Isẹri-Ise Ababọ Ẹmeọta
1 Ababọ ẹmeọta, emama Jihova nọ a rẹ ruẹ i bi dhesẹ oghẹrẹ ohwo nọ Jihova ọ rrọ k’omai. (Ol. 19:1-3; Rom 1:20) Epọvo na re, uruemu ezi mai, ẹgọ gbe osẹ mai i re se isẹri ababọ ẹmeọta. (1 Pita 2:12; 3:1-4) U fo re o jọ omai omomọvo oja ‘re ma jọ eva eware kpobi rehọ erru kẹ uwuhrẹ Ọghẹnẹ Osiwi mai’ ẹkwoma uruemu mai.—Tait. 2:10.
2 Ẹvẹ o sae rọ lọhọ kẹ ahwo-akpọ nọ a gba ha re a whẹ erru họ iwuhrẹ Ebaibol? Onana o sae lọhọ ẹkwoma ọkpọvio Ẹme Ọghẹnẹ gbe ẹgba ẹzi ọfuafo na. (Ol. 119:105; 143:10) Ẹme Ọghẹnẹ “ọ rẹjọ bẹdẹ, avọ iruo, ọ da vi ọpia akọava.” (Hib. 4:12) O re duobọ te udu mai, u ve fiobọhọ k’omai whẹ uruemu okpokpọ na họ oma. (Kọl. 3:9, 10) Ẹzi ọfuafo na o re fiobọhọ k’omai wo iruemu ezi wọhọ ẹwo, ewoma, ẹwolẹ, gbe oma-oriẹsuo. (Gal. 5:22, 23) Kọ mai omomọvo ma be kẹ Ẹme Ọghẹnẹ gbe ẹzi riẹ uvẹ re i ruiruo evaọ uzuazọ mai?—Ẹf. 4:30; 1 Tẹs. 2:13.
3 Amọfa A Re Muẹrohọ: Nọ ma tẹ be rria lele itee Jihova jẹ daoma rọ aro kele ekwakwa-aghae riẹ, amọfa a re muẹrohọ. Wọhọ oriruo, roro kpahe ọzae jọ nọ ibe-iruiruo riẹ a je se ẹkoko fikinọ ọ re kpẹkpẹe. Rekọ oniọvo-ọmọtẹ jọ nọ a gbẹ jọ ọfisi ọvona je ru iruo ọ jẹ hae kẹe adhẹẹ. Uruemu oniọvo-ọmọtẹ na o wọ ọzae na nọ ọ rọ nọe oware nọ o ro wo ohẹriẹ no ahwo nọ a kiọkọ. Oniọvo na ọ tẹ ta kẹe nọ ehri-izi Ebaibol nọ o bi lele evaọ uzuazọ riẹ u ru rie wo uruemu adhẹẹ. Ọ tẹ jẹ ta kẹe kpahe ẹruore ọghaghae Uvie na. Ọzae na o te mu Ebaibol na họ ewuhrẹ, te epanọ ọ rọ họ-ame. Nọ ọ kwa zihe kpohọ ẹwho riẹ, uruemu ezi riẹ o were imoni riẹ gaga, fikiere ahwo uviuwou riẹ buobu a te ti kurẹriẹ ruọ ukoko na.
4 Ma tẹ rrọ oria iruo, evaọ obọ isukulu, hayo evaọ eware nọ ma bi lele imoni gbe erivẹ mai ru, ma sae rọ ẹkwoma uruemu ezi mai gbe iruo usiuwoma ota mai ro ru nọ amọfa a jẹ kẹ Ọghẹnẹ oruaro.—Mat. 5:16.