Jiri Jihova Kẹdẹ Kẹdẹ
1. Eme oma o be wọ idibo Ọghẹnẹ ru, kọ fikieme?
1 Devidi Ovie na ọ ta ọtamuo riẹ via inọ o re jiri Jihova “kẹdẹ kẹdẹ” je ri te bẹdẹ bẹdẹ. (Ol. 145:2, 7, 21) Mai oma mai ma wo uvi ẹjiroro nọ ma re ro jiri Jihova kẹdẹ kẹdẹ re.—Ol. 37:10; 145:14, 18; 2 Pita 3:13.
2. Ẹvẹ iviuwou a sai ro jiri Jihova kẹdẹ kẹdẹ?
2 Evaọ Uwou Mai: Ma wo ebe nọ a kere no Ebaibol ze nọ e rẹ kẹ ọbọga, nọ ma sai ro ruiruo nọ ma te bi se ikere okpẹdẹ na, bi ru uwuhrẹ Ebaibol uviuwou, gbe okenọ ma tẹ be ruẹrẹ oma kpahe kẹ iwuhrẹ ukoko. Iviuwou buobu a wo ọruẹrẹfihotọ nọ uviuwou na soso o rẹ rọ keria re emu kugbe o tẹ kao ẹsiẹvo okpẹdẹ. Oyena u re ru ei lọhọ nọ uviuwou na o rẹ rọ ta eme abọ-ẹzi kugbe ababọ oma-udhuo, je rovie uvẹ fihọ nọ a re ro jiri Jihova. Eme ọ abọ-ẹzi itieye nọ esẹgbini a rẹ rọ jiroro kugbe emọ rai u re fi obọ họ kẹ ae yọrọ emọ rai evaọ ọwhọkuo gbe idhere Jihova.—Ẹf. 6:4; Izie. 6:5-7.
3. Didi uvẹ u rovie fihọ k’omai nọ ma tẹ rrọ kugbe inievo ileleikristi mai?
3 Kugbe Inievo Mai: Nọ ma tẹ rrọ usiuwoma hayo iwuhrẹ ukoko, ma wo uvẹ obọdẹ nọ ma re ro kuomagbe ibe ileleikristi mai jiri Jihova. (Itẹ 15:30; Fil. 4:8; Hib. 13:15) Nọ orọnọ mai kpobi ma you Jihova na, o rẹ jọ lọlọhọ re ma ta eme nọ ma re ro jiri Jihova fiki ewoma riẹ nọ ma tẹ be t’ẹme kugbe ohwohwo.—Ol. 106:1.
4. U te no okenọ who ro kpohọ usiuwoma no, oke ofa vẹ whọ sae rọ ta usiuwoma?
4 Nọ Ma Tẹ Be T’ẹme kẹ Ahwo nọ A Rrọ Ukoko Ho: O tẹ make rọnọ iyero mai e te k’omai uvẹ kpohọ usiuwoma kẹdẹ kẹdẹ hẹ, ẹme nọ ma re lele ibe-iruiruo, ibe emọ-isukulu, gbe amọfa nọ a rrọ kugbe omai ta kpahe Jihova gbe ẹjiroro riẹ o rẹ sae lẹliẹ ahwo nọ a wo udu oruọzewọ wo ẹruore. (Ol. 27:14; 1 Pita 3:15) Nọ oniọvo-ọmọtẹ mai jọ ọ ruọ arupre je kpohọ erẹ, ọ sae ta usiuwoma kẹ ohwo jọ nọ a gbẹ ruọ arupre na, yọ onana o kẹ ohwo na omosasọ gbe uduotahawọ te epanọ o ro kere oria nọ ọ be rria gbe inọmba ifonu riẹ fihọ obe kẹ oniọvo-ọmọtẹ na re aimava a gbẹ sae t’ẹme evaọ oke ofa. Nọ ebẹbẹ uyero akpọ na i bi dhe eyeyoma na, isẹri Jihova a be ruabọhọ wha “emamọ usi uwoma” se ahwo nọ u no eva ze re a gaviezọ. Onana o be kẹ amọfa ẹruore, jẹ be lẹliẹ ai jiri Jihova.—Aiz. 52:7; Rom 15:11.
5. Fikieme o jẹ rrọ isiuru mai re ma jiri Jihova, kọ eme onana o rẹ sae wha ze?
5 Eva e rẹ were Jihova nọ idibo riẹ i te bi jiri ei kẹdẹ kẹdẹ! Wọhọ epanọ emama Jihova nọ e wariẹ omai họ e be wha ujiro sei na, mai idibo riẹ ma sai jiri ei kẹdẹ kẹdẹ evaọ iwou mai, evaọ ukoko na, gbe okenọ ma tẹ be ta usiuwoma kẹ ahwo nọ a rrọ idibo Jihova enẹna ha.—Ol. 19:1-4.