Ikpe Udhusoi Soso nọ Ma bi ro Whowho Uvie Na!
1. Eme a tuduhọ idibo Jihova awọ nọ a ru enwenọ ikpe udhusoi nọ e vrẹ?
1 “Rri, Ovie na o muhọ esuo no! Whai họ ahwo-ẹro riẹ. Fikiere wha whowho, wha whowho, wha whowho, Ovie na avọ uvie riẹ.” Brọda Rutherford ọ rọ eme ejaja yena nọ ọ ta enwenọ ikpe udhusoi nọ e vrẹ na rọ tuduhọ idibo Jihova awọ re a whowho usi Uvie na evaọ akpọ na soso. Yọ ere dẹẹ ma ru. Wọhọ Ileleikristi ikpe-udhusoi ọsosuọ, ma ta usiuwoma Uvie na “kẹ enọ a ma kpobi evaọ akpọ na” no. (Kọl. 1:23) Nọ ma te rri kpemu kpohọ ikpe udhusoi nọ e vrẹ na, ẹvẹ ma daoma te no re ma whowho Uvie Ọghẹnẹ? Ẹvẹ ma sae rọ ruabọhọ ewhowho Uvie na nọ o joma su te ikpe udhusoi no na?
2. Oghẹrẹ vẹ ebe mai i ro whowho Uvie Ọghẹnẹ no?
2 Ẹnyaharo nọ Ma Wo No: Anwọ ikpe buobu ze na, ma be rọ ebe mai whowho Uvie Ọghẹnẹ. No ukpe 1939 ze, uzoẹme emagazini mai nọ o mae viodẹ họ: Uwou-Eroro Na Nọ U Bi Whowho Uvie Jihova. Oware nọ emagazini nana ọ rẹ mae ta kpahe họ Uvie na gbe oware nọ u ti ru. Awake! ọ rẹ jẹ ta kpahe Uvie na inọ oye họ ẹruore ọvuọvo nọ ọ rrọ kẹ ahwo-akpọ. U woma gaga inọ emagazini ivẹ nana họ enọ a be mae fa fihọ evẹrẹ sa-sa jẹ be mae rọ kẹ ahwo evaọ akpọ na soso.—Evia. 14:6.
3. Eware vẹ ma ro whowho usi Uvie na no?
3 Idibo Jihova a rehọ eware sa-sa ro whowho ovuẹ Uvie na no. Evaọ oke ọsosuọ, ma jẹ rọ imoto nọ a fi egba họ, irediyo, gbe egramafonu rọ ta usiuwoma. Eware nana i fiobọhọ kẹ omai whowho ovuẹ na kẹ ogbotu ahwo evaọ oke nọ etausiuwoma i ri bu tere he. (Ol. 19:4) Evaọ oke mai na, ma fi eware buobu họ oria evuẹ jw.org mai na, be rọ ere whowho usi Uvie na kẹ ima ahwo buobu, te ewho nọ a jọ fi awhaha họ iruo mai.
4. Obọdẹ idhere vẹ ma bi ro whowho Uvie na?
4 Idibo Jihova a tẹ jẹ rọ idhere obọdẹ ro whowho usi Uvie na no. Wọhọ oriruo, u te no usiuwoma ota n’uwou ruọ uwou no, ma be ta usiuwoma na evaọ eria nọ ahwo a re kpohọ kẹ eriosehọ, igege arozaha, egareji, gbe eria ekiọthuọ anwọ ukpe 1995 ze. Kẹle na, ma te je muọ usiuwoma ota obọdẹ họ no evaọ ikpewho wariẹ akpọ na soso họ. U te no ere no, ikoko buobu i bi wo obọ evaọ usiuwoma ota ẹgbede evaọ ẹkwotọ rai ẹkwoma ebe nọ a re fihọ ehru emẹjẹ evaọ eria nọ i re zurie. Ghele na, usiuwoma n’uwou ruọ uwou na họ edhere nọ o mai wuzou nọ ma be rọ wha ovuẹ Uvie na te ahwo oma.—Iruẹru 20:20.
5. Didi uvẹ u ti rovie fihọ kẹ omai evaọ ukpe iruo okpokpọ na?
5 Ẹnyaharo nọ Ma bi Rẹro Riẹ: Nọ ma bi ti mu ukpe iruo okpokpọ họ evaọ amara Azie na, inievo buobu a ti mu iruo ọkobaro oke-kpobi họ. Kọ who gbe kuomagbe ai? Otẹrọnọ o lọhọ họ, kọ whọ sai ru ọkobaro obufihọ n’oke t’oke? Otẹrọnọ who ti ru ọkobaro hayo whọ te sai ru hu, Jihova ọ te ghale owhẹ nọ whọ tẹ be daoma kpobi re who w’obọ ziezi evaọ ewhowho Uvie na.—Mal. 3:10.
6. Fikieme amara Akpe 2014 ọ te rọ jọ amara obọdẹ?
6 Amara Akpe 2014 o te rọ gba ikpe udhusoi nọ Uvie Ọghẹnẹ u bi ro su na. U kiehọ kẹhẹ inọ uvitha ẹgbede Uwou-Eroro Na ọrọ amara yena ọ ta kpahe Uvie Ọghẹnẹ. Kọ whọ gbẹ daoma rọ emagazini nana kẹ ahwo buobu? Nọ ma bi rri kpohọ obaro na, joma ruabọhọ ewhowho “ovuẹ usiuwoma uvie Ọghẹnẹ” kẹ ohwo kpobi nọ ọ te gaviezọ.—Iruẹru 8:12.