Rẹroso Jihova kẹ Ẹgba
1 Ẹjiroro buobu e riẹ nọ ma rẹ rọ rẹroso Jihova. Ẹvuẹ emamọ usi na “kẹ akpọ na kpobi” yọ iruo egbẹgbẹdẹ. (Mat. 24:14) Ẹsikpobi, ma re lele oma ọ sebaẹgba mai họre. (Rom 7:21-23) Ofariẹ, “ma bi lele . . . ikpahwo ebi akpọ nana [muabọ].” (Ẹf. 6:11, 12) O rrọ vevẹ inọ ma gwọlọ obufihọ. Kọ ẹvẹ ma sai ro wo ẹgba no obọ Jihova ze?
2 Ẹkwoma Olẹ: Jihova ọ rẹ rọ ẹzi ọfuafo ọgaga riẹ kẹ idibo riẹ nọ e yare riẹ ọvọvẹ. (Luk 11:13) Kọ whọ kare aruọwha nọ whọ sai ro se isẹri n’uwou ruọ uwou, evaọ iyẹrẹ, hayo evaọ ifonu? Ozọ isẹri-ise ọnyakuo u re mu owhẹ? Kọ ababọ-isiuru nọ ọ rrọ ẹkwotọ ra u ru ọwhọ ra kpotọ no? Kọ ẹvẹ otẹrọnọ otunyẹ ọ rrọ k’owhẹ re who siobọno ẹrọwọ ra hayo ekiete ra? Rẹroso Jihova. Lẹ kẹ ẹgba.—Fil. 4:13.
3 Ẹkwoma Ewuhrẹ Omobọ Ohwo: Nwanọ epanọ ma re wo ẹgba ẹkwoma emu iwo nọ ma rẹ re na, ere Ẹme Ọghẹnẹ gbe ebe ọ ‘ọrigbo nọ o wo ẹrọwọ avọ areghẹ na’ nọ ma rẹ rọ ko oma e rẹ k’omai ẹgba evaọ abọ-ẹzi re. (Mat. 4:4; 24:45) Okenọ a nọe oware nọ o kẹ riẹ ẹgba thihakọ ikpe buobu evaọ uwou-odi nọ ọye ọvo ọ jọ evaọ China ababọ Ebaibol, Stanley Jones ọ ta nọ: “Ma rẹ sai dikihẹ ga evaọ ẹrọwọ. Uzẹme, ma rẹ kaki wuhrẹ tao. Ma gbe bi ru uwuhrẹ hẹ ma re wo ẹgba obeva ha.”
4 Ẹkwoma Ewuhrẹ Ọnya: Evaọ ewuhrẹ Ileleikristi jọ evaọ ikpe udhusoi ọsosuọ, Judas avọ Sailas a “rọ eme buobu ta udu họ ahwo na awọ re a ruẹse dikihẹ whawha.” (Iruẹru 15:32) Epọvo na nẹnẹ re, eme nọ ma re yo evaọ obọ iwuhrẹ na i re ru ovuhumuo mai kẹ Jihova diwi viere, bọ ẹrọwọ mai ga, jẹ k’omai ajọwha rọkẹ odibọgba na. Iwuhrẹ na i re si omai kẹle “ibe iruiruo . . . rọkẹ Uvie Ọghẹnẹ,” enọ e rrọ “obufihọ ọbọga” k’omai.—Kọl. 4:11.
5 Ma gwọlọ obufihọ evaọ “oke ẹbẹbẹ” nana. (2 Tim. 3:1) Rọ kpahe enọ e rẹroso ẹgba nọ o re no obọ Jihova ze, a k’omai imuẹro nọ: “A ti wo ibekpe wọhọ erọ ugo, a te dhẹ ohrẹ oma o rẹ ro ae he, a te nyaonya aro o re bi ae he.”—Aiz. 40:31.