Iruo Usiuwoma Ota na E Gwọlọ Ithihakọ
1 Pọl ukọ na ọ reawere iruo usiuwoma ota na vrẹ ikpe 30. Wọhọ epanọ ebẹbẹ e rẹ jọ iruo efa kpobi na, ere ọ jọ iruo usiuwoma ota riẹ rẹriẹ ovao dhe ebẹbẹ re. (2 Kọr. 11:23-29) Ghele na, ọ se iruo na ba ha. (2 Kọr. 4:1) O fievahọ inọ Jihova ọ te kẹe ẹgba thihakọ evaọ iruo odibọgba na. (Fil. 4:13) Fikinọ ọ rrọ emamọ oriruo akọthiho, Pọl ọ sae ta nọ: “Wha rọ aro kele omẹ, wọhọ epanọ mẹ rọ aro kele Kristi.”—1 Kọr. 11:1.
2 Akọthiho Edawọ Nẹnẹ: Kẹdẹ kẹdẹ, inievo mai buobu a be rẹriẹ ovao dhe ẹkoko-ose, ọwọsuọ, hayo omukpahe evaọ obọ ahwo uviuwou, ibe-iruiruo, hayo ibe emọ-isukulu rai. (Mat. 10:35; Jọn 15:20) Ẹsejọhọ ere o be via k’owhẹ. Evaọ abọdekọ riẹ, o sae jọnọ ẹyao họ ẹbẹbẹ nọ who wo, hayo whọ be daoma kẹdẹ kẹdẹ re whọ whaha eware nọ i re ru owhẹ siọ ẹro ba ẹtọvi eware abọ-ẹzi gbe enọ e be dawo ẹrọwọ gbe ithihakọ ra. Ma rẹ sai wo ẹgba ẹkwoma eroro kpahe iriruo idibo ẹrọwọ oke anwae gbe erọ ibe Ileleikristi oke mai na nọ i fi ebẹbẹ kparobọ no.—1 Pita 5:9.
3 Ma rẹ sai wo ogaga nọ ma rẹ rọ dadamu odibọgba mai ẹkwoma ‘ẹgọ-ẹmo Ọghẹnẹ ọsoso nọ ma re fihọ oma.’ (Ẹf. 6:10-13, 15) U wuzou gaga re ma lẹ kẹ ithihakọ. Ọghẹnẹ ọ rẹ k’omai ẹzi ọfuafo riẹ re ma sai thihakọ edawọ. (2 Kọr. 6:4-7) Re ma fi kparobọ evaọ ohọre abọ-ẹzi mai, o gba omai họ inọ ma rẹ gaviezọ kẹ ekareghẹhọ Ọghẹnẹ re ma wo ẹgba ziezi. (Ol. 119:24, 85-88) Wọhọ epanọ ọmọ o re dhe ileta nọ ọsẹ oyoyou riẹ o kere sei esese na, ere ma re se Ebaibol na kẹdẹ kẹdẹ re u ru usu mai kugbe Jihova ga. Ma sae rọ ẹkwoma uwuhrẹ omobọ-ohwo wo areghẹ nọ ma re ro thihakọ ebẹbẹ, je fiobọhọ k’omai jiroro nọ e rọwokugbe oreva Ọghẹnẹ, jẹ lẹliẹ omai kru ẹgbakiete mai whawha.—Itẹ 2:10, 11.
4 Ithihakọ O rẹ Wha Eghale Ze: Wọhọ epanọ o jọ kẹ Pọl na, ma tẹ be rọ ithihakọ ru iruo odibọgba mai gba o rẹ wha evawere se Jihova jẹ wha eghale se omobọ mai gbe amọfa. (Itẹ 27:11) Jọ ma gbaemu nọ ma re thihakọ evaọ iruo odibọgba na, rọ ere dhesẹ inọ ẹrọwọ mai o rrọ gaga jẹ ‘ghare vi idọloro, nọ e rẹ raha dede nọ a rọ erae dawo ai no.’—1 Pita 1:6, 7.