Fiobọhọ kẹ Emọ-Uwuhrẹ Ebaibol Wo Ovuhumuo kẹ Ekwakwa-Aghae Jihova nọ I Wo Ibe He
1 Iruo odibọgba mai e kẹre vi igogo uzẹme Ebaibol ọvo nọ ma re wuhrẹ amọfa. Ma re fiobọhọ kẹ ae riẹ Jihova ziezi, re a je wo ovuhumuo kẹ ekwakwa-aghae riẹ nọ i wo ibe he. Nọ ahwo udu oruọzewọ a te wuhrẹ uzẹme na kpahe Ọghẹnẹ, u re kpomahọ ae ziezi, o vẹ wọ ae ru inwene evaọ uzuazọ rai re a “yeri uzuazọ, nọ u fo rọ kẹ Ọnowo na, onọ o rẹ weriẹe.”—Kọl. 1:9, 10; 3:9, 10.
2 Obe Okpokpọ Mai nọ Ma Re ro Ru Uwuhrẹ: No emuhọ ze, obe ọ Ebaibol Wuhrẹ na u si iroro kpohọ ekwakwa-aghae Jihova. Uzou ọsosuọ obe na o kuyo enọ nana: Kọ Ọghẹnẹ ọ be ginẹ daezọ ra?, Oghẹrẹ vẹ Ọghẹnẹ ọ rrọ?, gbe Kọ o lọhọ re a si kẹle Ọghẹnẹ? Uzou yena u te je dhesẹ nọ Jihova ọ rrọ ọrẹri (edhe. 10), u dhesẹ ẹdhoguo okiẹrẹe gbe ọdawẹ riẹ (edhe. 11), uyoyou riẹ (edhe. 13), ogaga riẹ (edhe. 16), gbe ohrọ, aruoriwo, gbe nọ ọ vọ avọ erọvrẹ, ithihakọ, gbe ohrọ-oriọ (edhe. 19). Edhe-ẹme avọ 20 u ku ẹme na họ enẹ: “Epanọ who wuhrẹ kpahe Jihova te, ere u ti mu owhẹ ẹro te inọ ọ ginẹ rrọ yọ ere ọvona ẹjiroro nọ who ti ro you rie je si kẹle iẹe ọ te rro haro te.”
3 Ẹvẹ ma sae rọ rehọ obe ọ Ebaibol Wuhrẹ na ro fiobọhọ kẹ emọ-uwuhrẹ Ebaibol si kẹle Jihova? Nọ ma te wuhrẹ edhe-ẹme nọ ọ ta kpahe okwakwa-aghae Ọghẹnẹ jọ no, ma sae nọ ọmọ-uwuhrẹ na inọ, “Eme onana u wuhrẹ owhẹ kpahe Jihova?” hayo “Ẹvẹ onana u ro dhesẹ nọ Ọghẹnẹ o wo isiuru kpahe owhẹ oma ra?” Ẹkwoma enọ itieye na nọ ma re ro ruiruo otiẹse evaọ etoke uwuhrẹ na, ma re wuhrẹ emọ-uwuhrẹ mai re a roro kpahe oware nọ a bi wuhrẹ, u ve je fiobọhọ kẹ ai wo ovuhumuo kẹ ekwakwa-aghae Jihova nọ i wo ibe he na ziezi.
4 Rehọ Ẹkpẹti Ọkiẹkpemu Na Ro Ruiruo: Evaọ ekuhọ uzou kpobi, ta kẹ ọmọ-uwuhrẹ na re ọ rọ eme obọriẹ kpahe fihọ eme nọ e rrọ ẹkpẹti na “Oware nọ Ebaibol na O Wuhrẹ.” Kpọ iroro riẹ rri ikereakere nọ a fodẹ na. Re whọ riẹ oware nọ o rrọ iroro ọmọ-uwuhrẹ na, eva ẹsejọ whọ sae nọ inọ, “Ẹvẹ oware nọ Ebaibol e ta kpahe ẹme nana o rrọ owhẹ oma?” Ẹkwoma ere oruo, yọ who bi fi ẹgba họ orọnikọ igogo-eme nọ e rrọ uzou na ọvo ho rekọ yọ who bi wo uvi otoriẹ kpahe oware nọ ọmọ-uwuhrẹ na ọ ginẹ rọwo. Onana u ti fiobọhọ kẹ ọmọ-uwuhrẹ nọ o je mu usu họ emu kugbe Jihova.