Ọvẹruọ Ọkpakpata Ogbaẹmo Enyenya nọ U Kpomahọ Owhẹ
1 “Ukọ-odhiwu avọ ezeza o te kporo ọgba riẹ.” Kẹsena, ‘ogbaẹmo enyenya’ nọ i bu te “ima udhe” a te do via wọhọ edo egbrara. Onana orọnikọ ogbaẹmo gheghe he. “Izou enyenya na e wọhọ izou ikpohrokpo.” Erae, iwiri, gbe itho-erae i te no unu rai ze, yọ “iweli rai e wọhọ eraoimuomu.” Ọvẹruọ ọkpakpata ọrọ ogbaẹmo enyenya ẹwoho nana o wha ọraha ze. (Evia. 9:13-19) Kọ whọ riẹ epanọ orugba eruẹaruẹ igbunu nana u ro kpomahọ owhẹ?
2 Okiọkotọ nọ a wholo na gbe egbẹnyusu rai, igodẹ efa na, a be rọ okugbe ọvo whowho ẹdhoguo Ọghẹnẹ. Onana o be wha ẹferevia uyero uwhu abọ-ẹzi nọ Kristẹndọm ọ rrọ ze. Joma kiẹ abọ ivẹ jọ eruaruẹ na nọ i fi elo họ oware nọ odibọgba idibo Ọghẹnẹ o je wo ẹgba tere.
3 A Wuhrẹ i Rai jẹ Thọ Ae Oma Kpahe re A Whowho Ovuẹ Ọghẹnẹ: Ẹkwoma Isukulu Odibọgba Esuo-Ọghẹnẹ gbe iwuhrẹ ukoko efa, a wuhrẹ idibo Ọghẹnẹ no re a whowho ovuẹ Ọghẹnẹ avọ udu. Evaọ aruorokele Jesu gbe ilele riẹ, a be nya re a gwọlọ enọ i te via, be ta usiuwoma evaọ oria kpobi nọ a jẹ sai duku ahwo. (Mat. 10:11; Mak 1:16; Luk 4:15; Iruẹru 20:18-20) Ẹvẹ edhere usiuwoma ota nana nọ a ro no Ebaibol ze na o ghine wo iruo te no!
4 Egbodibo Ileleikristi a ghale Ebaibol, ebe, ibroshọ, gbe emagazini ima-idu buobu no evaọ ẹwhaharo iruo usiuwoma ota nọ Ọghẹnẹ ọ kẹ rai na. A kere ebe nana evaọ evẹrẹ nọ i bu te oware wọhọ 400 no, yọ e ta kpahe izoẹme sa-sa jẹ rehọ idhere nọ e rẹ were oghẹrẹ ahwo sa-sa ro ru iruo no. Kọ whọ be rehọ ebe nana ruiruo ziezi?
5 Ọkpọvio gbe Uketha nọ U no Odhiwu Ze: Eruẹaruẹ na i te je ru iei vẹ inọ iruẹru nọ a rehọ ọvẹruọ ọkpakpata ogbaẹmo enyenya ẹwoho dhesẹ na u wo uketha Ọghẹnẹ. (Evia. 9:13-15) A bi ru iruo usiuwoma ota akpọ-soso na gba, orọnikọ ẹkwoma ẹgba gbe areghẹ ohwo-akpọ họ, rekọ ẹkwoma ẹzi Ọghẹnẹ. (Zek. 4:6) Jihova ọ be rehọ ijẹle na kpọ iruo nana. (Evia. 14:6) Fikiere, avọ omodawọ Isẹri ahwo-akpọ riẹ, Jihova ọ be kẹ uketha no odhiwu ze ro si ahwo omarokpotọ bru omariẹ.—Jọn 6:45, 65.
6 Fikinọ a wuhrẹ i rai jẹ thọ ae oma kpahe re a whowho ovuẹ Ọghẹnẹ, jẹ be nya evaọ otọ ọkpọvio ijẹle, a sae whaha ahwo Jihova vievie he. Joma ruabọhọ ẹkabọ mai nọ ma re ru evaọ erugba eruẹaruẹ urirẹ nana.
[Study Questions]
1, 2. Ẹvẹ orugba eruẹaruẹ igbunu nọ a kere fihọ Eviavia 9:13-19 na u ro kpomahọ idibo Ọghẹnẹ nẹnẹ?
3. Ewuhrẹ vẹ a wuhrẹ owhẹ no re who ro whowho ovuẹ Ọghẹnẹ ziezi?
4. Ekwakwa vẹ e riẹ kẹ iwhowho-uvie buobu nọ i re fi obọ họ kẹ ai wha iruo rai họ aro?
5, 6. Eme o dhesẹ nọ ahwo Jihova a wo uketha Ọghẹnẹ?