Raro Kele Ẹrọwọ Rai
1 Pọl ukọ na o dhesẹ ẹrọwọ wọhọ “umuẹro eware kpobi nọ ma bi rẹro rai na, odhesẹvia eware nọ ma te ruẹ hẹ.” O te fiba ae nọ “o rẹ bẹbẹ re ohwo ọ were Ọghẹnẹ ababọ ẹrọwọ.” (Hib. 11:1, 6) Pọl ọ ta k’omai nọ ma wo ẹrọwọ, jọ ẹrọwọ ọ d’omai oma fia, re ma je le ei.—2 Kọr. 4:13; Kọl. 2:7; 2 Tim. 2:22.
2 A fodẹ iriruo ẹrọwọ nọ e viodẹ buobu fihọ Ebaibol na. Evaọ Ahwo Hibru uzou 11, Pọl o kele isẹri buobu nọ i dhesẹ ẹrọwọ ọgaga. Udevie usu ahwo ọnana họ Ebẹle, ọnọ ọ jọ ohwo ọsosuọ nọ a kpe fiki ẹrọwọ riẹ. A kele Noa keme ẹkwoma ẹrọwọ riẹ o dhesẹ ozodhẹ Ọghẹnẹ nọ a gwọlọ re a ro siwi uviuwou riẹ. A jiri Abraham fiki ẹrọwọ gbe ẹmeoyo riẹ. A jiri Mosis keme ẹkwoma ẹrọwọ riẹ o ro dikihẹ whawha wọhọ ẹse nọ ọ be ruẹ Ọnọ a rẹ ruẹ hẹ. Usu iriruo enana u theri te epanọ Pọl ọ jẹ ta nọ oke orọ kẹe he re ọ ta ẹme kpahọ ae kpobi. Ẹvẹ ma rẹ kẹ uyere te inọ ma rẹ sae bọ ẹrọwo mai ga ẹkwoma ọkiẹriwo ọ “uzuazọ ẹfuọ gbe orọ Ọghẹnẹ” rai!—2 Pita 3:11.
3 Evaọ ikpe-udhusoi ọsosuọ, Jesu ọ nọ inọ: “Nọ Ọmọ ohwo ọ te tha, kọ ọ rẹ te ruẹ ẹrọwọ eva akpọ na?” (Luk 18:8) Whaọ, kọ ma wo oriruo ẹrọwọ nọ a rẹ ruẹ evaọ udevie mai nẹnẹ? Kọ ma be ruẹ ezae gbe eyae, te emaha te ekpako, nọ i bi fi ẹrọwọ ọgaga họ Jihova wọhọ epanọ o jọ kẹ ahwo Ọghẹnẹ evaọ etoke Ebaibol?
4 Oriruo Ẹrọwọ Ọgbọna: A rẹ ruẹ iriruo ẹrọwọ ọgaga nọ e wariẹ omai họ! Ẹrọwọ esẹro nọ e be kobaro evaọ udevie mai u fo onọ a rẹ raro kele. (Hib. 13:7) Rekọ enana ọvo họ enọ i wo ẹrọwọ oriruo ho. Ahwo nọ e roma kpotọ nọ e gọ Jihova avọ ẹrọwọ ikpe buobu no, yọ ẹsibuobu evaọ otọ ebẹbẹ e rọ ikoko kpobi.
5 Ma re muẹrohọ inievo emetẹ ẹrọwọ mai enọ, evaọ ikpe buobu, i thihakọ ọwọsuọ ezae rai no. Eyewọ nọ ae ọvo a rọ a re muabọ kugbe use-abọ ẹyọrọ emọ. Eyae-uku nọ e kpako no e rọ udevie mai nọ iruo ukoko i re vo ho dede nọ a wo imoni ọvo nọ e sae tudu họ ae awọ họ. (Wawo Luk 2:37.) Ẹrọwọ ahwo nọ e be mọ ẹyao ọgaga u re gbe omai unu. Ahwo buobu a gbẹ be roma kpotọ gọ dede nọ a wo ezadhe nọ e be whaha ae ewo ọkwa-iruo. Isẹri eboba nọ e rehọ aruọwha dhesẹ ẹrọwọ ghelọ omukpahọ evaọ isukulu e riẹe. Omarọkẹ Ọghẹnẹ mai o rẹ ga haro nọ ma te bi muẹro họ ekobaro ẹrọwọ nọ i bi thihakọ no ukpe ruọ ukpe evaọ otọ ebẹbẹ nọ i wo umuo ho. Nwane wọhọ Pọl, oke o te jọ k’omai hi ma tẹ gwọlọ gbiku iruo Uvie kpobi gbe iruo ẹrọwọ nọ inievo emezae gbe emetẹ enana i ru no!
6 Iriruo ahwo ẹrọwọ enana e k’omai ọbọga gbe uduotahawọ. (1 Tẹs. 3:7, 8) U fo re ma rarokele ẹrọwọ rai keme “ahwo oruọzewọ a rẹ were [Jihova].”—Itẹ 12:22.