Ẹruorote Eyero Olori Na

¹ Evaọ etoke Ebaibol na orieyero ọ jọ ọkwa evaifihọ gaga. Abraham ọ kẹ orieyero riẹ owha-iruo nọ ọ rẹ rọ gwọlọ aye kẹ ọmọzae riẹ, Aiziki. (Emu. 24:1-4) U dhesẹ nọ, orieyero na o wo owha-iruo nọ ọ rẹ rọ ruẹ nọ uyẹ Abraham o nyaharo. Kinọ owha-iruo! Agbẹta nọ Pọl ukọ na ọ rọ ta nọ: “A guọlọ nọ irieyero na a rẹ jọ ahwo eva-ifihọ”!—1 Kọr. 4:2.

Iruo-Orieyero Oleleikristi

² A dhesẹ abọ jọ odibọgba Oleleikristi evaọ Ebaibol na wọhọ iruo-orieyero. Wọhọ oriruo, Pọl ukọ na ọ ta kẹ ahwo Ẹfẹsọs kpahe “iruo odibo-ọgba aruoriwo Ọghẹnẹ nọ ọ kẹ omẹ fiki rai.” (Ẹf. 3:2; Kọl. 1:25) O riwi owha-iruo riẹ re ọ wha emamọ usi na se erẹwho na wọhọ iruo-orieyero nọ ọ rẹ yọrọ avọ ẹrọwọ. (Iruẹru 9:15; 22:21) Pita ukọ na o kere se inievo riẹ nọ a wholo nọ: “Whai ohwo ọ hẹ ghọ ohwo, ababọ [ẹguọ]. Wọhọ epanọ omomọvo o wo okẹ no, rehọ iẹ ru iruo kẹ ohwo ohwo, wọhọ irieyero oghoghẹrẹ aruoriwo Ọghẹnẹ.” (1 Pita 4:9, 10; Hib. 13:16) Eware iwo kpobi nọ Ileleikristi ikpe-udhusoi ọsosuọ yena a wo yọ onọ u no aruoriwo Jihova ze. Fikiere, a jọ irieyero eware eyena yọ o gwọlọ re a rehọ ae ruiruo evaọ edhere Oleleikristi.

³ Nẹnẹ na, Isẹri Jihova a wo oghẹrẹ eriwo ọvo na re. A rehọ oma rai mudhe kẹ Jihova Ọghẹnẹ no a te je rri eware nọ a wo kpobi—izuazọ rai, ẹgba rai, ekwakwa iwo rai—wọhọ ibi ọ “oghoghẹrẹ aruoriwo Ọghẹnẹ.” Wọhọ emamọ irieyero, a wo iroro ọvunu-oguo kẹ Jihova Ọghẹnẹ kpahe oghẹrẹ nọ a rehọ eware enana ruiruo riwi. Ofariẹ, a kẹ rae eriariẹ emamọ usi na. Onana o tẹ jẹ rọ oware nọ a muhọ ae abọ nọ a gwọlọ ro ruiruo evaọ obọdẹ edhere nọ ọ mae lọhọ: re a kpare odẹ Jihova kpehru je fiobọhọ kẹ amọfa re a wo eriariẹ uzẹme na.—Mat. 28:19, 20; 1 Tim. 2:3, 4; 2 Tim. 1:13, 14.

⁴ Ẹvẹ Isẹri Jihova a bi ruiruo rai wọhọ irieyero? Iyẹrẹ ẹgbukpe na i dhesẹ nnọ evaọ ukpe n’ukpo na ọvo, wariẹ akpọ na họ a raha euwa nọ i bu vi ima-odu rọ vuẹ “ovuẹ usiuwoma uvie na” je ru iwuhrẹ Ebaibol bu vi 4,500,000 kugbe ahwo nọ a wo isiuru. (Mat. 24:14) Ẹrọwọ rai wọhọ irieyero Jihova o te je dhesẹ oma via ẹkwoma okẹ unevaze rai kpahe iruo akpọ soso na gbe evaọ uketha Egwa Uvie, ẹkwoma ọghoruo rai kẹ esẹro ọnyawariẹ gbe amọfa, jegbe ẹkwoma ẹwo rai nọ o thesiwa rọkẹ enọ i wo ẹgwọlọ—wọhọ ahwo nọ ẹmo o le n’uwou. Wọhọ utu, Ileleikristi uzẹme a be rẹro te eyero Olori na ziezi.

