Eme Ọ rẹ Sai Fiobọhọ k’Omai Dikihẹ Ga Evaọ Ẹrọwọ Na?
1 Anwẹnọ ma ro muọ usu họ ẹnya kugbe ukoko Jihova, ẹnyaharo abọ-ẹzi mai ọ be hae wha oghọghọ se omai! Ghele na, re ma ruabọhọ ‘owọ-otamuo, edikihẹ ga, gbe oma ukruga evaọ ẹrọwọ na, ẹrro ẹsikpobi evaọ abọ-ẹzi o r’oja. (Kọl 2:6, 7) Nọ ahwo buobu a be nyaharo gaga evaọ abọ-ẹzi na, ejọ i vru no fikinọ a “dikihẹ ga evaọ orọwọ” na ha. (I Kọr. 16:13) Ma rẹ sae whaha onana re o se omai ba ẹvia kẹ. Evaọ oghẹrẹ vẹ?
2 Iruẹru Abọ-Ẹzi Ẹsikpobi: Wo emamọ omaa-iruo abọ-ẹzi nya lele ukoko Jihova. Etenẹ a be jọ rẹrote ẹgwọlọ abọ-ẹzi mai vọvọ. Iwuhrẹ ukoko gbe ikokohọ e rẹ bọ omai ga kẹ orro gbe oma ukruga ulogbo abọ-ẹzi, otẹrọnọ ma re kpohọ ae ẹsikpobi re ma wo irere. (Hib. 10:24, 25) Omaa-iruo orọ isase Ebaibol na ẹsikpobi, emagazini ọ Uwou-Eroro Na gbe Awake!, gbe ebe nọ i dhesẹ Ẹme Ọghẹnẹ kokodo e rẹ lẹliẹ awọ abọ-ẹzi mai nya diwi jẹ rro gaga. (Hib. 5:14) Efihọ itee abọ-ẹzi omobọ ohwo gbe iruo egaga re a le ai t’obọ o rẹ jẹ wha irere ikrẹkri ze.—Fil. 3:16.
3 Obufihọ Rono Obọ Enọ E Kpako No Ze: Ru usu ra kẹre te enọ e kpako no evaọ abọ-ẹzi evaọ ukoko na. Daoma riẹ ekpako na, keme ae họ ahwo ọsosuọ nọ a rẹ bọ omai ga. (1 Tẹs. 2:11, 12) Dede ohrẹ hayo ẹjiroro nọ a kẹ kpobi rehọ. (Ẹf. 4:11-16) Idibo iruiruo i wo isiuru re evaọ obufihọ kẹ amọfa re a kru oma ga evaọ ẹrọwọ na, fikiere fievahọ inievo enana kẹ uduotahawọ.
4 Kọ whọ gwọlọ obufihọ evaọ odibọgba na? T’ẹme kẹ ekpako na, re whọ yare obufihọ. Ẹsejọhọ a sai ku owhẹ kugbe ọruẹrẹfihotọ ọrọ Ekobaro A Re Fiobọhọ k’Amọfa na. Kọ whọ họ-ame obọ? Ewuhrẹ obe Our Ministry na gbe efihiruo eme nọ e rọ eva riẹ e rẹ lẹliẹ omai ru ẹnyaharo kpohọ ẹkpako abọ-ẹzi. Kọ whẹ yọ ọyewọ? Hae bọ edikihẹ abọ-ẹzi emọ ra ga ẹsikpobi.—Ẹf. 6:4.
5 Ẹkwoma ekruga gbe edikihẹ ga evaọ ẹrọwọ na, ma rẹ reawere usu okpekpe kugbe Jihova gbe usu osasa kugbe inievo mai. Onana u re fiobọhọ k’omai mudhe kẹ ohọre Setan, jẹ bọ ẹruore obaro ebẹdẹ bẹdẹ mai ga.—1 Pita 5:9, 10.