rọnọ ma wo ‘oware jọ nọ u re ru omai go kpahe omọfa.’

Kọ areghẹ na o gine wo iruo nẹnẹ? Fikinọ ma gba ha, mai kpobi ma re ruthọ. (Ahwo Rom 3:23) Fikiere, o rrọ oware areghẹ re ma rọvrẹ amọfa, keme epọvo na ma te gwọlọ nọ amọfa a rọ iruthọ mai rọvrẹ omai re. Ofariẹ, nọ ma tẹ rọvrẹ, omobọ mai ma bi fiobọhọ kẹ. Fikieme ma rọ ta ere?

Ma te wo ẹgo gbe ofu họ eva, jẹ se nọ ma rẹ rọvrẹ hẹ, yọ omobọ mai ma bi kpe. Oyena o rẹ whae ze nọ eva e gbẹ rọ were omai hi, ma vẹ te jọ ọkọkora, yọ uzou u re mu omai dhe. O sae jẹ wha ẹyao se omai. Iyẹrẹ jọ evaọ emagazini Journal of the American College of Cardiology, onọ Dr. Yoichi Chida avọ Profẹsọ Andrew Steptoe a kere o ta nọ: “Eware nọ ma duku i dhesẹ nọ ahwo nọ a rẹ jẹ egrẹ, je koko ofu họ eva, a re wo ẹyao udu.”

Evaọ abọdekọ riẹ, irere buobu i re te omai nọ ma tẹ rọvrẹ. Nọ ma tẹ be hae rọvrẹ no eva ze, u re ru nọ ma sae rọ sẹro udhedhẹ gbe okugbe nọ ọ rọ udevie mai, nọ o rẹ lẹliẹ usu mai kugbe amọfa tọ. Maero na, ma rẹ rọ ere dhesẹ nọ ma be rọ aro kele Ọghẹnẹ, ọnọ ọ rẹ rọvrẹ erahizi nọ i kurẹriẹ, yọ ọ gwọlọ nọ ma ru epọvo na re.—Mak 11:25; Ahwo Ẹfisọs 4:32; 5:1.