Eme Whọ te Ta kẹ Ohwo Muslim?
1 Kọ who sisẹri kẹ ohwo Muslim no ẹdẹjọ? Otẹrọ ere, ẹsejọhọ whọ riẹ no inọ ahwo Muslim a wo orọwọ ogaga kpahe Ọghẹnẹ. Dede na, umutho ọvo a riẹ kpahe Aparadase otọakpọ wọhọ epanọ eruẹaro Jihova e ruẹ, yọ ma gwọlọ re ma ghale ẹruore ọyena kugbe ai. (1 Tim. 2:3, 4) Evuẹ obotọ na i re fiobọhọ kẹ owhẹ se emamọ isẹri.
2 Ahwo Muslim a rọwo Allah, hayo Ọghẹnẹ, yọ a rọwo nnọ Muḥammad yọ ọruẹaro Ọghẹnẹ. Obe ẹri rai họ Koran, yọ a re se egagọ rai Islam, nọ otofa riẹ o rrọ “omarọkẹ.” Koran na o ta nnọ ọrue-ọta gbe egagọ emedhọ e thọ, inọ Ọghẹnẹ yọ omọvo, gbe nnọ ọ rrọ abọjọ Esanerọvo ho. Ofariẹ, u wuhrẹ ẹwẹ nọ o re whu hu, erae ehẹle, gbe aparadase obọ odhiwu. Ahwo Muslim a rọwo Ebaibol na wọhọ Ẹme Ọghẹnẹ rekọ a rọwo nnọ a nwene i rie no, rekinọ Koran, evaọ ẹvẹrẹ nọ a kaki ro kere ie na, o gbẹ rrọ kọkọkọ.
3 Wo Oma ọ Ogbẹnyusu, Ẹghẹ, gbe Orimuo: Okenọ who te bi lele ohwo Muslim t’ẹme, wo oma ogbẹnyusu avọ ẹghẹ. (Itẹ 25:15) Woi fihọ iroro nọ orọwọ Muslim e rrọ gaga gbe nnọ uzuzou a ro wuhrẹ ai. Fikiere, iroro-ejẹ kpahe iwuhrẹ egagọ gbe edhesẹvia kẹ oma rai kpahe oreva Ọghẹnẹ o rrọ abọ ẹnyaharo abọ-ẹzi rai hi. (Rom 12:2) Re a fiobọhọ kẹ ahwo Muslim, ithihakọ gbe otoriẹ e r’oja.—1 Kọr. 9:19-23.
4 Whaha eme nọ e rẹ lẹliẹ ohwo Muslim riwi owhẹ kugbe Kristẹndọm. Ru ei vevẹ inọ who wo abọ ọvo kugbe egagọ Kathọlik hayo Protẹstant he, inọ who wo ẹhẹriẹ. Fodẹ Ebaibol na wọhọ Obe Ọghẹnẹ. Nọ ahwo Muslim a wo omukpahe kẹ ẹme na “Ọmọ Ọghẹnẹ” na, o rẹ mai woma re whọ se iẹ ba eroruiruo hayo re whọ se uzoẹme na ba ẹta kpahe bẹsenọ o re wo ẹnyaharo abọ-ẹzi no. Dede na, whọ rẹ sae ta kpahe Jesu, be fodẹ iẹe wọhọ ọruẹaro hayo ọnyukọ. Whaha ikẹ-isio. Otẹrọnọ who muẹrohọ nọ evaedha e be tha, rehọ oma uwowolẹ nya vrẹ ababọ oke oraha.
5 O rẹ mai woma re a lele omọvo rai t’ẹme orọnikọ otu hu. Wọhọ epanọ o rrọ, u re woma re aye o s’isẹri kẹ aye, gbe ọzae, o ve s’isẹri kẹ ọzae. Uzẹme, ẹsejọ onana u re nwene, rekọ o gwọlọ areghẹ. Ofariẹ, ahwo Muslim buobu a rẹ kaki muẹrohọ oware nọ a roro fihọ osẹ gbe ẹgọ nọ o fo kẹ eyae he. O gwọlọ re inievo-emetẹ e riẹ kpahe onana.—1 Kọr. 10:31-33.
