Dhesẹ Uvi Isiuru kẹ “Enọ I Wo Esẹ Hẹ”
1 Jihova họ “Ọsẹ enọ i wo esẹ hẹ.” (Ol. 68:5) Ọdawẹ riẹ kẹ ewoma rai o dhesẹ oma via evaọ ujaje nọ ọ kẹ orẹwho Izrẹl anwae inọ: “Wha kẹ ayeuku hayo omo-whrori ọvuọvo uye he. Otẹrọnọ wha kẹ rae uye, a tẹ viẹ se omẹ, mẹ rẹ siọ uru oviẹ rai ba eyo ho.” (Ọny. 22:22, 23) Uzi Ọghẹnẹ u te je wo ọruẹrẹfihotọ nọ o re fi obọ họ kẹ ahwo otiọye na wo ẹgwọlọ iwo rai. (Izie. 24:19-21) Evaọ otọ ọruẹrẹfihotọ Ileleikristi na, a tudu họ egegagọ uzẹme awọ re a “riwẹ imiwhrori avọ eyaukuotọ nọ uye o [be bẹ].” (Jem. 1:27) Ẹvẹ ma sae rọ raro kele uvi isiuru Jihova kẹ enọ e be rro ze evaọ iviuwou ọyewọ ọvo hayo iviuwou nọ e hẹriẹ oma evaọ egagọ?
2 Ewuhrẹ Abọ-Ẹzi: Otẹrọnọ whẹ yọ ọyewọ ọvo hayo who wo ọrivẹ-orọo nọ o kurẹriẹ hẹ, obe-uwuhrẹ Ebaibol ikẹse kẹse nọ who re ru kugbe emọ ra o rẹ sae jọ use-abọ. Rekọ uvi uwuhrẹ Ebaibol nọ a re ru ẹsikpobi o r’oja otẹrọnọ emọ na a rẹ rro te ekpako nọ e rrọ owowa nọ e kpako evaọ iroro. (Itẹ 22:6) Ẹme nọ whọ rẹ ta kugbe ai kẹdẹ kẹdẹ kpahe eware abọ-ẹzi o r’oja re. (Izie. 6:6-9) Ẹsejọ, whọ rẹ sai wo elọhoma, rekọ obọ o r’owhẹ hẹ. Lẹ se Jihova kẹ ẹgba gbe ọkpọvio nọ who bi “wuhrẹ [emọ ra] orọ Ọnowo na.”—Ẹf. 6:4.
3 Whọ tẹ gwọlọ uketha evaọ ẹruorote ewha-iruo Ikereakere ra, ta ẹgwọlọ ra kẹ ekpako na. A sae kẹ iroro-ejẹ nọ i re w’iruo k’owhẹ hayo fi obọ họ k’owhẹ ru emamọ omaa-iruo abọ-ẹzi kẹ uviuwou ra.
4 Oghẹrẹ nọ Amọfa A Sai ro Fi Obọ Họ: Evaọ ikpe-udhusoi ọsosuọ, Timoti ọ jọ odibo ajọwha ọrọ Jihova dede nọ ọ whẹro evaọ uviuwou nọ o jọ egagọ evo ho. Omodawọ oni gbe oni-ode riẹ re a wuhrẹ iẹ ikere efuafo na evaọ oke uzoge riẹ u fi obọ họ kẹ e gaga. (Iruẹru 16:1, 2; 2 Tim. 1:5; 3:15) Dede na, o wo erere no usu kugbe Ileleikristi efa ze, kugbe Pọl ukọ na, ọnọ o dhesẹ Timoti wọhọ ‘ọmọ oyoyou avọ orọwọ mẹ evaọ Ọnowo na.’—1 Kọr. 4:17.
5 Epọvo na nẹnẹ re, ẹvẹ o rẹ kẹ erere te nọ inievo nọ e kpako evaọ abọ-ẹzi ziezi a te wo isiuru kpahe emọ nọ i wo esẹ hẹ evaọ ukoko na! Kọ whọ riẹ odẹ rai ọvuọvo? Kọ who re lele ai t’ẹme evaọ iwuhrẹ Ileleikristi gbe evaọ etoke ọfa? Zizie ai re a kuomagbe owhẹ evaọ odibọgba na. Whọ rẹ sai ku ai gboma ẹsejọ, te ọyewọ ọvo nọ ọ be rẹrote ai hayo ọnọ ọ rrọ ukoko na, evaọ uwuhrẹ uviuwou ra hayo evaọ omaa aroza oma-urukpokpọ. Okenọ izoge nana e tẹ rehọ owhẹ wọhọ ogbẹnyusu rai, a rẹ sai ru lele oriruo gbe uduotahawọ ra.—Fil. 2:4.
6 Jihova o wo isiuru gaga kpahe emọ nọ i wo esẹ hẹ, yọ ọ be ghale omodawọ uyoyou mai nọ ma bi ru ro fi obọ họ kẹ ae re a rria lele uzẹme na. Ibuobu nọ e whẹro evaọ iviuwou ọ ọyewọ ọvo hayo iviuwou nọ e hẹriẹ oma evaọ egagọ a wo uduotahawọ utioye na yọ enẹna a bi ruiruo avọ ẹrọwọ wọhọ ekobaro, idibo iruiruo, ekpako, esẹro ọnyawariẹ, imishọnare, hayo ahwo uviuwou Ebẹtẹle. Ajọ mai kpobi a gwọlọ idhere nọ ma re ro “rovie eva” evaọ edhesẹ aruọdawẹ kẹ enọ i wo esẹ hẹ, evaọ aruorokele Ọsẹ obọ odhiwu mai.—2 Kọr. 6:11-13.