Wuhrẹ Ona nọ Who re ro Lele Amọfa Jiroro
1 Ẹme nọ Pọl ọ ta evaọ uwou-egagọ Antiọk ọrọ Pisidia, wọhọ epanọ a kere fihọ Iruẹru 13:16-41 na, o k’omai emamọ oriruo ọrọ epanọ ma sai ro lele amọfa jiroro. Pọl o roro kpahe oware nọ ahwo nọ ọ be tẹme kẹ na a riẹ kpahe gbe oghẹrẹ iroro rai je nwene edhere usiuwoma ota riẹ lele ere. Nọ ma be te kiẹ ikuigbe nana riwi na, joma roro kpahe epanọ nọ ma sai ro ru epọvo na evaọ odibọgba mai.
2 Rehọ Oware nọ Wha jọ Wo Eriwo Ọvona Muhọ: Dede nọ ovuẹ Pọl u kie kpahe ugogo obọ nọ Jesu o wo evaọ erugba ẹjiroro Ọghẹnẹ, Pọl ọ rọ ugogo ẹme yena mu ẹmeọta riẹ họ họ. Ukpoye, ọ ta kpahe oware jọ nọ ọyomariẹ avọ ahwo i Ju nọ ọ be tẹme kẹ na a jọ rọwokugbe—ikuigbe ahwo i Ju. (Iruẹru 13:16-22) Evaọ edhere ọvona, ma te sai wo iroro amọfa tobọ otẹrọnọ ma rẹ rehọ eware nọ ma jọ wo eriwo ọvona mu ẹme họ. Onana o sae gwọlọ nọ ma wo iroro rai tobọ ẹkwoma enọ nọ ma rẹ rọ areghẹ nọ jẹ gaviezọ ziezi re ma sae riẹ oware nọ o rrọ ae oja.
3 Nọ Pọl ọ jẹ ta kpahe ikuigbe ahwo i Ju, ọ kareghẹhọ ahwo nọ ọ jẹ tẹme kẹ na kpahe eyaa Ọghẹnẹ ọrọ Osiwi nọ o ti no uyẹ Devidi ze. Dede na, ahwo i Ju buobu a je rẹro ọgba-ẹmo nọ o re ti si ai no otọ esuo ahwo Rom jẹ kpare orẹwho ahwo i Ju kpehru vi erẹwho efa kpobi. Ababọ avro, a riẹ inọ isu egagọ ahwo i Ju nọ e rrọ Jerusalẹm a siọ Jesu, rehọ iẹe kẹ isu ahwo Rom, a te kpei. Ẹvẹ Pọl ọ te sae rọ tẹzẹ ae re a rọwo inọ Ọnana họ Mesaya nọ a ya eyaa riẹ na?
4 Nwene Edhere Ẹmeọta Ra: Fikinọ Pọl ọ riẹ oghẹrẹ iroro ahwo nọ ọ jẹ tẹme kẹ, ọ rehọ Ikereakere na lele ai jiroro kpahe eware nọ a rọwo no. Wọhọ oriruo, o dhesẹ Jesu wọhọ ọmọ Devidi, jẹ wọhọ ọnọ Jọn Ọhọahwo-Ame na, ọnọ ahwo kpobi a je rri wọhọ ọruẹaro Ọghẹnẹ, o dhesẹ via. (Iruẹru 13:23-25) Pọl o dhesẹ inọ ẹkwoma ẹsiọ nọ a se Jesu je kpei, isu egagọ na a ‘ru eware nọ Eruẹaro na e ta gba.’ (Iruẹru 13:26-28) Ofariẹ, o dhesẹ inọ ahwo a rọ ẹro ruẹ inọ a kpare Jesu no uwhu ze no, yọ o si iroro ahwo na kpohọ Ikereakere nọ a riẹ, nọ i rugba kpahe ẹkparomatha Jesu.—Iruẹru 13:29-37.
5 Eva abọdekọ riẹ, nọ ọ jẹ tẹme kẹ ahwo Griki eva ugbehru Arẹopagọs evaọ Athẹns, Pọl ọ rehọ edhere ọfa tẹme. (Iruẹru 17:22-31) Ghele na, ugogo ovuẹ ovona ọ ta kẹ ahwo na, yọ evaọ iyero ivẹ na, omodawọ riẹ o wha emamọ iyẹrẹ ze. (Iruẹru 13:42, 43; 17:34) Ere ọvona nẹnẹ re, otẹrọnọ ma rẹ tẹme kpahe eware nọ mai avọ ahwo nọ ma be tẹme kẹ a jọ wo eriwo nọ ọ rọwokugbe, je nwene idhere ẹmeọta mai lele uyero gbe iroro ahwo na, odibọgba mai o ti wo ẹgba vi epaọ ọsosuọ.
[Study Questions]
1. Ikuigbe Ebaibol vẹ ma te kiẹ riwi, kọ fikieme?
2. Eme ma wuhrẹ no oghẹrẹ nọ Pọl o ro mu ẹmeọta riẹ họ ze?
3. Eme u ru rie jọ bẹbẹ kẹ ahwo nọ Pọl ọ jẹ tẹme kẹ na re a rọwo inọ Jesu họ Mesaya nọ a ya eyaa riẹ na?
4. Ẹvẹ Pọl ọ rọ rehọ ona jiroro kugbe ahwo i Ju nọ ọ jẹ tẹme kẹ?
5. (a) Ẹvẹ Pọl o ro nwene edhere ẹmeọta riẹ nọ o je lele ahwo Griki tẹme? (b) Ẹvẹ ma sae rọ rehọ aro kele oriruo Pọl nọ ma tẹ be ta usiuwoma evaọ ẹkwotọ ukoko mai?