“Wo Ithihakọ”
1 Nọ ma be ruẹ ekuhọ eyero anwae ọrọ Setan nọ o bi sikẹle na, o r’oja re ma “wo ithihakọ” nọ ma be hẹrẹ ẹdẹ usiwo Jihova na. Maero eva auwa urere ọnana, ewegrẹ imuemu a gwọlọ kpọ ovao mai no avro ologbo ọrọ isuẹsu Jihova jẹ be dao omai re isiuru omobọmai buobu e kpọ ovao mai kurẹriẹ. Evaọ edhere ọnana, Setan ọ rẹ viẹ omai họ dobọji hayo serihọ evaọ iruo usiuwoma ota Uvie na. (Jem. 5:7, 8; Mat. 24:13, 14) Kọ idhere vẹ ma sae jọ dhesẹ ithihakọ itieye na?
2 Ẹkwoma Omonyẹ: Nọ ma tẹ rẹriẹ ovao ku ababọ-isiuru hayo ọwọsuọ evaọ odibọgba mai, omonyẹ u re fiobọhọ k’omai tilẹmu evaọ usiuwoma ota. Ozọ o rẹ nwani mu omai hayo kake dheva ha otẹrọnọ ahwo nọ ma nyaku a rrọ eva gaga. (1 Pita 2:23) Ẹgba ob’eva ọnana o rẹ sae whaha ẹme oyoma nọ ma rẹ ta kpahe ahwo nọ a rrọ ẹkwotọ mai nọ i bi dhesẹ ababọ-isiuru hayo egrẹ kpahe iruo mai, vuhumu nnọ oghẹrẹ eme itieye na i re whrehe omai avọ ahwo nọ a bi lele omai ruiruo evaọ odibọgba na.
3 Ẹkwoma Akothiho Etilẹmu: O rẹ sai mi omai akothiho otẹrọnọ okenọ ma tẹ ta obọdẹ eme no evaọ obọ usiuwoma, ma gbẹ sai di ohwo nọ o wo isiuru na họ uwou viere he. Epọvo na o rẹ jọ otẹrọnọ ahwo nọ ma bi ru ewuhrẹ kugbe a bi wo ẹnyaharo vẹrẹ hẹ hayo a bi dikihẹ whawha kẹ uzẹme na ha. Dede na, akothiho ọ etilẹmu ọ rẹ wha emamọ iyẹrẹ ze ẹsibuobu. (Gal. 6:9) Oniọvo ọmọtẹ jọ o zihe bru uvovo-aye jọ unuẹse buobu taure uwuhrẹ Ebaibol u te ti ghine muhọ. Evaọ iweze isoi ọsosuọ na, aye na o wo uvẹ vievie he. Evaọ iweze avọ ezeza na, oma oniọvo ọmọtẹ na o tẹ vo kpobi no evaọ okposo jọ, rekiyọ o di uvumọ ohwo họ uwou hu. Ghele na, fikinọ ọ gba riẹ mu re ọ kẹ aye na uvẹ ofa jọ, oniọvo ọmọtẹ na ọ tẹ wariẹ zihe o te di aye na họ nọ ọ ruẹrẹ oma kpahe kẹ ewuhrẹ no. No okioye vrẹ, ọmọ-uwuhrẹ na o te wo ẹnyaharo ziezi yọ evaọ omoke kpẹkpẹ ọ tẹ rehọ uzuazọ riẹ mudhe kẹ Jihova.
4 Ma riẹ nọ ẹdẹ Jihova o ti lehie he. Fikiere ma be hẹrẹ epanọ o re nwene eware fihọ, riẹ nọ ithihakọ Ọghẹnẹ e te mọ emamọ ubi. (Hab. 2:3; 2 Pita 3:9-15) Ma re wo ithihakọ hrọ wọhọ Jihova, ma gbe sobọhọ evaọ odibọgba na ha. “Fiki odiri gbe orọwọ,” rẹro so Jihova re ọ hwosa k’owhẹ evaọ iruo abọ ra.—Hib. 6:10-12.