Eroro-Didi avọ Olẹ E r’Oja kẹ Egbodibo Ajọwha
1. Eme u fi obọ họ kẹ Jesu tẹrovi iruo nọ e mai wuzou kẹe?
1 Jesu ọ rehọ owọwọ na kpobi je siwi enọ e jẹ mọ je le idhivẹri no ahwo oma. Nọ ilele riẹ a rue riẹ okiokiọ riẹ, a tẹ ta nọ: “Ahwo kpobi a be guọlọ owhẹ,” keme a gwọlọ inọ ọ ruabọhọ iruo igbunu riẹ. Rekọ, iruo usiuwoma ota na Jesu ọ mae tẹrovi. Ọ tẹ kpahe kẹ ae nọ: “Wha nyaze, ma kpo ewho ekẹloma edekọ, kpere mẹ jọ etẹe vuẹ ovuẹ re; keme fiki onana mẹ jẹ ze.” Eme u fi obọ họ kẹ Jesu tẹrovi iruo usiuwoma ota na? Ọ kparoma evaọ irioke re ọ lẹ je roro. (Mak 1:32-39) Ẹvẹ eroro-didi avọ olẹ e sai ro fi obọ họ kẹ omai jọ etausiuwoma ajọwha?
2. Eme ma rẹ sai roro kpahe nọ u re fi obọ họ kẹ omai yọrọ ajọwha evaọ odibọgba na?
2 Eme Ma re Roro Kpahe? Jesu o muẹrohọ inọ ahwo “a rọ oyoya, a tẹ jẹ vaha wọhọ igodẹ nọ i wo othuru hu.” (Mat. 9:36) Epọvo na re, ma rẹ sai roro kpahe epanọ o r’oja te re ahwo a yo emamọ usi na. Ma rẹ sai roro kpahe epanọ urere na o kẹle te no. (1 Kọr. 7:29) Ma rẹ sai roro kpahe iruo-abọ Jihova gbe ekwakwa-aghae riẹ, uvẹ-ọghọ nọ ma rọ rrọ Isẹri Jihova, gbe eware nọ ma wuhrẹ no Ebaibol ze nọ ahwo ẹkwotọ mai a riẹ hẹ.—Ol. 77:11-13; Aiz. 43:10-12; Mat. 13:52.
3. Okevẹ ma sai ro roro didi?
3 Okevẹ Ma re ro Roro? Wọhọ Jesu, ahwo jọ a rẹ kparoma evaọ irioke frifri. O rẹ mae were amọfa re a roro evaọ owọwọ taure a te ti kiẹzẹ. (Emu. 24:63) Eware e tẹ make vọ omai obọ, ma rẹ sae gwọlọ oke nọ ma re ro roro. Ahwo jọ a re ru ere nọ a tẹ rrọ omoto hayo arupre bi kpohọ erẹ. Efa a rẹ rehọ oke uvo nọ a ro serihọ no iruo roro didi. Ahwo buobu a ruẹ no inọ eroro-didi taure a te ti kpohọ usiuwoma, makọ evaọ iminiti kakao, u re fi obọ họ kẹ ae ta usiuwoma avọ ọwhọ gbe aruọwha.
4. Fikieme ma re ro roro didi?
4 Eroro-didi avọ olẹ e rẹ lẹliẹ isiuru nọ ma be rọ gọ Jihova ga ziezi, lẹliẹ omai rọ egagọ mai kẹ Jihova karo, jẹ gbaemu inọ ma rẹ ruabọhọ iruo usiuwoma ota na. Eroro-didi u fi obọ họ kẹ Jesu, Ọgbodibo Ologbo Ọghẹnẹ na, yọ u ti fi obọ họ kẹ omai re.