Eruvẹ Oware nọ Ma Rọwo Kpahe 1914

Ebaibol na ọ tuduhọ omai awọ nọ ma “hẹ thọ-oma vẹra” re ma ta oware nọ ma rọwo via, jẹ rọ “udhedhẹ avọ oma-urokpotọ ruei.” (1 Pita 3:15) Evaọ uzẹme, o rẹ sae jọ bẹbẹ re ma ru eware ididi Ebaibol jọ vẹ. Wọhọ oriruo, epanọ ma rọ riẹ nọ Uvie na u muhọ esuo evaọ 1914. Re u fiobọhọ kẹ omai, a ruẹrẹ izoẹme ivẹ nana họ: “Ẹmeọta Kugbe Omọfa Kpahe Ebaibol—Okevẹ Uvie Ọghẹnẹ U ro Muhọ Esuo?” Izoẹme nana e romavia evaọ Uwou-Eroro Akpegbọvo rite Akpegbivẹ gbe Ọvo rite Ava nọ ma te rọ kẹ ahwo evaọ usiuwoma. Nọ who te bi se izoẹme nana, daoma kẹ iyo enọ nọ e rrọ obotọ na kpahe oghẹrẹ nọ Cameron o je ro ru ẹme na vẹ.

Ẹvẹ . . .

• ujiro nọ o jiri ohwo na tao u ro fiobọhọ kẹe ruọ ẹme na?—Iruẹru 17:22.

• ọ rọ rehọ omaurokpotọ ru ẹme na vẹ?—Iruẹru 14:15.

Fikieme u ro kiehọ nọ . . .

• ọ jẹ hae kareghẹhọ ohwo na eware nọ a ta kpahe no taure ọ tẹ te ruọ ọfa?

• ọ jẹ hae nọ ohwo na n’oke t’oke sọ oware nọ o wuhrẹ no na u vẹ riẹ ẹro?

• eware nọ o wuhrẹ ohwo na evaọ ẹsiẹvo i bu hrọ họ?—Jọn 16:12.

Eva e were omai kẹhẹ nọ Jihova, “Owuhrẹ” mai na o bi fiobọhọ kẹ omai re ma sai ru eware ididi Ebaibol vẹ kẹ ahwo nọ a gwọlọ riẹ uzẹme na!—Aiz. 30:20.