6 Eware nọ A rẹ t’Ẹme Kpahe: Rehọ oruọzewọ t’ẹme kpahe oruaro Ọghẹnẹ gbe uyoyou riẹ. Whọ siẹe ba ẹta ha inọ whẹ yọ ọrọ orọwọ uzẹme, inọ Ọghẹnẹ yọ omọvo (orọnikọ Esanerọvo ho), gbe nnọ egagọ emedhọ e thọ. T’ẹme kpahe emuemu evaọ akpọ inẹnẹ—emo, ozighi-omoma ọ orẹwho, egrẹ uyẹ, gbe ọviẹwẹ nọ a rẹ ruẹ evaọ udevie ahwo egagọ buobu.
7 Ibroshọ na The Guidance of God—Our Way to Paradise o rẹ k’owhẹ otoriẹ viere kpahe izoẹme nọ a rẹ sai ro ruiruo ro mu ẹme họ kugbe ahwo Muslim. A ru rie re o were ahwo Muslim nọ e be rria oria nọ oma o jẹ fọ ae re a wuhrẹ Ebaibol.
8 Evaọ edhere usiuwoma ota, whọ sae ta nọ:
◼ “Mẹ be daoma gaga re me lele ahwo Muslim t’ẹme. Mẹ be hai se kpahe egagọ rai yọ u mu omẹ ẹro nọ me roro gba inọ ahwo Muslim a rọwo Ọghẹnẹ ọvuọvo jẹ rọwo eruẹaro na kpobi. [Kuvẹ kẹ uyo.] Mẹ gwọlọ lele owhẹ t’ẹme kpahe eruẹaruẹ anwae jọ nọ e ta kpahe enwene otọakpọ na fihọ aparadase. Ẹvẹ me se oware nọ ọruẹaro na o kere ze? [Se Aizaya 11:6-9.] Eruẹaruẹ nana e lẹliẹ omẹ roro kpahe oria Koran jọ nọ a kere fihọ ibroshọ nana.” Rovie kpohọ ẹwẹ-obe avọ 9 evaọ ibroshọ Guidance of God na, re who se oria nọ a rehọ ibiẹme nọ i mu gbalọ kere na, enọ e ta kpahe ikiẹrẹe nọ e te rehọ otọakpọ na riuku na. Otẹrọnọ o dhesẹ isiuru, whọ vẹ gbẹ t’ẹme na haro ẹkwoma ẹta-kpahe edhe-ẹme avọ 7 rite 9 evaọ ẹwẹ-obe abọdekọ na. Nya siọ ibroshọ na ba kẹe, re who ru ọruẹrẹfihotọ kẹ ozihebro.—Rọkẹ edhere usiuwoma ota ọfa, rri Odibọgba Uvie Mai ọrọ February 1998 ẹwẹ-obe avọ 6, edhe-ẹme avọ 26.
9 Okenọ who te bi zizie ohwo re o se ibroshọ Guidance of God na, o rẹ mai woma re who sei nọ ẹmeọta-kugbe, orọnọ uwuhrẹ Ebaibol ho. Okenọ ibroshọ na i te te oka no, ọmọ-uwuhrẹ na ọ rẹ ruẹrẹ oma kpahe re o wuhrẹ ibroshọ Gwọlọ na hayo obe Eriariẹ na. Ebe efa nọ a dabe ruẹrẹhọ kẹ ahwo Muslim họ omobe-ovẹvẹ na How to Find the Road to Paradise gbe omobe na The Time for True Submission to God.
10 Avọ eriariẹ nana kpahe orọwọ Islam gbe areghẹ odhesẹ, ma rẹ sai dhesẹ orimuo evaọ ẹsalọ ebe nọ ma rẹ rọ kẹ ahwo Muslim gbe evaọ edhere nọ ma re ro s’isẹri kẹ ae. Jọ Jihova ọ gbẹ ghale omodawọ mai nọ ma bi fiobọhọ kẹ ahwo oghẹrẹ kpobi re a se odẹ riẹ re a wo esiwo na.—Iruẹru 2:21.