“Rehọ Owhowha Mẹ Wha”
1 Evaọ akpọ nana nọ otunyẹ gbe awaọruọ ọ vọ na, ma bi wo uvi ufuoma fikinọ ma jẹ uzizie Jesu rehọ inọ ma ruọ otọ owhowha riẹ re ma ruẹsi wo omosasọ. (Mat. 11:29, 30) Ẹjẹrehọ owhowha orọ ilele Jesu nọ ma rẹ jọ o kẹre te obọ nọ ma re wo evaọ iruo nọ e vọ avọ use-abọ rekọ nọ e rẹ jẹ kẹ omosasọ. U kugbe ewhowho emamọ usi Uvie na gbe obufihọ kẹ amọfa re a kuomagbe omai wo omosasọ evaọ otọ owhowha Jesu.—Mat. 24:14; 28:19, 20.
2 Omosasọ Rono Odibọgba na Ze: Orọnikọ Jesu ọ ta kẹ ilele riẹ nọ a ku owha riẹ kugbe onọ a wọ vẹre he. O zizie ai re a nyasiọ owha ogbẹgbẹdẹ rai ba re a wọ owha riẹ nọ o rrọ vovovo. Awaọruọ gbe idhọvẹ erọ uyero akpọ nana e gbẹ be nẹ omai yao otọ họ; yọ ma bi le efe nọ o muẹro ho gbe he. (Luk 21:34; 1 Tim. 6:17) Eware e tẹ make vọ omai obọ nọ ma bi ru, yọ o gbomai họ nọ ma ruiruo nọ ma rẹ rọ ko omai mai, egagọ Ọghẹnẹ ma rẹ rọ karo evaọ uzuazọ mai. (Mat. 6:33) Nọ ma te wo emamọ eriwo kpahe iruo usiuwoma ota na inọ eye e mai wuzou, o te jọ owha ogbẹgbẹdẹ k’omai hi, rekọ o te kẹ omai omosasọ ẹsikpobi.—Fil. 1:10.
3 Wọhọ epanọ o rẹ jọ kẹ ohwo kpobi, o rẹ were omai re ma ta kpahe oware nọ o rẹ ghaghae k’omai. (Luk 6:45) Jihova ọ re ghaghae kẹ Ileleikristi kpobi, Uvie riẹ nọ ọ ya eyaa riẹ na o tẹ jẹ rrọ ghaghae kẹ ai re. Fikiere, awaọruọ uzuazọ ikẹdẹ kẹdẹ nọ ma rẹ nya seba nọ ma tẹ rrọ usiuwoma ota, re ma whowho emamọ usi eware iwoma o rẹ kẹ omai omosasọ! (Rom 10:15) Uzẹme o rrọ, epanọ ma dhe oware erueruo te, ere ma rẹ riẹe ru je wo omaweromẹ riẹ te. Fikiere, ma te fiba oke nọ ma be hae rọ ta usiuwoma, nọ o tẹ lọhọ, u ti ru omai wo evawere vi epaọ ọsosuọ. O rẹ ginẹ kẹ omosasọ ulogbo nọ ahwo a tẹ be kezọ kẹ ovuẹ mai! (Iruẹru 15:3) Nọ ahwo a gbẹ be make kezọ kẹ omai hi hayo nọ a tẹ wọso omai, usiuwoma ota na o rẹ kẹ omai omosasọ abọ-ẹzi nọ ma tẹ be kareghẹhọ ẹsikpobi inọ omodawọ mai o be were Jihova, gbe nnọ oghale riẹ o te wha emamọ iyẹrẹ ze.—Iruẹru 5:41; 1 Kọr. 3:9.
4 Fikinọ ma jẹ uzizie Jesu rehọ, ma be reawere uvẹ-ọghọ nọ ma bi ro ruiruo kugbei wọhọ enọ i bi se isẹri kẹ Jihova. (Aiz. 43:10; Evia. 1:5) Oware nọ o rẹ kẹ omosasọ vi onana o rrọ họ!