Kọ Me te Ohwo nọ Ọ rẹ Ta Usiuwoma?
1. Eme o re fi obọ họ k’omai fi ozọ inọ ma te ahwo nọ a rẹ ta usiuwoma na ha kparobọ?
1 Otẹrọnọ whọ nọ oma ra onọ utiọye na no ẹdẹjọ, whọ ruawa ha! Orọnikọ isukulu nọ ma kpohọ hayo onaa jọ nọ ma wo u re ru omai te wọhọ eta-usiuwoma ha. A dhesẹ ilele Jesu ikpe-udhusoi ọsosuọ jọ inọ a jọ ahwo nọ “a wuhrẹ hẹ,” fikinọ a kpohọ isukulu ikpehru ahwo Ju hu. Rekọ a jọ eta-usiuwoma nọ i wo onaa keme a gba riẹ mu inọ a re lele oriruo Jesu.—Iruẹru 4:13; 1 Pita 2:21.
2. Idhere jọ vẹ Jesu o je ro wuhrẹ?
2 Oghẹrẹ nọ Jesu O ro Wuhrẹ: Iwuhrẹ riẹ e jọ lọlọhọ, nọ oghẹrẹ ahwo kpobi a rẹ sai wo otoriẹ rai. Edhere ọlọlọhọ nọ o je ro mu eme riẹ họ, nọ enọ, jẹ kẹ etadhesẹ o lẹliẹ ahwo gaviezọ kẹe. (Mat. 6:26) O dhesẹ uvi isiuru kpahe amọfa. (Mat. 14:14) Ofariẹ, Jesu ọ t’ẹme ududu, keme ọ riẹ nọ Jihova họ ọnọ o vi rie jẹ kẹe ẹgba nọ o bi ro ru iruo riẹ.—Luk 4:18.
3. Ẹvẹ Jihova o bi ro fi obọ họ k’omai re ma sai ru iruo odibọgba mai gba?
3 Jihova O re Fi Obọ Họ k’Omai: Jihova ọ be rọ ẹkwoma Ebaibol na gbe ukoko riẹ wuhrẹ omai epanọ ma sai ro ru iruo usiuwoma ota na gba. (Aiz. 54:13) Fikinọ Jihova o ru re a kere oghẹrẹ nọ Jesu o ro wuhrẹ fihọ Ebaibol na, ma be sai wuhrẹ kpahe onaa riẹ jẹ be raro kele iei. Jihova ọ be k’omai ẹzi ọfuafo riẹ jẹ be rọ ẹkwoma iwuhrẹ ukoko na ro wuhrẹ omai. (Jọn 14:26) Ofariẹ, ma te lele iwhowho-uvie nọ i wo onaa ziezi kpohọ usiuwoma, a sai je fi obọ họ k’omai wo onaa ziezi.
4. Fikieme ma je rri oma mai nọ ma te ahwo nọ a rẹ ta usiuwoma na?
4 Ma wo ẹjiroro kpobi nọ ma re ro rri oma mai nọ ma te kẹ usiuwoma ota keme “ete mai obọ Ọghẹnẹ o nọze.” (2 Kọr. 3:5) Ma tẹ rọ ẹro so Jihova jẹ nabe rehọ eruẹrẹfihotọ riẹ ruiruo, ma te ‘gba kiete jẹ thomavẹre kẹ iruo iwoma i ruo kpobi.’—2 Tim. 3:17.