“Odibo Oruọzewọ Avọ Areghẹ”

⁵ Iruo-orieyero orọnikọ oma omomọvo ọvo o rẹ jọ họ rekọ o rẹ jọ oma ukoko soso re. Jesu o se ukoko Ileleikristi nọ a wholo eva otọakpọ nnọ “odibo oruọzewọ avọ areghẹ.” (Luk 12:42) Owha-iruo “odibo oruọzewọ” nana họ re ọ “rehọ emu kẹ” jẹ kobaro evaọ ovuẹ emamọ usi na evaọ akpọ soso. (Evia. 12:17) W’obọ kugbe onana, utu odibo oruọzewọ, nọ Ugboma Esuo na o rọ ubiẹro kẹ na, u wo owha-iruo nọ Ọghẹnẹ ọ kẹ riẹ re ọ rehọ “talẹnti” iwo gbe erọ abọ-ẹzi ro ruiruo ziezi. (Mat. 25:15) Nya lele oriruo “odibo oruọzewọ” na, uwou-ogha kpobi ọ be daoma re ọ rehọ azọhọ igho kpobi ruiruo ziezi, rọkẹ ẹnyaharo isiuru Uvie na. A bi ru unevaze utioye na kpobi wọhọ oware nọ a muhọ ohwo obọ, yọ “odibo oruọzewọ avọ areghẹ” na o wo owha-iruo nọ ọ rẹ rọ ruẹ nọ a rehọ e rai ruiruo lele ẹjiroro rai jegbe nnọ a rehọ e rai ruiruo avọ areghẹ, owowa, gbe edhere obọdẹ.

⁶ A rẹ ruẹ oriruo ọrọ igho unevaze nọ a bi ro ruiruo avọ areghẹ na evaọ ẹrro haro ọ iruẹru ebe ikporo Isẹri Jihova evaọ etoke ikpe-udhusoi avọ 20 na. Ẹghale ọ Ebaibol avọ ebe Ebaibol—emagazini, ebe, ibroshọ, emebe, emebe-evẹvẹ, gbe Usi Uvie—i wo abọ ologbo no evaọ ẹvaha “usiuwoma” evaọ “edẹ urere” enana. (Mak 13:10; 2 Tim. 3:1) Yọ emagazini ọ Uwou-Eroro Na o rọ okwakwa nọ o raro evaọ ẹghale ‘emu ẹruoke’ rọkẹ “uviuwou Ọghẹnẹ” avọ egbẹnyusu rai, “otu obuobu” ọrọ “igodẹ efa” na.—Mat. 24:45; Ẹf. 2:19; Evia. 7:9; Jọn 10:16.

⁷ Vẹre, Isẹri Jihova a jẹ hẹ hwa igho kẹ ahwo re a kporo ebe kẹ ae. Rekọ evaọ etoke ikpe ọ 1920 na, a tẹ j’iroro nnọ o te mai woma jẹ kẹ erere abọ-ẹzi otẹrọnọ idibo Jihova a kporo ebe k’omobọ rai. Muhọ evaọ edhere ọkakao evaọ 1920, iruo ebe ikporo na e tẹ rro ẹmẹrera evaọ Brooklyn, New York, bẹsenọ e rọ rro gaga. Evaọ 1967 ekwakwa ebe-ikporo na e rehọ ite ene ọ okpẹhwo. A jọ evaọ ekwotọ efa muọ ebe họ ekporo re, rekọ evaọ ibuobu rai, Ẹmo Akpọ II o bru rai dhe.

⁸ Makọ epanọ iruo ebe ikporo na e rro te evaọ United States kẹhẹ, o rro te epanọ o sai ro kporo ebe kẹ akpọ na soso ho. Fikiere, evaọ ikpe nọ i lele ẹmo na, a te muọ iruẹru ebe ikporo họ evaọ erẹwho efa, te Canada, Denmark, England, Grisi, South Africa, Switzerland, gbe West Germany. Ofariẹ evaọ emuhọ etoke ikpe ọ 1970, yọ a kuọ Australia, Brazil, Finland, Ghana, Japan, Nigeria, gbe Philippines kugbe unu erẹwho na no. Erẹwho enana jọ a re je kporo ebe ikokoli. Evaọ emuhọ ikpe ọ 1970, a rehọ ona ọ ebe ikporo ro wuhrẹ imishọnare ọ Gilead je vi ai kpohọ ekwotọ enana jọ re a fiobọhọ kẹ inievo obei evaọ iruo ebe ikporo.

