Ẹbọ Usu Okpekpe Kugbe Jihova
1 “Mẹ rehọ oma da ukoko na te oware wọhọ ikpe 20 no ẹkwoma iwuhrẹ gbe usiuwoma nọ mẹ be hai kpohọ ọvo,” ere oniọvo-ọmọtẹ Oleleikristi jọ ọ ta. Dede na, ọ ta haro nọ: “Mẹ ruẹ vuhumu no inọ dede nnọ ewuhrẹ gbe usiuwoma ota e r’oja, enana ọvo e sae thọ omẹ hẹ nọ ebẹbẹ e tẹ roma via. . . . Me vuhumu no enẹna inọ me re nwene iroro mẹ je muọ uvi omaa uwuhrẹ Ebaibol họ re mẹ sae ghinẹ riẹ Jihova ziezi, you rie, je wo ovuhumuo kẹ oware nọ Ọmọ riẹ ọ k’omai no.”
2 Ẹbọ usu okpekpe kugbe Jihova o gwọlọ omodawọ. O gwọlọ vi omaa iruẹru Ileleikristi nọ ma re lele ọvo. Ma gbẹ be lẹ se Jihova kẹse kẹse he, ukuhọ riẹ kọ ọ te jọ k’omai wọhọ ogbẹnyusu ọkpekpe nọ ma gbe bi yo mi hi. (Evia. 2:4) Joma kiẹ epanọ uwuhrẹ Ebaibol omobọ ohwo gbe olẹ e sai ro fi obọ họ k’omai bọ usu okpekpe kugbe Jihova.—Ol. 25:14.
3 Olẹ gbe Eroro E r’Oja: Uwuhrẹ omobọ ohwo nọ o rẹ nyate udu o gwọlọ vi usi ọvo nọ ma re si wariẹ igogo eme na evaọ obe nọ ma bi wuhrẹ na gbe ese ikereakere nọ a fodẹ na ọvo. O gwọlọ nnọ ma re roro didi kpahe oware nọ ovuẹ na u dhesẹ via kpahe idhere Jihova, itee riẹ, gbe ekwakwa oma riẹ. (Ọny. 33:13) Ewo otọriẹ eware abọ-ẹzi u re duobọte ubiudu mai jẹ wọ omai roro kpahe izuazọ mai. (Ol. 119:35, 111) Ẹjiroro nọ a re ro ru uwuhrẹ omobọ ohwo họ re a si kẹle Jihova. (Jem. 4:8) Uwuhrẹ osegboja o gwọlọ oke gbe okegbe nọ o kiehọ, yọ uwuhrẹ ẹsikpobi o gwọlọ omobọ ohwo nọ a rẹ ta họ obọ. (Dan. 6:10) O tẹ make rrọ nọ who re wo uvẹ hẹ fiki iruo, kọ who bi fi oke jọ họ kẹdẹ kẹdẹ re who roro kpahe ekwakwa igbunu Jihova?—Ol. 119:147, 148; 143:5.
4 Uvi olẹ yọ abọ ologbo jọ ọrọ emamọ uwuhrẹ omobọ ohwo. Re izẹme Ebaibol e nyate omai udu jẹ wọ omai “gọ uvi egagọ nọ i re je Ọghẹnẹ miẹ, avọ enuho gbe owhewhe,” ma gwọlọ ẹzi ọfuafo Ọghẹnẹ. (Hib. 12:28) Fikiere, ma rẹ lẹ kẹ ẹzi Jihova re ma te mu uwuhrẹ kpobi họ. (Mat. 5:3) Nọ ma bi roro kpahe Ikereakere na jẹ rehọ ebe nọ ukoko Jihova u kporo ro ru uwuhrẹ na, ma re rovie udu mai kẹ Jihova. (Ol. 62:8) Uwuhrẹ nọ ma re ru evaọ edhere otiọna yọ abọjọ egagọ nọ ma re ro dhesẹ omarọkẹ mai kẹ Jihova jẹ bọ usu mai ga kugbei.—Jud 20, 21.
5 Wọhọ epanọ o rrọ kugbe usu kpobi, re usu mai kugbe Jihova u dhe ẹruẹro evaọ uzuazọ mai, ma rẹ tua e ẹsikpobi. Fikiere, joma dẹ oke kẹdẹ kẹdẹ nọ ma re ro si kẹle Ọghẹnẹ, keme ọ te rehọ ẹkwoma enẹ si kẹle omai.—Ol. 1:2, 3; Ẹf. 5:15, 16.
[Study Questions]
1. Eme oniọvo-ọmọtẹ jọ o vuhumu kpahe iruẹru abọ-ẹzi riẹ?
2. Fikieme u ro wuzou re ma bọ usu okpekpe kugbe Jihova?
3. Oghẹrẹ vẹ a re ro ru uwuhrẹ omobọ ohwo nọ u je fi obọ họ k’omai si kẹle Jihova?
4. Ẹvẹ olẹ nọ a rẹ rọ ba uwuhrẹ omobọ ohwo u re ro fi obọ họ k’omai bọ usu okpekpe kugbe Jihova?
5. Fikieme u je wuzou re ma roro kpahe Ẹme Ọghẹnẹ kẹdẹ kẹdẹ?