Epanọ Ma Sai ro Wo Onaa Ziezi Evaọ Usiuwoma Ota—Wuhrẹ Ahwo Ekpokpọ

Oware nọ U ro Wuzou: O gwọlọ nọ ahwo ekpokpọ nọ i bi kurẹriẹ ziọ ukoko na a re koko “eware kpobi” nọ Jesu o jie uzi rai, je wuhrẹ amọfa uzẹme na. (Mat. 28:19, 20) Ahwo ekpokpọ buobu a be jọ Isukulu Odibọgba Esuo-Ọghẹnẹ na ru ẹme enẹna jẹ be sae ta usiuwoma kẹ ahwo uviuwou hayo egbẹnyusu rai evaọ oke gheghe. Ghele na, fikinọ a bi wo ovuhumuo kẹ eware nọ a bi wuhrẹ, jẹ riẹ nọ Jihova ọ gwọlọ nọ ahwo kpobi a yo emamọ usi na, a sae ta nọ a gwọlọ wo abọ evaọ usiuwoma ota na. (Rom 10:13, 14) Nọ ohwo ọkpokpọ o te wo ẹnyaharo te owhowho-uvie nọ ọ re họ-ame he no, o gwọlọ nọ a re gbe wuhrẹ iẹe ziezi re o wo udu ta usiuwoma na.—Luk 6:40.

Epanọ A re ro Ru Ei:

Fiobọhọ kẹ owhowho-uvie ọkpokpọ na re ọ jọ oria nọ a rẹ jọ rehọ ebe na rehọ ebe nọ ọ rẹ rọ ta usiuwoma gbe enọ o re ro wuhrẹ ahwo. Dhesẹ oghẹrẹ ebe nọ e rrọ ẹkpa usiuwoma ra kẹe, jẹ fodẹ ẹjiroro obe ovuovo nọ e rrọ ẹkpa ra na.
Whai imava wha jọ Odibọgba Uvie Mai salọ oriruo usiuwoma ota jọ je wuhrẹ iẹe kugbe. Tuduhọ iẹe awọ re ọ rehọ ẹme obọriẹ ta ẹme na. Rehọ oghẹrẹ ẹkeria-ẹmeọta nọ e rrọ ẹwẹ. 82 evaọ obe Isukulu Odibọgba na ro wuhrẹ iẹe, enọ a rẹ sae nyaku evaọ ẹkwotọ rai. Vuẹe epanọ ẹgọ gbe osẹ nọ o rrọ kpatiẹ u wuzou te.—2 Kọr. 6:3, 4.
Whọ nwani wuhrẹ iẹe ẹsiẹvo no who serihọ họ. Dhesẹ ekade ẹkwotọ usiuwoma ota kẹ owhowho-uvie ọkpokpọ na, je wuhrẹ iẹe epanọ ọ sai ro kere eme fihọ okerefihotọ n’uwou ruọ uwou. Dhesẹ kẹe epanọ o re ro kere edẹ ahwo nọ a dhesẹ isiuru fihọ otọ. Wuhrẹ iẹe epanọ ọ sae rọ rehọ jw.org/iso gbe omobe Good News for People of All Nations na ta usiuwoma. Fiobọhọ kẹe riẹ epanọ ọ sai ro zihe bru ahwo nọ ọ ta usiuwoma kẹ.—1 Kọr. 3:6.
Wo odiri kẹe, jẹ hai jiri iei. (Itẹ 25:11) Fi emamọ oriruo họ otọ kẹe. Ajọwha ra gbe isiuru nọ who wo kẹe o te kake thọrọ iẹe ẹro ho.

Dao Onana Evaọ Amara Na:

Whẹ avọ ọmọ-uwuhrẹ Ebaibol ra nọ ọ rrọ owhowho-uvie wha gbe kpohọ usiuwoma n’uwou ruọ uwou, gbe ozihebro hayo obe-uwuhrẹ Ebaibol. Otẹrọnọ who gbe wo ọmọ-uwuhrẹ Ebaibol otiọye he, vuẹ owhowho-uvie nọ o ri wo onaa tere he re wha gbẹ nya.