Amono A bi Ru Oreva Jihova Nẹnẹ?
1. Oke vẹ ma ti ro mu ibroshọ Amono A bi Ru Oreva Jihova Nẹnẹ? na họ ewuhrẹ, kọ irere vẹ ma ti wo noi ze?
1 No umuo oka ọ February 17, 2014 vrẹ, ma ti wuhrẹ ibroshọ na, Amono A bi Ru Oreva Jihova Nẹnẹ? evaọ Uwuhrẹ Ebaibol Ukoko. A siobọno ibroshọ nana evaọ okokohọ ubrotọ ‘Sẹro Udu Ra,’ yọ a ru rie re ma rehọ iẹe kpọ ahwo nọ ma bi wuhrẹ Ebaibol kugbe ziọ ukoko na. Nọ ma bi ti wuhrẹ ibroshọ nana, eva e te were omai gaga inọ ma rrọ ukoko Jihova, u ve je fi obọ họ kẹ omai riẹ epanọ ma sae rọ rehọ ibroshọ nana wuhrẹ ahwo.—Ol. 48:13.
2. Oghẹrẹ vẹ a ti wuhrẹ ibroshọ na?
2 Oghẹrẹ nọ Ma ti Wuhrẹ iẹe: Oniọvo nọ o bi ru ewuhrẹ na ọ rẹ ghale oke na ẹrẹrẹe fihọ izoẹme na. Nọ o bi ti mu uzoẹme họ ewuhrẹ evaọ usu izoẹme 28 na, o re se onọ nọ o rrọ uzoẹme uwuhrẹ na. Kẹsena ọ vẹ ta kẹ oniọvo nọ o bi se na re o se edhe-ẹme ọsosuọ na. O te sei no, oniọvo nọ o bi ru ewuhrẹ na ọ vẹ nọ onọ nọ ọ ruẹrẹ fihọ kẹ edhe-ẹme na. Kẹsena wha ve se jẹ ta kpahe idhe-eme nọ e rrọ otọ izoẹme esese nọ i mu gbalọ na ọvuọvo. Nọ wha te se eme nọ e rrọ otọ uzoẹme osese no, ọnọ o bi ru ewuhrẹ na ọ vẹ nọ inievo na re a ta epanọ eme na e rọ kuyo onọ nọ o rrọ uzoẹme uwuhrẹ na. Ibroshọ na u wo ifoto buobu nọ a rẹ sae ta ẹme kpahe re. Wha sai se eria Ebaibol jọ nọ i ru ẹme na vẹ. Re a te ti kpohọ uwuhrẹ ofa, ọnọ o bi ru ewuhrẹ na ọ rẹ nọ enọ nọ e rrọ obotọ ẹwẹ-obe na. Otẹrọnọ ẹkpẹti ọ “Gbẹ Kiẹ Via” na ọ rrọ ẹwẹ-obe yena, a re sei, kẹsena ọ vẹ nọ inievo na re a ta kpahe irere nọ ohwo nọ a bi wuhrẹ Ebaibol kugbe o re wo nọ o te ru lele eme nọ e rrọ ẹkpẹti na. Otẹrọnọ oke o gbẹ riẹ, ọnọ o bi ru ewuhrẹ na ọ rẹ rehọ onọ nọ o rrọ uzoẹme uwuhrẹ na ru ọkiẹkpemu. O gbahọ nọ who re ru lele omaa nana ha nọ whọ tẹ be rehọ ibroshọ na wuhrẹ ahwo.
3. Ẹvẹ ma sai ro wo erere ziezi no ibroshọ nana ze?
3 Re whọ sai wo erere ziezi no ewuhrẹ na ze, romatotọ sei taure whọ tẹ te ze ewuhrẹ. Daoma kuyo evaọ ewuhrẹ na. Nọ a bi ru ewuhrẹ na, roro kpahe epanọ ahwo nọ who bi wuhrẹ Ebaibol kugbe a ti ro wo erere no uzoẹme na ze. Jọ ibroshọ nana u ru omai sai fi obọ họ kẹ amọfa kuomagbe omai ru oreva Ọghẹnẹ re ae omarai a sae rria bẹdẹ bẹdẹ.—1 Jọn 2:17.