Mai Kpobi Ma Sai Wobọ Evaọ Eru Ilele Ekpokpọ
1 Re a fi obọ họ kẹ ohwo jọ olele Jesu yọ iruo omọvo ho. Jihova ọ rẹ sae rehọ ‘enọ i bi ru iruo kẹe’ ro fi obọ họ kẹ emọ-uwuhrẹ Ebaibol wo ẹnyaharo abọ-ẹzi. (1 Kọr. 3:6-9) Mai omomọvo ma rẹ sai fi obọ họ kẹ ahwo ọkpokpọ orọnikọ ẹkwoma uvi iyo nọ ma rẹ jọ iwuhrẹ ukoko kẹ ọvo ho, rekọ te ẹkwoma uruemu mai re, nọ o rẹ kẹ imuẹro ẹzi Ọghẹnẹ nọ ọ be jọ uzuazọ mai ruiruo. (Jọn 13:35; Gal. 5:22, 23; Ẹf. 4:22, 23) Eme ọfa ma sai ru ro fi obọ họ kẹ ahwo ọkpokpọ?
2 Wọhọ Ukoko: Mai kpobi ma sai dhesẹ isiuru kpahe ahwo ọkpokpọ nọ e be ziọ ewuhrẹ ẹkwoma eyere nọ ma re yere ai sasasa je lele ai tẹme taure ewuhrẹ o te ti muhọ gbe okenọ ewuhrẹ ọ tẹ fa no. Ọzae jọ nọ ọ kareghẹhọ ẹdẹ ọsosuọ nọ ọ rọ ziọ ewuhrẹ, ọ ta nọ: “Evaọ ẹdẹ yena, mẹ ruẹ ahwo nọ mẹ riẹ ẹdẹvo ho, nọ i wo uvi uyoyou, utionọ mẹ ruẹ vievie he evaọ ichọche nọ mẹ jọ notọ ze. O jọ vevẹ inọ mẹ ruẹ uzẹme na no.” Nọ o kpohọ iwuhrẹ te emerae ihrẹ no, ọ tẹ họ-ame.
3 Jiri ọmọ-uwuhrẹ Ebaibol na ziezi nọ o bi wo ẹnyaharo abọ-ẹzi na. Kọ o bi thihakọ ọwọsuọ? Kọ ọ be ziọ iwuhrẹ ẹsikpobi? Kọ ọ be hae daoma kiyo evaọ iwuhrẹ? Kọ o mu ẹme họ eru no evaọ Isukulu Odibọgba Esuo-Ọghẹnẹ na, hayo mu usiuwoma ota họ no? Jiri ei kẹ ẹnyaharo nọ o wo no. Onana o te jaja iẹe oma, jẹ tuduhọ iẹe awọ.—Itẹ 25:11.
4 Wọhọ Onọ O Bi Wuhrẹ Ohwo Obe: Iwhowho-uvie jọ a sai fi obọ họ kẹ emọ-uwuhrẹ Ebaibol rai riẹ ahwo ukoko na ẹkwoma iwhowho-uvie efa nọ a re se gboma nyai wuhrẹ ohwo na obe. Zizie ọmọ-uwuhrẹ na kpohọ iwuhrẹ ukoko ababọ okioraha. Nọ o te mu iwuhrẹ họ ẹnyaze no, daoma dhesẹ iẹe kẹ inievo efa eva ukoko na. Kọ ọ be daoma re ọ se uruemu uyoma jọ ba, wọhọ ivovavovo? Kọ omoni riẹ jọ ọ be wọso ẹe fikinọ a bi wuhrẹ obe kugbei? Ẹbẹbẹ na nọ ọ rẹ ta kẹ owhowho-uvie jọ nọ o fi ẹbẹbẹ otiọye na kparobọ no, o sai fiobọhọ kẹe.—1 Pita 5:9.
5 Ahwo ọkpokpọ a gwọlọ obufihọ abọ-ẹzi mi inievo nọ e rrọ ukoko na. Ahwo ukoko na kpobi a sai fi obọ họ kẹ ai wo ẹnyaharo ẹkwoma uvi isiuru nọ a re wo kpahe ae.