Wuhrẹ Amọfa re A You Jihova
1. Eme o bi si ahwo jọ kẹle Jihova?
1 Kọ whọ kareghẹhọ oke ọsosuọ nọ who ro yo kpahe Jihova? Eme ọ lẹliẹ owhẹ si kẹle iẹe? Ahwo buobu nọ a wo eva ezi a rẹ ta kẹ owhẹ nọ a si kẹle Ọnọ ọ ma omai fiki ekwakwa aghae riẹ nọ a wuhrẹ kpahe, maero ohrọ-oriọ gbe uyoyou riẹ.—1 Jọn 4:8.
2, 3. Ẹvẹ ma sae rọ rehọ obe ọ Ebaibol Wuhrẹ na fiobọhọ kẹ emọ-uwuhrẹ Ebaibol re a wo uyoyou udidi kẹ Jihova?
2 “Ọghẹnẹ Mai Ọna”: Obe ọ Ebaibol Wuhrẹ na o ta kpahe uyoyou Jihova gbe oware nọ o jẹ gwọlọ nọ ma wo usu okpekpe kugbei. Ẹvẹ ma sae rọ rehọ obe nana wuhrẹ amọfa re a wo uyoyou udidi kẹ Ọghẹnẹ? Nọ ma tẹ be ta kpahe oware nọ ohwo na ọ re riẹ kpahe he, ma rẹ sae nọ enọ nọ e rẹ lẹlẹ iẹe ta iroro riẹ, wọhọ itienana: “Eme uzẹme nana u dhesẹ kpahe Jihova?” hayo “Oghẹrẹ vẹ ẹme nana ọ rọ kẹ imuẹro inọ Jihova họ Ọsẹ nọ ọ mai woma nọ ohwo kpobi ọ rẹ gwọlọ wo?” Oghẹrẹ utiona nọ ma re ro wuhrẹ ọmọ-uwuhrẹ u re fiobọhọ kẹe mu usu okpekpe kugbe Jihova evaọ edẹ uzuazọ riẹ kpobi.
3 Nọ ma te fiobọhọ kẹ emọ-uwuhrẹ Ebaibol wo ovuhumuo epanọ u wuzou te re a wo eriariẹ kpahe Ọghẹnẹ uzẹme ọvo na, a ti vuhumu, wọhọ epanọ Aizaya o kere inọ, “Ọghẹnẹ mai ọna.” (Aiz. 25:9) Nọ ma te bi ru Ẹme Ọghẹnẹ vẹ kẹ amọfa, u fo re ma fiẹgba họ epanọ ahwo-akpọ a ti ro wo eghale ẹkwoma uvie Ọghẹnẹ nọ Kristi Jesu o ti su, nọ u ti ru ẹjiroro Jihova gba.—Aiz. 9:6, 7.
4, 5. Eme u dhesẹ re a you Jihova?
4 Imuẹro Uyoyou kẹ Jihova: Ma riẹ nọ udu, ẹwẹ, gbe iroro kpobi nọ a re ro you Jihova o kẹre vi ẹriẹ ọvo inọ Ọghẹnẹ ọ rrọ. O gba omai họ nọ ma re wuhrẹ kpahe jẹ nya lele idhere riẹ. (Ol. 97:10) Uyoyou nọ ohwo o wo kẹ Ọghẹnẹ u re dhesẹ oma via ẹkwoma izi riẹ kpobi nọ o re koko jẹ ruabọhọ “uzuazọ ẹfuọ gbe orọ Ọghẹnẹ,” makọ nọ ọ tẹ rẹriẹ ovao dhe edawọ hayo ọwọsuọ.—2 Pita 3:11; 2 Jọn 6.
5 Uyoyou nọ ma wo kẹ Ọghẹnẹ o tẹ be wọ omai ru oreva riẹ o rẹ kẹ omai evawere. (Ol. 40:8) Ọmọ-uwuhrẹ Ebaibol na ọ rẹ ruẹ vuhumu inọ izi Ọghẹnẹ kpobi e rrọ rọkẹ ewoma idibo Riẹ. (Izie. 10:12, 13) Ẹkwoma ẹria lele ithubro Jihova, ohwo o re ro dhesẹ inọ o wo ovuhumuo odidi kẹ iruo igbunu Riẹ kpobi. Fiobọhọ kẹ ọmọ-uwuhrẹ na wo otoriẹ inọ ẹnya lele izi ikiẹrẹe Jihova o rẹ thọ ohwo no ebẹbẹ buobu.
6. Didi eghale i re te ahwo nọ a you Jihova?
6 Eghale nọ I re Te Enọ I You Ọghẹnẹ: Jihova o wo ọdawẹ ologbo kẹ enọ i wo omaurokpotọ nọ i you rie, yọ o re rovie “eware ididi” riẹ via kẹ ae. (1 Kọr. 2:9, 10) Fikinọ a wo eriariẹ itieye kpahe ẹjiroro Jihova, a wo ẹruore, jẹ riẹ oghẹrẹ nọ obaro akpọ ọ te jọ. (Jeri. 29:11) Jihova ọ rẹ re-ohrọ enọ i you rie. (Ọny. 20:6) A rri ẹruore uzuazọ ibẹdẹ bẹdẹ nọ a wo fiki uyoyou ulogbo nọ Ọghẹnẹ o wo kẹ ae na ghaghae.—Jọn 3:16.
7. Ẹvẹ amọfa nọ who re wuhrẹ re a you Jihova o rrọ owhẹ oma?
7 Epanọ ma wuhrẹ jẹ riẹ kpahe Ọsẹ obọ odhiwu mai te, ere ma re wuhrẹ amọfa kpahe iẹe te. (Mat. 13:52) Uvẹ-ọghọ nọ ma wo nọ ma re ro wuhrẹ amọfa o rro kẹhẹ, maero kọ emọ mai, re a you Jihova! (Izie. 6:5-7) Jọ omai gbe emọ-uwuhrẹ Ebaibol mai, ma ruabọhọ ujiro nọ ma rẹ kẹ Jihova, nọ ma be ruẹ ‘ewoma obuobu’ riẹ na.—Ol. 145:7.