Rọ Aro Kele Eruẹaro Na —Maeka

1. Onọ vẹ o sae jọnọ Maeka o wo họ iroro, kọ fikieme ovuẹ ẹdhoguo nọ o je whowho na o gbẹ rọ jọ uvrẹvru hu?

¹ ‘Oke vẹ uyero-akpọ omuomu nana u ti ro kuhọ?’ Ẹsejọhọ Maeka ọruẹaro na o wo ọkpọ onọ utioye họ iroro evaọ okenọ o je whowho ẹdhoguo Jihova nọ o ti te Izrẹl avọ Juda. Ghele na ovuẹ ẹdhoguo riẹ na o jọ uvrẹvru hu. Evaọ ukpe 740 B.C.E., nọ Maeka ọ gbẹ jọ uzuazọ, eme Jihova kpahe Sameria i rugba. (Mae. 1:6, 7) Uwhremu na, a tẹ raha Jerusalẹm evaọ 607 B.C.E. (Mae. 3:12) Nọ ma be hẹrẹ okenọ ẹdhoguo Jihova ọ be te rọ ze evaọ oke mai na, ẹvẹ ma sae rọ rehọ aro kele Maeka?

2. Ẹvẹ ma sai ro dhesẹ ẹzi ohẹrẹ nọ ẹdẹ Jihova o bi si kẹle na, kọ fikieme?

² Wo Ẹzi Ohẹrẹ: Maeka o kere nọ: “Me re riwi ỌNOWO na, mẹ rẹ hẹrẹ Ọghẹnẹ usiwo mẹ; Ọghẹnẹ mẹ o ti yo kẹ omẹ.” (Mae. 7:7) Orọnikọ Maeka ọ rọ abọ muoma jẹ hẹrẹ urere uyero-akpọ yena ha. O je ru iruo nọ Jihova ọ kẹ riẹ. Nọ ma be hẹrẹ ẹdẹ Jihova na, ma re wo “uzuazọ ẹfuọ” je ru iruo nọ Ọghẹnẹ ọ kẹ omai na. (2 Pita 3:11, 12) Odiri Jihova o be kẹ ahwo uvẹ kurẹriẹ. (2 Pita 3:9) Fikiere, o roja re ma wo ẹzi ohẹrẹ wọhọ epanọ eruẹaro Jihova a wo.—Jem. 5:10.

3. Fikieme ma rẹ rọ lẹ se Jihova re ọ kẹ omai ẹzi ọfuafo riẹ?

³ Lẹ se Jihova re Ọ Kẹ Owhẹ Ẹgba: Dede nọ iruo nọ Jihova ọ kẹ Maeka na e lọhọ tere he, o fievahọ Jihova inọ ọ te kẹe ẹgba. (Mae. 3:8) Agbẹta nọ Ebaibol na ọ rọ tuduhọ omai awọ nọ ma lẹ se Jihova re ọ kẹ omai ẹgba na. Jihova ọ rẹ kẹ enọ oma o rrọ no ẹgba re a sai ru iruo nọ ọ kẹ rai. (Ol. 84:5, 7; Aiz. 40:28-31) Kọ who gbe vuhu onana mu no evaọ uzuazọ ra nọ whọ be gọ Jihova na? Kọ whọ be hae lẹ se Jihova kẹse kẹse re ọ kẹ owhẹ ẹzi ọfuafo riẹ?—Luk 11:13.

4. Emamọ oriruo vẹ Maeka o fihọ otọ kẹ omai nẹnẹ?

⁴ Oreva Ọghẹnẹ oye Maeka ọ rọ karo evaọ edẹ uzuazọ riẹ kpobi. Ọ gba riẹ mu inọ o re kru ẹrọwọ riẹ te urere dedenọ ahwo ogbekuo a wariẹ e riẹ họ. Epọvo na re, ẹdhọ ọ be dawo ẹgbakiete mai kẹdẹ kẹdẹ. Fikiere jọ o jọ ọtamuo mai inọ “odẹ [Jihova, NW] Ọghẹnẹ mai ma rẹ rọ nya bẹdẹ bẹdẹ.”—Mae. 4:5.