⁹ Evaọ etoke ikpe ọ 1980, unu ọ erẹwho nọ a jọ je kporo emagazini u kpehru te 51.a Ẹvẹ onana o rọ obọdẹ eroruiruo ekwakwa Olori na te! Ẹvẹ onana o rọ imuẹro egaga ọ ẹvi iruo Uvie na te! Kọ ẹvẹ onana o rọ isẹri egaga te rọ kẹ uketha unevaze orọ omomọvo ọ ima Isẹri Jihova nọ e be ‘rehọ eyero rai kẹ ỌNOWO na adhẹẹ’! (Itẹ 3:9) Fikiere, a dhesẹ oma rai vevẹ evaọ idhere sa-sa wọhọ emamọ irieyero erọ oware nọ Jihova ọ rọ ghale ai no.

A Kpaova Ruẹ Enwene

¹⁰ Evaọ etoke ikpe ọ 1970 gbe emuhọ ikpe ọ 1980, ẹnyaharo ologbo ọ jọ evaọ ona ebe ikporo, yọ Isẹri Jihova a te nwene kpohọ ona ebe ikporo ekpokpọ. Vẹre, oghẹrẹ ebe ikporo ọ ewẹ-ebe gbe ọbia anwae na a je ro ruiruo. Ẹmẹmera onana u te nwene nọ a muọ ebe ikporo ijini ọgbọna họ efihiruo no. Fiki onana, a bi kporo ebe iwowoma avọ ifoto ekọlọ sa-sa, viukpọ ifoto ekọlọ ivẹ na (obiebi gbe ekọlọ ọfa) nọ e jẹ hae jọ erọ ewẹ-ebe gbe ọbia anwae na. Ofariẹ, ona-eware-ikuo kọmputa u te nwene edhere ọ omaruẹrẹhọ kẹ ebe ikporo. Isẹri Jihova a te kuọ Ona Ukporo-Ebe Evẹrẹ Ibuobu Ẹlẹtroniki (MEPS), ona kọmputa nọ a bi ro kporo ebe enẹna evaọ evẹrẹ sa-sa nọ i bu vi 370. A jọ uvumọ oria ofa wo ẹjini nọ ọ wọhọ MEPS evaọ ẹgba riẹ nọ o re ro kporo evẹrẹ buobu hu.

¹¹ Ẹkwoma obufihọ ona kọmputa ọ MEPS gbe iruẹru ona ofa wọhọ ovuẹ ẹlẹtroniki na, ẹnyaharo ologbo ọfa ọ roma via evaọ ẹruẹrẹ emuore eva ẹruoke. Vẹre, nọ a jẹ rehọ ona-eware-ikuo anwae ruiruo, eme nọ e jẹ hae jọ emagazini evaọ evẹrẹ efa e jẹ hae rehọ emerae hayo tubọ ukpe ro kpemu vi ọrọ Oyibo. Enẹna, a bi kporo Uwou-Eroro Na evaọ evẹrẹ 115 ususu, gbe Awake! evaọ evẹrẹ 62. Koyehọ wariẹ akpọ na họ bu vi ahwo 95 evaọ udhusoi nọ i bi kpohọ Ewuhrẹ Uwou-Eroro ọ Isẹri Jihova koka-koka na a bi wuhrẹ uzoẹme ovona evaọ oke ovona. Ẹvẹ oghale nana o rro te! O ghinẹ jọ obọdẹ efihiruo eyero Olori na re a rehọ ona-ikuẹku ekpokpọ eyena kpobi ro ruiruo!

Ẹgwọlọ Sa-Sa Ukoko Na

¹² Ena ekpokpọ enana i nwene ẹgwọlọ ukoko ọrọ edhere ebe-ikporo Isẹri Jihova evaọ akpọ na soso. Ijini nọ i re kporo eme fihọ ikpulu-ebe e rẹ vẹrẹ vi erọ ewẹ-ebe gbe ọbia anwae na, rekọ eye e mae ghare. Ona kọmputa nọ u re fiobọhọ iruo na, wọhọ ekere, efafa, esifihotọ, gbe ẹruẹrẹhọ eme gbe iwoho na, dede nọ e rẹ lẹliẹ iruo mae lọhọ na, eye e mae ghare. U lehie he a tẹ te ruẹ vevẹ nnọ o rọ kuoku hu re a kporo emagazini evaọ erẹwho 51 sa-sa. Fikiere, evaọ etoke ikpe ọ 1990, “odibo oruọzewọ” na ọ tẹ wariẹ fiẹrohotọ kẹ uyero na. Kọ ẹvẹ o ro ku ei họ?

