Igbunu Emama Ọghẹnẹ I Dhesẹ Oruaro Riẹ Via

O rẹ were ahwo buobu re a rri emama Ọghẹnẹ. Rekọ umutho ahwo jọ ọvo a riẹ inọ onana o rẹ lẹliẹ ae riẹ eware jọ kpahe Ọmemama na. (Rom. 1:20) Ikpe buobu nọ i kpemu, Devidi ọ jọ Ikereakere na wuhrẹ kpahe Jihova. Emama Ọghẹnẹ nọ o muẹrohọ i te je fi obọ họ kẹe sikẹle Ọghẹnẹ. (Ol. 8:3, 4) Ibroshọ na Kọ Ọghẹnẹ Ọ Be Ghinẹ Daezọ Mai? o re fi obọ họ kẹ omai, emọ mai, gbe emọ-uwuhrẹ Ebaibol mai muẹrohọ emama Jihova, riẹ oghẹrẹ Ọghẹnẹ nọ Ọmemama na ọ rrọ, je fi obọ họ kẹ omai sikẹle iẹe.

Muẹrohọ Iruabọ Jihova: Jesu ọ ta inọ ma hai “Ri erao ora ehru na” je “roro ikẹba nọ erọ obọ ẹwọ.” (Mat. 6:26, 28) Onana o rẹ lẹliẹ omai rọwo je fi eva họ Ọmemama na, Jihova, je ru omai vuhu epanọ areghẹ, ogaga esiwo, gbe uyoyou riẹ e rro te. Ukpenọ ọgbohrẹ ikẹdẹ kẹdẹ o rehọ iroro mai kpobi no, joma hae rehọ oke jọ muẹrohọ emama igbunu Jihova, je roro kpahe eware nọ ma sai wuhrẹ no ai ze kpahe Ọghẹnẹ mai na.—Ol. 19:1.