Oriruo Rọkẹ t’Emaha t’Ekpako

Ọ reawere emamọ usu okpekpe kugbe Ọghẹnẹ. Ọ rọ uzuazọ riẹ kpobi kẹ oreva Jihova uruo. O ‘lele Ọghẹnẹ nya,’ yọ a ghale riẹ fiki ere oruo. Ohwo nana họ Noa, ọnọ ọ rrọ oriruo kẹ t’emaha t’ekpako. (Emu. 6:9) Ividio na Noah—He Walked With God (Noa—O Lele Ọghẹnẹ Nya) u ti fiobọhọ k’owhẹ jọ iroro ra ruẹ oghẹrẹ nọ uzuazọ o jọ kẹ Noa, oware nọ o ro te kẹ ewo eghale Jihova, gbe epanọ whọ sae rọ rehọ aro kele emamọ uruemu riẹ.

Rri ividio na, re whọ nọ oma ra nọ: (1) Eme ijẹle jọ i ru nọ o thọ, kọ amono họ Nẹfilim? (Emu. 6:1, 2, 4) (2) Fikieme ahwo a te rọ geva gaga, kọ ẹvẹ oyena o jọ Ọghẹnẹ oma? (Emu. 6:4-6) (3) Ẹvẹ Noa o ro wo ohẹriẹ no ahwo ọdekọ? (Emu. 6:22) (4) Oghẹrẹ vẹ a ro kpe ahwo omuomu na no? (Emu. 6:17) (5) Ẹvẹ okọ Noa na o rro te? (Emu. 6:15) (6) Eme ọfa Noa o ru, kọ ẹvẹ ahwo a ru kpahe iẹe? (Mat. 24:38, 39; 2 Pita 2:5) (7) Bro evaọ oghoghẹrẹ arao ọvuọvo ọ jọ okọ na? (Emu. 7:2, 3, 8, 9) (8) Ẹvẹ oso na ọ rrọ kri te, kọ ẹvẹ ame na ọ rria akpọ na kri te? (Emu. 7:11, 12; 8:3, 4) (9) Fikieme Noa avọ uviuwou riẹ a rọ zọ? (Emu. 6:18, 22; 7:5) (10) Nọ ame na ọ kpọ no, diẹse okọ na o kpahe? (Emu. 8:4) (11) Ẹvẹ Noa ọ rọ riẹ nọ oke u te no nọ a re ro no okọ na ze? (Emu. 8:6-12) (12) Eme Noa o ru nọ o no eva okọ na ze? (Emu. 8:20-22) (13) Eme usi-ame na u dikihẹ kẹ? (Emu. 9:8-16) (14) Re a ‘lele Ọghẹnẹ nya,’ eme u dhesẹ? (Emu. 6:9, 22; 7:5) (15) Re ma sae ruẹ Noa eva Aparadase, eme o gwọlọ mi omai? (Mat. 28:19, 20; 1 Pita 2:21)

Eme ikuigbe Ebaibol kpahe Noa nọ o wo ẹrọwọ jẹ rrọ ohwo ẹmeoyo na u wuhrẹ owhẹ kpahe epanọ whẹ oma ra whọ sai ro ‘lele Ọghẹnẹ nya,’ je fi eva họ ẹgba Jihova nọ o re ro siwi ahwo riẹ nẹnẹ?—Emu. 7:1; Itẹ 10:16; Hib. 11:7; 2 Pita 2:9.