¹³ Otokiẹ u dhesẹ nọ “eyero” nọ Isẹri Jihova gbe egbẹnyusu rai a be zọhọ na i ti w’iruo woma viere otẹrọnọ a fi ọ iruo ebe-ikporo na họ oria ovo. Fikiere unu ọ egha nọ i bi kporo ebe e tẹ kawo ẹmẹrera. Germany o muọ emagazini gbe ebe họ ekporo kẹ ekwotọ buobu no evaọ abọ Ovatha-Ọre gbe Ukiediwo-Ọre ọ Europe, kugbe ejọ nọ i je kporo ebe kẹ oma rai vẹre. Itali o bi kporo emagazini gbe ebe kẹ abọjọ Africa gbe obọze-ovatha-ọre ọ Europe, kugbe Grisi gbe Albania. Evaọ Africa, Nigeria gbe South Africa ọvo a be jọ kporo emagazini. Ọwhẹgbe otiọye na ọ roma via wariẹ akpọ na họ.

Eware nọ A re Roro Kpahe

¹⁴ Evaọ July 1998, a te siọ emagazini ba ekporo evaọ erẹwho Europe buobu, kugbe Austria, Denmark, France, Grisi, Netherlands, gbe Switzerland. Britain, Finland, Germany, Itali, Spen, gbe Sweden e te wha owha ọ ebe-ikporo evaọ Europe. Evaọ edhere nana, a vẹ whaha araha igho jẹ rehọ unevaze kpobi ruiruo ziezi kẹ iruo akpọ soso na. Kọ ẹvẹ a rọ j’iroro erẹwho nọ a te gbẹ jọ kporo ebe gbe enọ e te seba ekporo? Evaọ ẹnya lele ujaje nọ a kẹ riẹ re ọ rẹro te eyero Olori na avọ areghẹ, “odibo oruọzewọ” na ọ rẹ roma t’otọ wawo ewoma ebe-ikporo evaọ oria ovuovo.

¹⁵ Ẹjiroro ologbo nọ a rọ siọ ebe ba ekporo evaọ erẹwho jọ je fi ai họ oria ovo họ fiki oware nọ o mai kiehọ. Re orẹwho ovo u kporo ebe kẹ ekwotọ buobu oye o mae foma jẹ rọ edhere nọ ọ mai woma ọrọ eroruiruo ekwakwa eghaghae. Eria nọ a be jọ kporo enẹna họ eria nọ araha na ọ jẹ mai kpotọ, nọ a jẹ ruẹ ekwakwa, gbe oria nọ a jẹ sae fa ebe na vẹrẹ kpohọ erẹwho efa. Fikiere, a be rehọ eyero Olori ro ruiruo ziezi. Dede na, re a seba ekporo evaọ orẹwho jọ u dhesẹ nọ iruo usiuwoma na u ti serihọ evaọ etẹ hẹ. A ti gbe siobọno ebe nọ a kporo buobu, yọ idu egba ọ Isẹri Jihova buobu evaọ ekwotọ eyena a te gbẹ ta “usiuwoma udhedhẹ” kẹ erivẹ rai avọ ọwhọ. (Ẹf. 2:17) Ofariẹ, ọwariẹ ruẹrẹhọ nana ọ wha irere efa ze no.

¹⁶ Re ma fodẹ erere ọvo jọ, a vi ijini ọgbọna buobu no Denmark, Grisi, Netherlands, gbe Switzerland kpohọ Nigeria gbe Philippines. Ahwo nọ a rẹ sae rọ ijini na ruiruo evaọ erẹwho Europe a jẹ uzizie na rehọ re a wha ijini na vrẹ je wuhrẹ ahwo nọ a te j’obei rehọ ai ruiruo. Fikiere, enẹna erẹwho eyena i bi wo emagazini iwoma evona nọ ekwotọ efa i wo no.

¹⁷ Roro erere ọfa: Enẹna umutho ekwotọ nọ a gbẹ be jọ kporo na eye e be wha owha araha ugho emagazini ikporo na. Fiki onana, evaọ ekwotọ nọ a jọ seri ebe ikporo họ no, igho e riẹ no nọ a bi ro ru eware efa, wọhọ ebabọ Egwa Uvie gbe obufihọ re a rẹro te ẹgwọlọ inievo mai nọ e rọ ekwotọ nọ i yogbe. Fikiere, re a rehọ eyero Olori na ruiruo ziezi u dhesẹ nnọ eme Pọl ro se ahwo Kọrint na e rẹ sai w’iruo kẹre te akpọ na soso viere inọ: “Rekọ orọnọ mẹ ta nọ oma o fọ edekọ re uye o bẹ owhai hi, re o jọ ẹrẹrẹe, oke onana nọ o [rọ] owhai oma ziezi na, wha kae onọ o kare rae.”—2 Kọr. 8:13, 14.

