‘Whọ Jọ Ozọ U Mu Owhẹ Hẹ’
1. Ise-abọ vẹ ma rẹ sae rẹriẹ ovao dhe nẹnẹ nọ e wọhọ erọ Jerimaya?
1 Nọ a rehọ Jerimaya mu ọruẹaro, ọ kaki roro nọ o te he. Rekọ Jihova ọ tuduhọ iẹe awọ inọ, “whọ jọ ozọ rai umu owhẹ hẹ,” ọ tẹ jẹ kẹe ẹgba nọ o re ro ru iruo nọ ọ kẹ riẹ. (Jeri. 1:6-10) Nẹnẹ, omovuọ hayo ozọ o rẹ sai kpomahọ odibọgba mai. Ozọ oghẹrẹ nọ ahwo a te rehọ ovuẹ mai hayo rri omai o rẹ sae lẹliẹ omai siọ usiuwoma ba ẹta ẹsejọ. Ẹvẹ ma sai ro fi ozodhẹ utioye na kparobọ, kọ eghale vẹ i ti te omai?
2. Ẹvẹ oma oruẹrẹkpahe u re ro fi obọ họ kẹ omai fi ozodhẹ kparobọ evaọ odibọgba na?
2 Ruẹrẹ Oma Kpahe: Ma tẹ ruẹrẹ oma kpahe ziezi u re fi obọ họ kẹ omai fi ozodhẹ kparobọ. Wọhọ oriruo, nọ ma te se je roro kpahe eme nọ ahwo a rẹ rọ gwọlọ bru ẹmeọta dhe, u ti fi obọ họ kẹ omai riẹ ẹme nọ ma rẹ kpahe. (Itẹ 15:28) Kọ wha gbẹ jọ Uwuhrẹ Ebaibol Uviuwou rai ru idhesẹvia ise-abọ jọ nọ a rẹ nyaku evaọ obọ isukulu gbe odibọgba na?—1 Pita 3:15.
3. Ẹvẹ eva nọ ma re fi họ Jihova u re ro fi obọ họ kẹ omai fi ozodhẹ kparobọ?
3 Fi Eva Họ Jihova: Eva nọ ma re fihọ Ọghẹnẹ u re fi obọ họ kẹ omai fi ozodhẹ kparobọ. Jihova ọ kẹ omai imuẹro inọ o ti fi obọ họ kẹ omai. (Aiz. 41:10-13) Imuẹro e rẹ gbẹ rro vi enẹ hẹ! Ofariẹ, Jesu ọ kẹ omai imuẹro inọ uyero nọ ma rẹro riẹ hẹ o tẹ romavia, ẹzi ọfuafo Ọghẹnẹ o ti fi obọ họ kẹ omai re ma ta usiuwoma ziezi. (Mak 13:11) Fikiere, evaọ ẹsikpobi yare Jihova kẹ ẹzi ọfuafo riẹ.—Luk 11:13.
4. Eghale vẹ i re te omai nọ ma te tilẹmu iruo usiuwoma na ghelọ ise-abọ?
4 Eghale: Nọ ma bi tilẹmu odibọgba na ghelọ ise-abọ na, onana u ti ruei lọhọ kẹ omai thihakọ edawọ evaọ obaro. Ma ti wo aruọwha, onọ u re dhesẹ nọ ohwo o wo ẹzi ọfuafo na. (Iruẹru 4:31) Ofariẹ, nọ Jihova o bi fi obọ họ kẹ omai fi ozodhẹ kparobọ na, o te lẹliẹ omai rọ ẹro so ẹe vi epaọ anwẹdẹ. (Aiz. 33:2) Ma ti je wo oghọghọ gbe evevọwẹ fikinọ ma riẹ inọ ma bi ru Ọsẹ obọ odhiwu mai eva were. (1 Pita 4:13, 14) Fikiere, jọ ozọ u mu omai hi, rekọ joma rọ aruọwha whowho ovuẹ Uvie na avọ imuẹro inọ Jihova ọ rrọ gb’omai ẹsikpobi!