Who Roro nọ Who Wo Uvẹ nọ Whọ Sai ro Wuhrẹ Obe Kugbe Ohwo ho Ho
1. Fikieme ahwo jọ a gbẹ gwọlọ wo obe-uwuhrẹ hẹ?
1 Ahwo jọ a rẹ gwọlọ wo obe-uwuhrẹ hẹ, keme a roro nọ a wo uvẹ nọ a ti ro wuhrẹ ohwo ho. Re ma wuhrẹ ohwo o ginẹ gwọlọ oke. Oke nọ ma re ro se oria nọ ma ti wuhrẹ ohwo na, oke nọ ma ti ro wuhrẹ ohwo na, gbe oke nọ ma ti ro fi obọ họ kẹe nọ o te wo ẹbẹbẹ jọ. Pọl ukọ na ọ ta nọ ọ ghale ẹkẹ oma riẹ kẹ inievo obọ Tẹsalonika, nọ u dhesẹ nọ ọ rehọ oke gbe ẹgba riẹ kpobi fi obọ họ kẹ ae riẹ Jihova. (1 Tẹs. 2:7, 8) Ma te ta ẹme kpahe epanọ ma sai ro wuhrẹ obe kugbe ohwo dede nọ eware e vọ omai obọ.
2. Eware vẹ ma re ru fikinọ ma you Jihova?
2 Egagọ E Gwọlọ Oke: Uzẹme riẹ họ egagọ e gwọlọ oke. Wọhọ oriruo, koke koke o rẹ gwọlọ nọ ma siobọno oware jọ re ma sai kpohọ ewuhrẹ, usiuwoma, se Ebaibol, jẹ lẹ. Ohwo nọ ọ rọo no o re wo oke kẹ ọrivẹ riẹ ọ tẹ maki wo eware buobu nọ o re ru. Kọ u gbe fo re ma rọ evawere ru uvẹ fihọ nọ ma rẹ rọ gọ Jihova fikinọ ma you rie? (Ẹf. 5:15-17; 1 Jọn 5:3) Jesu o dhesẹ nọ re ma fi obọ họ kẹ ahwo zihe ruọ ilele u wuzou gaga evaọ egagọ mai. (Mat. 28:19, 20) Ma tẹ riẹ ere, ma rẹ jọ oware ovo o whaha omai oke nọ ma re ro wuhrẹ ohwo Ebaibol ho.
3. Ẹvẹ o rọ lọhọ re ma wo obe-uwuhrẹ dede nọ ma bi wo uvẹ hẹ?
3 Kọ eme ma re ru otẹrọnọ ma bi wo uvẹ hẹ fiki iruo mai, iruo ukoko na, hayo ẹyao nọ o kru omai fihọ otọ? Inievo jọ nọ i re kperẹ nọ a rẹ jọ rria etoke jọ a rẹ rehọ ifonu hayo Itanẹte wuhrẹ obe kugbe emọ-uwuhrẹ rai. Ejọ nọ ẹyao o kru fihọ otọ a rẹ ta kẹ ohwo nọ a bi wuhrẹ na re ọ ziọ obọ uwou rai. Amọfa a rẹ ta kẹ oniọvo ọfa re o wuhrẹ ọmọ-uwuhrẹ rai nọ a te bi ti kperẹ.
4. Eghale vẹ ma re wo otẹrọnọ ma kuvẹ re iruo nọ e vọ omai obọ e whaha omai Ebaibol nọ ma re wuhrẹ amọfa ha?
4 Eva e were Pọl gaga nọ ọ rehọ oke gbe ẹgba riẹ wuhrẹ ahwo kpahe Ọghẹnẹ. (Iruẹru 20:35) Nọ ọ kareghẹhọ ahwo nọ o fi obọ họ kẹ riẹ uzẹme na evaọ obọ Tẹsalonika, o yere Jihova. (1 Tẹs. 1:2) Ma ti wo oghọghọ ulogbo otẹrọnọ ma kuvẹ re iruo nọ e vọ omai obọ e whaha omai Ebaibol nọ ma re wuhrẹ amọfa ha.