Ono Ọ be Wha Uye-Oruẹ Ze?

Otẹrọnọ obọ Ọghẹnẹ uye-oruẹ u bi no ze he, kọ ono ọ be wha uvuhu, ohọo, ẹmo, ẹyao gbe okpẹtu nọ a r’obọ so ho ze? Ẹme Ọghẹnẹ Ebaibol na o dhesẹ igogo eware esa jọ nọ e be wha uye-oruẹ ahwo-akpọ ze:

1. Oriobọ, Uvou-Uthei, gbe Omukpahe. “Ohwo ọ rẹ rehọ obọ ogaga su ọrivẹ riẹ nwa oma.” (Ọtausiuwoma Na 8:9) Ẹsibuobu, ahwo a rẹ ruẹ uye fiki uruemu oriobọ amọfa hayo fiki ahwo nọ i re ru eware iyoma.

2. Oke gbe Eware nọ A Rẹro Rai Hi. Ẹsibuobu ahwo a rẹ ruẹ uye keme “oke” gbe eware nọ a rẹro rai hi i re kpomahọ ae. (Ọtausiuwoma Na 9:11) Onana u dhesẹ nọ okpẹtu ọ sai du lawhe idudhe evaọ oria nọ ahwo a rrọ, hayo oware uyoma o sae via fiki ethobọ ohwo.

3. Osu Omuomu Akpọ Na. Ebaibol na o dhesẹ ugogo oware nọ o be mae wha uye-oruẹ ahwo-akpọ ze. Ebaibol na ọ ta nọ: “Akpọ na soso ọ rrọ otọ ogaga omuomu na.” (1 Jọn 5:19) Omama ẹzi nọ a re se Setan Edhọ na họ “omuomu” na. Ọ jọ ukọ-odhiwu Ọghẹnẹ evaọ oke ọsosuọ rekọ “o dikihẹ ga evaọ uzẹme na ha.” (Jọn 8:44) Ikọ-odhiwu efa i kuomagbe Setan wọso Ọghẹnẹ fiki isiuru oriobọ, fikiere a te zihe ruọ ikọ-imuomu. (Emuhọ 6:1-5) Anwọ okenọ a rọ kpareso Ọghẹnẹ ze na, Setan avọ ikọ-imuomu na a bi gbe akpọ na ku, yọ a bi ru eware iyoma buobu. Oke mai na o mae rọ ga dede. Obọnana, Setan o wo ofu ọgaga yọ “o bi su akpọ na soso thọ.” Onana o wha riẹ ze nọ “uye” o rọ da akpọ na soso fia. (Eviavia 12:9, 12) Evaọ uzẹme, Setan yọ osu omuomu nọ ọ geva gaga. Eva e rẹ were iẹe nọ ahwo a tẹ be ruẹ-uye. Fikiere, Setan ọ be wha uye-oruẹ ahwo-akpọ ze orọnikọ Ọghẹnẹ hẹ.

DAI RORO IEI: Re osu o keke aro fihọ wha uye se ahwo nọ a riẹ onahona ha, kiyọ ọ geva gaga jẹ rrọ muomu. Wo ohẹriẹ, Ebaibol na ọ ta nọ: “Ọghẹnẹ họ uyoyou.” (1 Jọn 4:8) Fikinọ ọ rrọ yoyou gaga, o rrọ “bẹbẹ kẹ Ọghẹnẹ re o ru umuomu, otẹ jẹ bẹ kẹ Erumeru nọ o re ro ru oware othọthọ!”​—Job 34:10.

Ghele na, ohwo ọ sae nọ inọ, ‘Ẹvẹ Ọghẹnẹ Erumeru na ọ te kẹ esuo omuomu Setan uvẹ kri te?’ O rrọ vevẹ inọ Ọghẹnẹ o mukpahe emuemu, yọ o be kẹe uye inọ ma be ruẹ uye. Ofariẹ, Ebaibol na ọ tuduhọ omai awọ inọ: “Wha gbolo awaọruọ rai kpobi kẹe, keme ọ be daezọ rai.” (1 Pita 5:7) Ọghẹnẹ o you omai yọ o wo ogaga nọ o re ro si uye-oruẹ gbe okienyẹ kpobi no otọ, wọhọ epanọ ma te ta kpahe evaọ uzoẹme nọ o rrọ aro na.a