¹⁸ Fiki ọwhẹgbe ọnana, Isẹri Jihova wariẹ akpọ na họ a lafi ohwohwo kpekpe vi epaọ ọsosuọ no. O rọ ẹbẹbẹ kẹ Isẹri Jihova obọ Denmark he re a kporo emagazini rai evaọ Germany, dede nọ a jẹ hai kporo erọ obọrai vẹre. A vọ avọ uyere rọkẹ iruo inievo obọ Germany rai. Kọ eva e be dha Isẹri Jihova evaọ Germany inọ a be rehọ unevaze rai kporo ebe Ebaibol kẹ Denmark—hayo Russia, Ukraine, gbe ekwotọ efa? Ijo! Eva e be were ae inọ a be sae rehọ unevaze inievo rai evaọ ekwotọ eyena ro ru ẹjiroro efa nọ i fo.

Ẹruorote Eyero Na

¹⁹ Evaọ Ọgwa Uvie Isẹri Jihova kpobi wariẹ akpọ na họ, etehe unevaze ọ riẹ nọ a kere fihọ nọ “Unevaze kẹ Iruo Society Akpọ Soso Na—Matiu 24:14.” Oke kpobi nọ ẹgwọlọ ọ roma via a rẹ rehọ unevaze nọ a yare mi ahwo ho na nọ a fihọ itehe eyena ro ruiruo. “Odibo oruọzewọ” gbe uwou-ogha kpobi ọ rẹ jiroro epanọ a rẹ rehọ unevaze na ruiruo. Fikiere, oria nọ uzi o jọ k’uvẹ, ugho nọ a fihọ etehe unevaze evaọ orẹwho jọ o rẹ sai fiobọhọ kẹ iruo Isẹri Jihova evaọ orẹwho ofa evaọ ikilomita idu buobu thethabọ. A rehọ unevaze evaọ ekwotọ jọ ruiruo ro fiobọ idudhe họ kẹ ibe ẹrọwọ nọ e be ruẹ uye no fiki ofou-ọwhibo, okpofou, etọ nọ i re nuhu, gbe ẹmo omoma. Yọ a be rehọ unevaze itieye na rọ tha imishọnare uke evaọ ekwotọ nọ i bu vi 200.

²⁰ Evaọ ikoko Isẹri Jihova, wọhọ uzi nọ a wo, ẹsiẹvo amara a rẹ t’ẹme kpahe ugho—yọ a re ru ei evaọ umutho iminiti gheghe. A re ghoro umudo evaọ Egwa Uvie hayo ikokohọ họ. A re vi ebe se ahwo rọ yarọ igho ho. A re zizie ahwo ze te kẹ obufihọ ugho ho. Wọhọ epanọ o rọ, uzoẹme ovuọvo o rẹ jọ Uwou-Eroro Na evaọ ẹgbukpe nọ o dhesẹ epanọ ahwo nọ a gwọlọ a sai ro ru unevaze se Watch Tower Bible and Tract Society re a tha iruo akpọ soso na uke. A rẹ fodẹ araha ugho Society evaọ Awake! hi. Otẹrọ ere, kọ ẹvẹ a bi ro ruiruo ilogbo usiuwoma ota na, ebabọ Egwa Uvie nọ i fo, ẹruorote ahwo nọ a rọ obọdẹ iruo odibọgba oke-kpobi, gbe obufihọ kẹ Ileleikristi nọ e gwọlọ obufihọ na gba? Jihova ọ rehọ ẹzi ọghoruo rọ ghale ahwo riẹ no evaọ edhere igbunu. (2 Kọr. 8:2) Ma rehọ uvẹ onana yere ahwo kpobi nọ a w’obọ no evaọ ‘eyero rai nọ a be rọ kẹ ỌNOWO na adhẹẹ.’ O rẹ sai mu ai ẹro inọ “odibo oruọzewọ” na ọ te rẹro te eyero Olori na haro. Yọ ma lẹ nnọ Jihova ọ gbẹ ghale ọruẹrẹfihọ kpobi nọ a ru rọkẹ erukẹre iruo akpọ soso na.

[Footnotes]