Kọ Uviuwou Ra O Be Ruẹrẹ Oma Kpahe kẹ Azọ?
1 Eruẹaruẹ Ebaibol nọ i bi rugba e be kẹ imuẹro inọ ekuhọ akpọ omuomu nana ọ be tha kpata kpata. Ma be rria oke obẹbẹ nọ o wọhọ onọ o jọ taure Ẹvo Noa o te ti ku. (Mat. 24:37-39) Fikinọ Noa o “lele Ọghẹnẹ nya,” ọ zọ evaọ okenọ a raha akpọ anwae yena. (Emu. 6:9) Ma sae tanọ Noa o wuhrẹ uviuwou riẹ idhere Jihova keme ae omarai a zọ re. Edhere vẹ ma sae rọ raro kele Noa ruẹrẹ oma kpahe wọhọ uviuwou re ma zọ vrẹ ekuhọ uyero akpọ omuomu nana?
2 Ọvuẹovuẹ Ẹrẹreokie: Noa o thihakọ te oware ikpe 40 rite 50 wọhọ “ọvuẹovuẹ ẹrẹreokie.” (2 Pita 2:5) Ahwo oke riẹ a se rie ẹkoko ẹsejọhọ fikinọ ijẹle ọwọsuọ nọ i nwene oma zihe ruọ ahwo a jẹ lẹliẹ ae họ hayo udu obọrai a je ro ru ere. Ẹsibuobu ahwo a rẹ siọ ovuẹ mai je se omai ẹkoko, onọ u bi dhesẹ inọ ekuhọ akpọ nana ọ kẹle no. (2 Pita 3:3, 4) Rekọ, wo ohẹriẹ no ahwo edẹ Noa, ahwo buobu a be jẹ ovuẹ Uvie na rehọ je bi kurẹriẹ ziọ egagọ Jihova. (Aiz. 2:2) Ma ti ‘siwi oma mai gbe ahwo nọ a be kezọ ẹme mai’ otẹrọnọ ma thihakọ. (1 Tim. 4:16) O roja gaga re esẹgbini a rọ ẹkwoma ẹmeunu gbe oriruo wuhrẹ emọ rai epanọ iruo usiuwoma ota na i wuzou te!—2 Tim. 4:2.
3 Nwanọ Ere O Ru: Azọ Noa avọ uviuwou riẹ o roma wha oma nọ a ro totọ nya lele ithubro Jihova. (Emu. 6:22) Nẹnẹ re u wuzou re ma nya lele ithubro Ebaibol gbe erọ ọrigbo nọ o wo ẹrọwọ na. (Jem. 3:17) Emọ uviuwou jọ nọ e kpako no a kareghẹhọ epanọ ọsẹ rai ọ jẹ hai ro fi ithubro nọ ukoko Jihova o be kẹ h’iruo. Wọhọ oriruo, ọ jẹ hai ru uwuhrẹ uviuwou koka koka, jẹ hae ruẹ nọ ohwo kpobi evaọ uviuwou na o kpohọ usiuwoma ota evaọ urere oka kpobi wọhọ epanọ ukoko o ta. Ọ jẹ hae daoma ruẹ inọ ọ wha ọmọ ọvo lele oma kpohọ usiuwoma ota koka koka. Enẹ nọ ọ jẹ hai ru ẹsikpobi u fi obọ họ kẹ emọ riẹ, emọ ezeza nọ o yẹ a rrọ idibo Jihova.
4 Ekuhọ uyero akpọ nana ọ te tha idudhe. (Luk 12:40) Ma tẹ raro kele Noa je wo ẹrọwọ, te omai te uviuwou mai ma te ruẹrẹ oma kpahe kẹ azọ!—Hib. 11:7.