Odibọgba Mai—Yọ Odhesẹvia Uyoyou Mai kẹ Ọghẹnẹ
1. Eme uyoyou nọ Jesu o wo kẹ Ọghẹnẹ o wọ riẹ ru?
1 Uyoyou o wọ Jesu wha iruo odibọgba riẹ haro. Kabọ kabọ odibọgba Jesu o kẹ imuẹro ivevẹ inọ o you Jihova. Jesu ọ ta nọ: “Epanọ Ọsẹ na ọ ta kẹ omẹ ere me ru, re akpọ na ọ riẹ nọ me you Ọsẹ na. Kparoma, ma nya no etenẹ.” (Jọn 14:31) Wọhọ uvi ilele Jesu, ma wo uvẹ-ọghọ nọ ma re ro dhesẹ uyoyou mai kẹ Ọghẹnẹ evaọ odibọgba mai.—Matiu 22:37; Ahwo Ẹfẹsọs 5:1, 2.
2. Ẹvẹ ma sae rọ jọ odibọgba mai dhesẹ uyoyou mai kẹ Jihova?
2 “Odẹ Ra Ojọ Ọrẹri”: Nọ ma tẹ be rọ ajọwha rehọ uvẹ kpobi nọ u rovie fihọ ta kẹ amọfa kpahe Jihova gbe ọruẹrẹfihotọ uvie riẹ, yọ ma be rọ ere dhesẹ inọ ma wo uyoyou kẹ Jihova, je bi w’obọ evaọ erufuọ odẹ riẹ. (Ol. 83:18; Izik. 36:23; Mat. 6:9) Wọhọ epanọ Jesu o ru iruo odibọgba riẹ, ma rẹ ruabọhọ iruo odibọgba mai ro dhesẹ inọ o ginẹ rrọ isiuru mai re a ru odẹ Jihova fo, re oreva riẹ u je rugba.—Mat. 26:39.
3. Oghẹrẹ vẹ uyoyou mai kẹ Jihova u re ro fi obọ họ k’omai fi ebẹbẹ kparobọ?
3 Uyoyou O rẹ Wọ Omai Fi Ezadhe Kparobọ: Uyoyou kẹ Jihova o rẹ lẹliẹ omai mugba kẹ ezadhe kpobi nọ ma rẹriẹ ovao dhe. (1 Kọr. 13:4, 7) Jesu ọ rẹriẹ ovao ku ebẹbẹ sa-sa nọ e hae te whaha iẹe iruo usiuwoma ota riẹ. Rekọ, nọ ọ make rẹriẹ ovao dhe ebẹbẹ, uvi uyoyou riẹ gbe isiuru eruo oreva Jihova i fi obọ họ kẹe fi kparobọ. (Mak 3:21; 1 Pita 2:18-23) Ma be rẹriẹ ovao dhe ebẹbẹ buobu re nọ uyoyou mai kẹ Ọghẹnẹ u re fi obọ họ k’omai fi kparobọ. Nọ ma tẹ nya lele oriruo nọ Jesu o fihọ otọ k’omai kpekpekpe, ma rẹ sai wo udu gbe ọwhọ nọ ma re ro ru odibọgba mai gba. Dede nọ ọwọsuọ uviuwou, ẹyao, owho, hayo nọ ahwo a gbẹ be gaviezọ k’omai hi o rẹ sai kpomahọ omai, uyoyou kẹ Jihova o rẹ wọ omai ruabọhọ iruo odibọgba mai ziezi.
4. Didi uvẹ-ọghọ uyoyou mai kẹ Jihova u rovie fihọ k’omai?
4 Uyoyou u w’ẹgba gaga, yọ ma wo ẹgba nọ ma sai ro dhesẹ uvi uyoyou nọ ma wo kẹ Ọghẹnẹ evaọ odibọgba mai. (1 Kọr. 13:13) Nọ oke nọ a ti ro ru odẹ Ọghẹnẹ fo bẹdẹ bẹdẹ o kẹle gaga no na, jọ ‘uyoyou mai u hedhe ẹruẹruọ.’—Fil. 1:9; Mat. 22:36-38.